2015年1月26日 星期一

光輝圍 - 759茶餐廳

這次算是有少少特登去這裡食野,看看雷聲咁大的759茶餐廳如何。在門人有價目表列出所有供應食物,奈何有約一半是指定時間供應,不過有很多茶餐廳都係咁。至於價錢,散叫在同區來講係貴,無它,這區租金算平,食客以工廠寫字樓為主所以一般價錢都要平,三、四十蚊連飲品的套餐一街都係。而這裡午餐三、四十蚊算是合理。  photo 759 Restaurant-01.jpg  photo 759 Restaurant-02.jpg  photo 759 Restaurant-03.jpg 
點了鐵板蒜茸羊架拼司華力腸意粉及焗牛扒煙肉飯,奶茶及檸茶。無錯茶餐廳是咁畸形先上咖啡茶,奶茶算不過不失茶餐廳水準,唔係特別香滑但都可以的。檸茶就得啖笑,淡到有點似檸水,就好似你飲了大半杯但又想飲多杯喎,於是就倒杯熱水入去倒滿再飲過咁,而且只是微暖,難飲極。  photo 759 Restaurant-04.jpg  photo 759 Restaurant-05.jpg 
例湯中湯唔知是什麼湯只見到有隻雞腳,湯的味道就好似你將任何處理食物時剩下的東西全掉入去煲,咪即係餿水咁味,唔講都估到唔好飲。  photo 759 Restaurant-06.jpg 
而西湯姐姐話係羅宋湯,由於無肉所以其實應該係雜菜湯至啱。湯內有很多雜菜,味道可以的只是略欠鮮味,最簡單改善方法咪加些雞粉入去,否則要維持素食略加多一點糖都可。  photo 759 Restaurant-07.jpg 
主菜終於出場,鐵板好熱汁的味道幾好,兩隻羊架的肉都唔係好完整唔知點解,無乜羶味,意粉有很輕微的爛應是煮時水溫唔夠但仍好過好多茶餐廳。  photo 759 Restaurant-08.jpg 
焗牛扒飯味道亦唔錯,上面加了芝士焗得夠燶算是Bonus,令香氣及味道加分不少,米飯亦唔錯,或是用返自家入口米所以唔駛用最平的米,最大問題是牛扒加得太多鬆肉粉所以無乜咬口。  photo 759 Restaurant-09.jpg 
兩份主菜以價錢論是幾好味但就有同一問題略偏鹹了些,記得鐵板會極速揮發水份個汁略淡會較好,而一般芝士或煙肉因有鹹味加親個汁亦都要減鹽。

同場發生了小插曲,遠處有人投訴但內容聽得唔清楚,估計是第二枱客點的同一食物兩次送錯去佢張枱,佢好'興'又驚人計佢錢。當時兩個餐廳話事人處理得很好不停賠罪而沒有在任何客人面前講過任何其它說話,反而部份食客同伙記不停地在遠處講駛唔駛咁緊張。點解拿出來講?第一係無論如何食店都是真的犯了錯,不會因為小事就唔係,第二同客人理論或俾說話佢聽是極蠢的,所以就算在該客人面前,或在客人離開後在其它客人面前亦不應評論任何客人的行為或問題。最後一點是很多食肆都會犯,暫時未見過有任何一間能正確處理,就係食物離開了任何店員的監管後那怕只有一秒鐘,該食物都要扔掉不可再拿給其它客人,因為你不會知道其間發生過什麼事,拿錯枱就應是直接損失。

講一個真實個案,有次去食魚蛋粉,同枱有個呀伯可能怕熱所以食麵時將自己飲開杯茶倒點落自己碗麵道整凍點才食,其實有很多戴假牙的人都怕食很熱的東西。咁佢食完一碗再叫多一碗,點知個伙記拿錯隔離枱碗麵給他他直覺便馬上倒茶入麵內,之後又馬上發現唔係佢要的野就同伙記講,伙記二話不說將佢碗麵拿過隔離枱,前後只是幾秒間發生的事。

2015年1月21日 星期三

美國 Envy 蘋果

今年有很多日本的玉林蘋果賣,周街的生果舖都有,講真係幾好食,不過自從食過美國的 Envy (愛妃或艾菲)蘋果之後,估唔到玉林蘋果幾近被完全 KO,無論蘋果的香味及甜度,Envy都能輕易勝過玉林,而且兩者價錢幾近相同。真係再俾唔到原因點解重要買玉林蘋果而唔買 Envy,或者唯一不及的是 Envy 爽甜得來肉質比較硬,要有番一定牙力才好,長者或不太喜歡。  photo AppleEnvy-01.jpg  photo AppleEnvy-02.jpg  photo AppleEnvy-03.jpg  photo AppleEnvy-04.jpg

2015年1月20日 星期二

百佳

到底這種Tarami日本啫喱可以平到點樣呢?阿信屋$7.8一杯好平?去年初時一田減價6個幾一杯好平?估唔到今日起PK超市見到十蚊兩杯即$5一杯,真係低處未算低。  photo Parknshop-01.jpg 
同場加影日清鹽味拉麵碗麵,$11.8重要唔係特價貨,奈奈子1.5公升蘋果水(含20%蘋果汁)$12.5。注意這些都是普通貨架上的貨而唔係掉出來特價車仔上的貨,兩大超市劈價力度之狠有時唔係其它店舖所能及。  photo Parknshop-02.jpg  photo Parknshop-03.jpg

2015年1月18日 星期日

位元堂 - 士多啤梨味龜苓膏

見幾款位元堂的杯裝水果味龜苓膏在黃色超市清貨,價錢很平便買來試試,話晒都係大牌子,結果中晒招。  photo WaiYuenTong-01.jpg 
先講講味道,其實水果味幾淡,除了那點點的水果味外食落口和一般龜芩膏差唔多。咁點解話中晒招?睇睇成份表馬上出事。龜苓膏主要成份之一是土茯苓,但成份表上寫的是茯苓,可從英文名稱及位元堂網頁証實絕對是茯苓沒寫錯。還記得一年前海天堂才在同一情況下出事鬧得滿城氣雨。土茯苓及茯苓是兩種不同的中藥,土茯苓是百合科植物,而茯苓是真菌類,藥用價值完全不同。  photo WaiYuenTong-02.jpg 
海天堂事件還言猶在耳,估唔到同一事件短期內再次出現,特別是出現在一間如位元堂咁知名標榜中醫中藥的企業,極之令人失望。

2015年1月17日 星期六

馬鞍山中心 - 海港

好耐未試過有一間酒樓令我頂唔順起身走人,這日終於試了一次。本來打算去馬鞍山中心間海港飲茶,結果坐起道5分鐘都完全無人裡,期間負責該區的待應明顯係見到我叫佢但佢當見唔到,其它食客想落單都要自己行出去俾張單佢,超懶散慢動作搞乜鬼。由於始終未開到茶所以最後起身走人幫襯第間。這相信是個別員工問題唔開心想趕客,因為早幾日都去過有第二個待應招呼唔錯的。

2015年1月14日 星期三

馬鞍山 - 富臨皇宮

天氣凍食火鍋,看看馬鞍山富臨如果?  photo FulumPalace-06.jpg  photo FulumPalace-07.jpg 
今年第一次幫襯富臨,價錢平平地。點了藥膳醉雞煲做鍋底。估唔到真係有成隻雞咁多,無錯係"成隻雞咁多"而唔係"成隻雞",因為成鍋都無雞胸同得一隻雞中翼,骨頭比較多,應是預先將很多隻雞斬件然後隨手執,執到肉就肉骨就骨,其實這也不是大問題,反正雞多到食唔晒,最大問題就是雪味勁重,求其拿些薑拿些酒先"拿拿"佢會否更好。而家生意人真識做生意,一隻冰鮮雞駛幾錢,由於好多香港人唔想浪費食物咁食完隻雪味雞已經唔太駛再食其它野。整煲湯隨雪味外無乜藥味同酒味,怪怪的味道又確是有些難食。  photo FulumPalace-08.jpg 
氣水及醬料選擇頗少,所用沙嗲及豆瓣醬品質極差,是最差那類,當天連可槳及七喜都沒有,只得兩款Shandy、一款忌廉氣水同一款啤酒。是這間富臨的問題嗎?大半年前去過其它富臨無咁差的,還是而家變了?

由於有成隻雞咁多嘅雞食唔想浪費所以其它野叫的不算多,反正是正正常常不算好亦不算差的水準,對得起個價錢有突。服務算可以,或者在整體服務較差的富臨中已算不錯。菜疏主要用切菜頭的方法去汚去泥沙,落鍋前最好檢查清楚。 photo FulumPalace-09.jpg  photo FulumPalace-10.jpg

2015年1月13日 星期二

泰國琥珀蜜柚

這種柚子之前未見過,便又買來試吓。  photo ThaiAmberPomelo-01.jpg 
柚子的每片果肉都非常飽滿,肉質很幼嫩多汁,纖維比一般柚子少很多,較特別的是肉唔太黐皮所以要把內皮撕下十分容易,十多二十秒便能將整片果肉完整拿出。唯唔知係唔係我買那個水準差了點又或是較嫩身關係,食落柚子味略淡及無一般泰國金柚咁甜,五十幾蚊個值唔值就見仁見智,我就覺得貴了點。  photo ThaiAmberPomelo-02.jpg  photo ThaiAmberPomelo-03.jpg

2015年1月12日 星期一

美亞聖誕特賣

按照佢張海報聖誕特賣應該完咗,但剛去完見到還做重不過唔記得問職員做到幾時。其實佢觀塘個特賣場之前都去過,好多都係出面百貨公司有得賣的貨,好多時外面都有特價所以唔覺得平好多。不過職員話原來一年有兩次會開埋入面個貨倉仔賣特價野,貨倉仔有3行,部份係出口款式真係幾靚,另外有很大量Prestige牌子的廚房用具及蛋糕焗盆,真係平過出面相當多。  photo Meyer-01.jpg  photo Meyer-02.jpg  photo Meyer-03.jpg  photo Meyer-04.jpg  photo Meyer-05.jpg  photo Meyer-06.jpg  photo Meyer-07.jpg