九龍城 - 公和荳品廠

A: 痴線，$10碗豆花。
B: 咁好唔好食?
A: 痴線，間間都係賣緊$7佢賣$10
B: 咁即係好唔好食呢?
A: 發神經，亞婆豆花又有薑汁又大碗過佢又好食都係$7，嫌遠，深水埗公和一樣重係$7。
B: 咁到底好唔好食呀?!!
A: 剩係知$10好貴，一路食一路掛住叫好貴食完都唔知咩味。睇來又有一間唔駛再去幫襯的舖頭。

粉嶺 - 四眼仔腸粉

其實都是標準外面交來的腸粉，所以好難話好唔好食，就是一般的那種，只是這裡的醬汁落得一點都唔孤寒，豉油醬汁夠晒多底讚，價錢亦相當便宜。魚蛋就很一般，粉果亦是外面交來的，塊皮厚過我塊面有成半厘米厚，饀同皮都唔好食所以基本上冇乜人叫粉果，大部份人都係食腸粉最多加幾粒燒賣。

屯門 - 小巴黎越南餐廳

也不想講太多，直接睇吓食物怎麼。飲品基本上無乜特別，或者最特別就係除了甜味之外就幾淡，唔多掂。  
什錦金邊粉的東西都真係幾雜，豬肉唔太好食，其餘就不過不失，湯底似味粉開的。  
香芧豬扒飯豬扒幾多，味道都幾好，不過一丁點香芧味也沒有，正正經經叫豉油豬扒咪好囉。  
價錢唔算貴，只是食完完全唔覺得是越南菜，較似港式茶餐廳食物，去茶餐廳食或更好味。

Sony NEX-3N (V1.00)

早幾個月前買了 Sony 的 NEX-3N本來想用來代替之前的Panasonic機仔出街影 snap shot，但係所有用閃燈自動模式近攝之相片完全不堪入目，九成以上相片出現爆光過度問題。由於很多餐廳食店燈光都較偏暗唔用閃燈效果會差，所以一直都很少用，但係始終都覺得應該拿去檢查一下有什麼問題。第一次拿去他們維修人員檢查過硬件沒問題，認為可能是軟件參數有衝撞重設後問題應已解決，但可惜拿回後問題仍然存在，不知道是不是他們不清楚是什麼問題。

由於維修人員服務態勢相當好，所以再接觸他們並傳了三張問題照片給他們，怎料剛收到的回覆是檢查過所有相機機能完全正常，與其它NEX-3N的反應沒有分別，且認為相片沒有爆光過度，因相中所有details都可清楚看到，心中已經打個"突"，覺得其實佢知唔知什麼是爆光過度，如果這是我第一部用的數碼相機我一定會相信他，但我己用了數碼相機十多年了，又怎會不清楚知道正常爆光應如何。不過話說回來佢都只是做維修，也未必知道每種相片本應是什麼樣子，另外我亦同意這不應是硬件問題，明顯是這部相機在工程階段沒有在相約情況下測試並調好相應參數，有時新牌子同歷史較由久的牌子分別就在這些細節上，但亦每每是最致命的。

近攝時相機在手動"P"模式將爆光補償減兩至三級是可解決問題的，但一不近攝又要將補償改回過來實在太煩，由於這問題影響了平日八、九成以上的相片，所以暫時還是用返之前的 Panasonic 同 Nikon ，希望維修人員向 Sony 反映後能有新 Firmware 可將問題改正過來。  
齋講很難明，同時送上一張用相機的爆光補償設定減兩級下爆光較正常的相片作比較一看就會明，是否一個天一個地?

馬鞍山 - 譽粵菜

一間新開的酒樓，問過在那裡做的啊姐應該是22號才開始營業，之前行過記得佢好似話用了成千萬來裝修，係真就真係幾落本，入到去睇吓係幾靚但就唔係話勁靚那種，之不過入面裝了頗多水晶燈，連廳房入面都有。睇下餐牌價錢都幾貴，起碼泊得住部份出名的酒家，見佢開章做緊$268孖寶，有蠔皇扣南非鮑魚4隻及半隻頭抽浸走地雞，叫來睇睇點。  
雞是冰鮮雞來，雞本身都幾大隻，豉油汁可能還新做所以新豉油味較重而雞汁的鮮味唔太夠，這點情有可原，相信再過幾日自然會好點，現在味道都唔錯，只是雞過熟了唔夠滑，相信又是現時店舖拍太生有機會食壞人所以一於整熟點的老問題。這裡的薑蓉無薑的筋在入面是正確做法，現在越來越多食肆用切碎薑蓉就無咁好食，做法其實很簡單不過就不在這裡講，話晒都是人地的搵食架罉。  
蠔皇扣鮑魚鮑魚比想像中細同薄身，但一定大隻過平時清蒸那種九孔鮑，鮑汁很好味，只是蠔汁略少了些但不細心也不覺得，反而馬蹄粉落得太多太杰身。另一問題由於是煲仔上而侍應沒有幫你用碟分，在碢中放得十分鐘下面小棠菜出水才是至命傷，攪多兩攪一碢水浸往在碢底白白把鮑汁浪費了。老實講這碟鮑魚做得相當好味，就是要食得快。  
另外叫了生煎包及高力豆沙，這兩款反而唔貴只是$38及$30。生煎包皮好鬆煎得又夠香，肉亦夠多汁，好食。這款包仍可改良一下，燒熱小砂碢在入面上一層薄油，在碢底放乾蔥及蔥再放煎好的生煎包在蔥面，蓋蓋馬上上給客人，好味過現在在包面放蔥粒多多倍，不過咁可能就要賣$68啦。而高力豆沙是正常好味、皮較薄身那種，唯豆沙有點太少。  
這次點幾個餸都有水準，至於值不值這個價就見仁見智。走時在門口見到對面商場豪宴的經理及幾個人過來，兩間是同一老細的嗎?還是過來試菜?

果皮

近期去到果欄，大部份有做零售的檔口都在"介"果皮，可能古舊的陳皮有價有市，就算一箱箱新鮮的柑價格都水漲船高，只是柑肉一般都掉入垃圾桶確實可惜。今年暫時見過有三種級數的柑，最平一種賣一百鬆點就有一箱，只是品質太差果欄較少作零售賣，或者在街市反而會見得多點。賣得最多的一款大概是約二百蚊一箱的那款，雖然盒子上寫著新會特產正宗新會柑，但問過幾檔都得到同一答案不是產自新會，相信就好像黃色超市賣的平價日本南瓜不是產自日本一樣。  
最後向老闆說要買產自新會的新會柑，在柑皮剛剝落已可聞到相當大分別。所謂一分錢一分貨，新會產的要三百三一箱貴很多，但有錢也不太易買，來貨少又多熟客留，最後老闆只肯賣一箱"介"好剛晒的果皮，要收多40蚊，由於唔太憂賣唔去柑或果皮只能用箱來做單位，半箱免問。買了一箱數過有141塊，由於唔熟手要"介"一箱除時搞幾個鐘，40蚊冇收貴，最大問題睇皮很難分真假(其實俾個柑你咪一樣分唔到)，在太陽下又在通風的情況下未自然發酵的果皮頗難聞到有味(放入袋中半個鐘收集了氣味就較易分，但邊個可給你咁做)，真係要講個信字，好在香港老實商人多所以唔駛擔心。  
老實講果欄零售價格很多時貴過出面街市，只是街市多賣次一級的貨，要買最優質的在這裡較易且有較多古怪生果賣。

太古城 - 市川日本料理

一間都幾貴的日本料埋店，不過佢有些套餐都幾好食，例如這次食的套餐是在午市後供應的隨心意餐，每樣都有幾款給你選，單看價錢計埋加一都要近百五蚊一個人，講真單看價錢是幾貴，不過看過實物後其實算超值。這裡的套餐無論平日或是週未假日都是一樣款式一樣價錢，唔駛諗住平日去會平點，只是平日下午去間店幾"拍烏蠅"。  
第一個餐選了京蔥安格斯薄牛肉、日式燉蛋、火龍果野菜沙律及蟹柳茶漬飯，份量在日本菜來講算大，一個人食應該會飽，女仔更加可能會食唔晒。沙律個汁都幾好味不過多點汁會更好，薄牛肉好嫩滑幾好食只是略甜了些，不過這可能是醬料問題全完可以接受。茶漬飯很多香港的食店都做得不好食但這裡的做得相當不錯，茶味不會過濃且和飯味很夾，不知是用什麼茶來做，加點芝麻及紫菜頗香口又靚，燉蛋反而麻麻地相對較行貨。  
第二個餐選滑蛋吉列豬柳煮、鯛魚湯、肉碎茄子及冷烏冬。豬柳下面無飯的，若加了飯其實就是日式的親子飯，所以個汁其實幾甜，不過這類汁帶甜是正常做法，整體味道亦中規中矩。茄子幾細份不過都好味，若肉碎味道濃些或更好。烏冬就是正常較彈牙的日本烏冬，鯛魚湯由於菜落得多所以較似菜湯多過魚湯，味道只是麻麻。  
最後的甜品是紅豆糕或維記雪米磁，紅豆糕無乜特別，雪米磁就更加無野可以講。  
整體水準唔錯，若以這套餐價錢定位就更是相當好，值得推薦。

深水埗 - 嘉頓會所餐廳

對上一次來嘉頓吃東西，相信已經是十幾二十年前的事，實際日期也不太記得起，那個時候餐廳是在地面一入門口的右手面，那時感覺已經幾老式餐廳，東西是有點貴但水準都唔錯。後來餐廳好像是結業了，聽人說其實嘉頓跟本唔想做這間餐廳，它只是其中一個老股東或是家族成員的情意結東西所以才俾佢起那處搞，後來轉了做會員制或是會所都不肯定，反正好像要有一定人數提早預訂才可，不過所有這些都是傳聞來的。

其實佢放了個水牌在門口說現在有餐廳都有好長時間，只是門口見唔到有餐廳而整在氣氛都唔似食野的所以亦沒有幫襯，這次心口有個勇字衝入去問門口保安，原來餐廳在二樓，樓下是咖啡室。上去餐廳看格局很久前應是員工餐廳改建的，唔知跟以前的餐廳還有沒關係。  
點了兩份常餐芝士焗意大利雲吞及香煎紐西蘭長羊扒配羊燒汁，$69算是貴貴地但又唔算好貴。看麵包顏色有點未焗夠的樣子唯沒影響味道，來到時是翻熱了，味道唔錯。湯就幾一般，特別是白湯冇乜味。  
羊扒來到都幾多及幾好樣，但食味不太好，最大問題是羊扒有很大的雪藏肉味(不是羊騷味)沒除去，由於汁是用本身的肉汁來做所以任何東西都帶有很濃的雪肉味，食起來真的不太好受。旁邊的菜蔬是白烚菜冇乜味本來也沒問題，但要點這個雪味汁就問題大大。唔合格，若能用點酒或薑去掉雪味定當不初，當然也不要浸水解凍。  
意大利雲吞就幾有驚喜，應該是用蕃茄去核後打蓉來做汁，汁夠多焗得夠有濃香很好味，芝士是少了點，問題是芝士帶鹹又加上焗後收乾了汁，做這類菜醬汁一定要減鹽，事前調到緊緊唔夠鹹，這裡沒減所以都幾鹹。  
餐飲沒什特別，估計那片甜品是奶凍，唔多好食，上面唔知是大菜定蒟蒻無乜味，下面唔知是想做蛋糕定moose，但似乎加了太多cream of tartar食落似咬海棉。  
門口還有個做鴨血的古董。

長沙灣 - 潮濠城宴會廳

其實亦即是潮濠城酒家，記得很多很多年前潮濠城都是一些頗貴價的酒樓，雖然現在都仍有點貴但已不可和當日相比。來這裡飲下午茶見到這酒樓很奇怪，裡面廳房及大堂有極大量的空枱，極大量的意思是用幾多十張來計算，當日保守估計也不下於三、四十張，很多是人客走了沒執枱，但就算執好又如何，一樣沒有打算開位來給外面在等候的客人坐，而且很早就截龍，一副唔憂做的樣子，亦的確三點鬆點便開始清場，其實佢都講明只做到三點半便落場休息，很老牌食店的樣子。  
點心就要看食什麼，普遍都算OK啦，但又不至於話好好食，唯流心的包點真係唔識流心唔多好食，叉燒包好多饀多汁幾好食但甜了些少，珍珠雞亦幾多料。  
這裡另一問題是招呼唔多好，先是叫號碼的知客很惡，連我見到都有點驚更唔好話一般太太小姐，二來入面明明很多空枱所有人一次入晒去都得但就偏偏要起外面等成個鐘，係人都會唔多高興，最後入面都冇乜人幫你沖茶，侍應其實很多不過很多個都掛往清場沒怎樣理會客人，但話說回來這間酒樓是少見的大間。