2015年3月31日 星期二

黃大仙 - 好味鍋

這次不是食火鍋而是去飲茶,一般的舊式屋邨價錢唔算話特別平,點心樣子及用料唔算好吸引不過部份點心都算幾好食,只是京或叉燒包都包到穿底漏饀就底打,點心有點偏太鹹,食完飲埋茶都勁口渴就知勁多味精,其它可以講的也不多了。  photo Yummy Hotpot-01.jpg  photo Yummy Hotpot-02.jpg  photo Yummy Hotpot-03.jpg  photo Yummy Hotpot-04.jpg  photo Yummy Hotpot-05.jpg  photo Yummy Hotpot-06.jpg

尖沙咀 - 鮨處松戶

如果星期日夜晚去尖沙咀想食較高檔的日本菜,不防試吓這裡,這些主力做商業客的食肆好多時假日都有優惠。而去得這座玩具集團的商業大廈當然要同佢地的隱者龜先影下相先。  photo Sushi Dokoro Matsudo-01.jpg  photo Sushi Dokoro Matsudo-02.jpg 
這店其實是早排去的,裝璜算簡單,星期日晚上頗清淨少人,所以坐得幾舒服。一開始會有碟茄子做前菜,這碟野唔係送而且唔平要收70蚊,老婆唔喜歡佢原本的前菜問待應有無第二款,待應同廚房相量過後結果俾咗雞泡魚乾,又估唔到佢個雞泡魚乾非常好食,厚身得來算幾軟而且好鮮味,絶對唔係鹹魚味而係魚乾鮮味中帶點甜,好好食。其實這雞泡魚乾在另外的餐牌上有得點而價錢是相當相當貴的,佢都係收返70蚊底讚。  photo Sushi Dokoro Matsudo-03.jpg 
之後的雜錦刺身亦相當好,特別是赤貝那類海產唔多覺腥味應該都幾新鮮,海膽好鮮甜但整爛了少少,刺身切得相當厚,吞拿魚腩好肥美,最估唔到多了三件三文魚刺身令整個擺位舖排比相片更豪更好看。  photo Sushi Dokoro Matsudo-04.jpg 
最後的咖哩豬扒飯就好壞參半,好的是豬扒肉厚粉皮薄,不會只食到皮而肉味很少,炸得亦算唔錯算淋得來有肉汁,不過就炸得過了少少火位濃了些,米是全珍珠米沒有溝食落好好,咖喱汁很多,而不好的是咖哩明顯是咖啡磚做出來的味道而且很鹹,又欠缺特色醬汁(及椰菜),個咖喱汁一定要搞搞佢。  photo Sushi Dokoro Matsudo-05.jpg  photo Sushi Dokoro Matsudo-06.jpg 
正價確係幾貴,不過計埋折扣就幾值得推介,提供的優惠常變佢樓下廣告亦沒有講晒所有所以最好先問清楚。

2015年3月27日 星期五

佐敦 - 富臨魚港

本來去佐敦諗住睇吓有乜好野食,但由於同行的人要在附近買野所以百般唔願意之下去了富臨。講真這間富臨還才是第一次幫襯,不過驚喜住住就係咁發生。其實當時真係有點衝動想問吓待應當日個廚係唔係"替間",因為實在之超晒斑,明顯有高級酒樓廚師的水準,這類廚正常唔應該會在這類酒樓做,無論如何,看看當日水準如何。

上湯龍蝦伊麵,龍蝦上粉上得很薄只緊緊包著很薄一層,煮好之後肉是緊緊熟所以很彈牙。當然這類酒樓一般龍蝦都是數隻砍埋晒一齊到時睇吓你好唔好彩分到多肉定多殼,這碟就明顯多肉很少殼。伊麵煮得過火了小小有小小淋,不過個上湯汁夠多亦夠鮮很好味,是近期少見的佳作。  photo Foo Lum Fishmans Wharf Restaurant-B01.jpg 
菠蘿生炒骨又係考牌之作,近期荷包肝硬化(無錢)所以未食過似樣的生炒骨,估唔到這碟野細細碟會咁好食,色素落得唔多所以不太紅,不過情願佢少色素,睇睇個汁稀杰收得剛好,薄薄一層汁能包著所有食材之後無多餘汁滴落在碟上,咁炸好的排骨就唔易淋,酸甜味道亦調得頗好,是上佳之作。  photo Foo Lum Fishmans Wharf Restaurant-B02.jpg 
生煎包...掉咗佢啦,超難食,唔食無損失,食咗食唔落其它野損失更大。皮唔夠鬆肉無鮮味煎得又唔夠又唔香,係咪點心部出品,超唔掂。  photo Foo Lum Fishmans Wharf Restaurant-B03.jpg 
魚香茄子煲又係幾好食,夠香口夠濃味醬料亦多,不過醎咗點,一定要送白飯食至得。  photo Foo Lum Fishmans Wharf Restaurant-B04.jpg 
最後鮮茄魚茸蒸豆腐無諗過係咁樣的,本來以為係蒸一磚磚的豆腐,點知原來是蒸水蛋但用了豆漿及上湯來代替水,不過效果又幾好蒸得香口又嫩滑,只是上湯太多豆味太淡,蛋亦稍稍唔夠實太易爛,若減些上湯而保持蛋及豆漿的份量就更好。碟頭幾大,又是送飯的餸,早知一早唔叫生煎包。  photo Foo Lum Fishmans Wharf Restaurant-B05.jpg 
桂花糕是送的,實了一點點,隨此之外都幾好食。當日入坐得早開始時見待應有點懶懶閒咁,點知坐落服務都可以喎。有機會會再幫襯睇吓食物質素是否一樣。  photo Foo Lum Fishmans Wharf Restaurant-B06.jpg

2015年3月25日 星期三

深水埗 - 櫻の亭和風日本料理

本身唔係好肚餓只是想找個地方坐坐,見這間已經開了頗久的日式食店原來一直未幫襯過且更是從來沒有想過要幫襯,睇睇下午茶餐原來好平,一碗拉麵加一款小食另外一杯餐茶都只係三十蚊鬆點,又試試。  photo Sakura-01.jpg 
點了最簡單的日式叉燒拉麵,估唔到這個價錢的拉麵會是正常大細,湯底幾濃,叉燒及拉麵亦不過不失,整體正正常常,略有在超市買的急凍拉麵感覺。  photo Sakura-02.jpg 
至於炸豆腐一拿到來嚇了一跳,完全無諗過咁細碟,得兩粒酒樓炸豆腐點心大少的豆腐粒浸在淡醬油料入面,矜貴得可憐。點知食落口又確係幾驚喜,炸粉頗薄,豆腐十分之嫩滑,柔軟得有點介乎於豆腐花與軟豆腐之間,相信炸時處理是有點難度,豆香不太濃但始終炸過仍有一定香味,相當好食。  photo Sakura-03.jpg 
至於熱檸檬茶反正是較差的一類,不要有期望。  photo Sakura-04.jpg 
由於下午茶餐價錢相當平,以價論質來講是十分超值,去開高登不防試試,但留意這理午市很早收,平日三點半後就準備休息了。 

<2015-06-05 更新:再食了一次下午茶拉麵差了很多,無論湯底及麵條質數都差了很多很多,炸豆腐亦退步了少少,只是下午茶價錢$32確實平所以都仍算可以。反而凍檸茶味道好了。>

和民 - 二人套餐

本來想襯往滙豐個二人餐優惠最後一天食多一次,點知佢突然無根據之前宣傳單張所講早一日完了,改了做另一個無咁多優惠的套餐,由於無貼出過任何的修改通知,明顯有誤導消費者之嫌疑。  photo Watami-13.jpg 
其實這兩款由24日開始供應的套餐和之前的差不多,主要就是比用滙豐咭找數貴了二十蚊,而鍋物少了附送的雞蛋,一壺湯及烏冬、飯、拉麵或飯團,這個附送的組合好像要廿幾蚊,即係個餐貴了四十幾蚊,另外多了些要加錢的選項。真唔明為何要咁急冒著有機會誤導消費者指控的風險都要馬上推這個套餐。  photo Watami-14.jpg  photo Watami-15.jpg 
講返個套餐本身都係底食的,二人餐基本上三個人也夠食。最後一提,個博多嫩雞鍋唔多好食,湯底都可以的,只是雞肶肉仍有雪味又無用粉'拿拿'所以唔多滑,而那個好似係雞滑(棒內的肉醬)的東西又唔滑又散修修都幾難食。  photo Watami-16.jpg  photo Watami-17.jpg

2015年3月9日 星期一

元朗 - 怡怡泰菜

味道頗一般,辣醬算是可以,三十幾蚊一碟海南雞飯(無去骨),包餐飲但無湯。簡簡單單食個午飯啫,平平地唔好有太高要求,食得飽質數算對得起個價重想點。  photo Thai Chef-01.jpg  photo Thai Chef-02.jpg  photo Thai Chef-03.jpg

2015年3月6日 星期五

元氣壽司 - 20週年10蚊壽司優惠

元氣慶祝二十年推出每日一款$10中碟壽司,雖然都係平少少但感覺良好,睇條款好似無限制可以叫幾多碟。  photo Genki Sushi-01.jpg 
第一日推出的是北寄貝沙律軍艦,是減得比較少的一款當係熱熱身。由於想紫菜較脆口所以落單點,結果來了碟差不多剩得沙律醬沒有多少北寄貝的,當然這是個別問題因為見到迴轉中的北寄貝沙律軍艦是正常樣子。  photo Genki Sushi-02.jpg 
加多個下午茶餐就更滿足了。  photo Genki Sushi-03.jpg

2015年3月5日 星期四

沙田新城市 - 小南國

在新城市食野真係幾難,好多間都多人到死排隊排餐死而且往往水準都不似預期,一些連鎖店沙田分店食物味道感覺上會較差,無錯裝修係好靚但食野唔係剩係食裝修,很有做自由行睇死佢地唔識食或者很少機會會返轉頭再幫襯的感覺。

行吓行吓去到頂樓見到這間小南國,其實覺得其它小南國水準都係一般,只是這間走中檔路線又未幫襯過咪又試試。裝修確係幾靚,小食唔要菜圃佢地俾了碟花生,估計是陳醋加豉油浸的,又幾好味喎。拿起套餐睇睇,價錢貴得來同散叫唔差唔多那當然是散叫。  photo Shanghai Min-01.jpg 
灌湯生煎包,味道OK啦,只要唔好有太大要求就得,多肉有湯汁咁囉,鮮味就無乜架啦。  photo Shanghai Min-02.jpg 
擔擔麵要求很少辣估唔到都重幾辣,因為自己唔喜歡川椒的麻味所以覺得只一般但其實味道幾好的,若加些炸菜多少少肉碎會更好。做這道麵食其實有個必殺技,用少少優質午餐肉攪爛混在肉碎中炒香後放湯可以提鮮數倍。  photo Shanghai Min-03.jpg 
蟹粉小籠包就唔好有期望啦,只能用唔好食無乜蟹味無乜鮮味無乜湯汁且皮又易爛來形容。  photo Shanghai Min-04.jpg 
香酥鴨估唔到係咁,如片皮鴨咁有粉皮給你包但包的醬料亦無特別,味道都係一般,有些失望。不過估唔到前菜入面浸花生的醬汁與它很配合亦能令它更好味,為何不跟那個醬汁?  photo Shanghai Min-05.jpg  photo Shanghai Min-06.jpg 
雖然服務幾好,但計及價錢與食物質數似乎一次夠了。

2015年3月4日 星期三

西環 - 大頭蝦餐廳

很簡單的下午茶餐,價錢屬一般唔算貴,食物中規中舉唔算話真係好好,但在這個價位這類餐廳中亦以是做得較好的了。香茅豬扒飯一如其它店舖一樣唔多覺香茅味,醬油亦與預期中的香蔥油有些分別唯整體都叫好食。香茅雞翼河就十分行貨,除了幾大碗外無乜特別。奶茶算幾好較接近一般茶餐廳質數,但唔多夠熱熱些更好。  photo King Prawn Restaurant-01.jpg  photo King Prawn Restaurant-02.jpg  photo King Prawn Restaurant-03.jpg 

2015年3月3日 星期二

和民 - 春日繽紛套餐

在新春期間好多酒樓或食肆都會加價或取消優惠,左計右計都係和民較底,仍然有信用咭提供的優惠可用,亦因此原因幫襯了好多次,普遍每一次都能保持水準。套餐提供的選擇頗多,每一個套餐用指定信用咭找數能在幾款外加的小食中半價選用最多三款,而四人套餐價錢大約等於兩個二人套餐,所以人多的話叫兩個二人套餐重底過叫一個四人套餐。若四個人加三個半價小食基本上都夠食,但有一點要注意星期一至五只在5時後供應,星期六、日就全日。  photo Watami-01.jpg  photo Watami-02.jpg 
相信很多人都去過和民食野所以水準如何也不用多講,總知就係幾好食但又未至於好好食。其中有幾樣野還可以講講,先講食物,火鍋的湯明顯太少,雖有另外一壺湯提供但壺入面只有大半碗湯實在太少,點夠煮另外的烏冬或拉麵,當然你可叫侍應俾熱水你加但咁就明顯無特色及唔好食,而且烏冬是先煮熱了才送給客人,不過已煮得過了火太淋。  photo Watami-03.jpg  photo Watami-04.jpg 
意大利風薄切鮭魚其實算是較差的前菜,寒酸得來亦唔見得有乜好食。而芝士年糕凍了後幾難整出來,由於很多東西一齊到食唔切所以很難唔凍,之不過將芝士年糕放在火鍋中整返熱才食就很好吃。  photo Watami-05.jpg  photo Watami-06.jpg  photo Watami-07.jpg  photo Watami-08.jpg  photo Watami-09.jpg  photo Watami-10.jpg 
另外加的壽司味道只一般當然唔及正式壽司店,不過半價後就勝在平。而抺茶雪糕饀蜜丸子就真係不似預期唔算好食,只能話有好多蘆薈在底下。  photo Watami-11.jpg  photo Watami-12.jpg 
最後也談談服務,這裡也和香港絕大部份日式食店犯了同樣錯處,就係待應將食物隨意放在枱上就走,而沒有將食物的正面放好對正食客,這近乎是完全唔駛成本的增值服務,為何無人做呢?就算一些高級食肆也極少能做到。