佐敦 - 澳洲牛奶公司

曾幾何時都幾喜歡去這裡食茶餐，貪佢價錢幾平且炒蛋幾好食，那個年代都以經多人但總唔會搵唔到位。時至今日行過門口經常見一大行自由行及本地人在排隊等位，唔想花時間所以已很多年沒有再幫襯，這次咁啱唔駛等便又睇吓點。

首先見到的是比以前坐得很迫的座位坐得更迫，每張枱都不知加了幾多個位，客人的東西又多。第二服務更差，想問伙記多一句都唔得，因為佢地實在太忙亦非常唔願意理你。先叫一個燉鮮奶，唔多掂喎，唔知蛋白太少定燉得唔多夠有少少唔"擎"，失敗，希望只是一時失手。這東西並非如一般人所想其實極易做，自已做只要用鮮奶完全取代開水就得，一隻蛋白加砂糖打勻，加砂糖入去打因為砂糖可以幫手磨爛蛋白之後唔駛過篩，開一盒新牛奶，由於牛奶消毒時的消毒方法已等於開水煑滾再降溫，所以可直接用很方便，凍熱都沒關係，一隻蛋約可開一碗至一碗半奶，要看蛋大細及想要實定軟，你無睇錯用奶代替水只要落很少雞蛋。加奶後輕攪就可有少少不溶的蛋白不影響因白色不太覺眼，只要不太多泡就可。用保鮮紙包碗面防倒汗水，放入電池爐，水浸至碗身一半，用凍水熱水都可電池爐熱得快沒關係，90度水滾後15分鐘就可。若無電池爐就可用鑊加預熱熱水至包好的碗碗底，中細火15分鐘。這樣做全無難度且還可在碗底加料，如豆沙及蓮蓉等(放入後要輕輕攪一攪或按鬆點)。  
講返主角炒蛋都幾滑，多士仍然幾厚身，把蛋加在上面一起吃很好吃。叉燒湯意粉都OK，湯算濃，叉燒就幾麻麻地，好多意粉好大碗。一張枱咁多人坐東西根本放唔落，伙記要如相片咁樣放野都算係香港特色。  
奶茶本應幾好飲，不過衰唔熱，只有少少暖暖地又是失敗。

中華雞蛋豆腐

盒面大大隻字寫住"使用食品級非基因改造黃豆"，但反轉後面成份表又寫住"黃豆(含基因改造大豆)"，咁即係點呀?有定無呀?係咪想誤導消費者?

鯉魚門 - 妹記海鮮及鉅記酒家

這其實是兩間舖頭，一間賣海鮮，一間是酒家，酒家本身都有自己的海鮮賣只是這次幫襯了正正酒家門口對面的舖頭買海鮮。

講起鯉魚門，這裡海鮮的加工費計法很特別，不是按食材計而是按人頭計，即係你每個人唔理食幾多唔理海鮮平定貴都係收咁多加工費，咁當然唔好自已去街市買過來給他們煮，話晒人地賣海鮮都要賺吓錢，唔係咁大間酒家點"維皮"，一些外加食材如炒菜、麵等是要另加錢，由於按人頭計關係食比較難煮及貴價的食物感覺上較底。  
先在妹記那裡秤海鮮，可能當時人少老細幾好人有推介了些較平及靚的海鮮，龍蝦估唔到咁平只是幾蚊兩，重要唔係得兩隻鉗的波士頓龍蝦，選了隻細的約斤半，另外老細推介選條斑一味兩食，條斑都起碼有三四斤好大條承為800，其實以這類海鮮檔來講好底。之後唔駛理行過去鉅記酒家那裡食完照平時咁埋單就得，佢地自己會分帳。  
送的海鮮湯入面有幾多料，味道麻麻地啦，始終感覺比較味精。  
先來一碟炒斑片，真係唔講得笑，火路掌握得好好斑片緊緊熟，非常嫩滑好食，條魚本身新鮮所以魚肉彈牙及一點腥味都沒有，茨汁較薄做出來效果很好。唔好睇好似得好少咁其實係隻碟好大隻所以睇起來好似好少。  
之後炸球腩又係好大碟及好多肉，簡簡單單做出來效果亦很好，炸粉不太厚，魚炸得略生回鑊炒炒勾薄茨後緊熟又是拿捏得出色，無乜野好講，好好食。  
上湯炒龍蝦伊麵底都好食，做得唔錯只是沒兩味魚做得咁出色所以相對有點失色，龍蝦有很輕微過熟但已比一般的中菜舖好。  
秤海鮮時妹記老闆問要食乜野生果任選一樣，我話要蜜瓜同木瓜一樣一半得唔得，結果佢豪埋蜜瓜俾我。糖水都好食不過唔記得影相。海鮮檔老闆話送生果盆但價目表話兩樣都要收錢，無睇單唔知有無收。 
唔知會唔會平日價錢平點，四個人埋單一千七百幾是有點貴，不過比起外面同類店舖己算平，且真係幾好食幾滿意。

馬鞍山 - 匠日本料理

<2014-07-10註:可能太平，半價優惠已緊急煞停了>

本身沒有想過去這裡食野，因為之前曾經幫襯過食物麻麻地，之不過咁啱未食野又經過見好多人在門口等位，睇睇發生乜野事，原來星期一至四晚上八時半後正價點菜紙食物全部半價，好底咁又排埋一份隊。  
先來一個刺身，唔錯幾新鮮，魚亦切得幾厚幾大片。  
再來的牛肉拉麵估唔到好好食，牛肉都幾好拉麵沒煮過龍湯底亦好味，減完後廿九蚊好底。  
咖喱豬扒飯不過不失，咖哩汁是正常的日式咖哩汁，豬扒炸得有少少過乾都可以接受，唯白飯用的只是一般的米而非珍珠米所以相當影響食味，之不過減完後廿六蚊無投訴，若正價沒椰菜絲及另外的豬扒醬汁就差少少了。  
再來的壽司就真係唔掂，無法，又是用普通的米，壽司醋亦落得多了點，上面的海產品質亦很一般，例如阿根延赤蝦其實食味較一般，芝士三文魚或芝士帆立貝上面的芝士味太搶冚晒魚味。  
炸軟殼蟹亦唔多好，蟹肉幾霉，味較淡但點的醬油又唔夠味，點壽司豉油又太鹹。燒多春魚更差，魚本身唔夠肥美，燒出來的魚很韌要用手扯才扯得開，味道一般，改返做油炸可能更好。  
本來想加多碟三文魚腩但太多人叫所以賣晒，改成了三文魚刺身，不過這碟三文魚明顯沒之前的厚身亦沒有之前的好食，可能真係要睇吓咁啱邊個切及切正條魚那一個部位。  
若下次再來燒夜點拉麵刺身都唔錯，壽司就咪搞了。由於特價時段突然間有好多人，人手似乎有點應付不來所以都有點亂及慢，幫襯要有心理準備，另外加一以正價計算。

深水埗 - 德興酒家

只是去喝下午茶，由於平日點心有八折，價錢都唔算好貴，食物無乜特別都是那些野，質數亦只屬一般般。  
本來都無乜好講，不過佢有個下午茶特餐幾搞野，睇睇點心紙，指定燒臘粉麵跟多一杯凍茶只係加多$2.2，跟這杯茶與否本身碗燒臘粉是沒分別的。只是見到下午茶時段幫襯的公公婆婆比較多，要這杯茶的人又不是很多，可能本身都已經有壺茶飲所以不再叫。點了的凍檸茶都算幾大杯，味道和一般的茶餐廳沒多大分別，不算好又不算差那類。這組合明顯是想搶茶餐廳生意，計埋加一茶錢或會比茶餐廳及燒臘店貴一點點，但話晒坐得舒服好多。

尖沙咀 - 鼎泰豐

都好耐沒有再幫襯這店，想起來對上一次都是多年前了，這次又睇下點。

先來的烤夫沒走樣，都是甜甜的有點醬油味幾好食。而燻魚就只是很一般，魚本身不算香口醬汁亦不算野味，不吃也罷。  
小龍包的皮一樣咁薄及一樣咁多汁，但就沒以前咁鮮味。雞肉小龍包又沒豬肉的鮮味就預咗，不過用來區分那片雞仔好有趣。  
記得這店最初開業的時候，炒飯很好食飯粒很彈牙，樣子靚到好似假咁，同日本食店門外放假的那種十分相似，但現在已完全走樣。其實炒飯已差了很多年，只是味道仍算可以吧。  
最後都要講講每人穫配給的一支牙簽，相當特別吧，識用的會覺得很好用，唔識用的會憎死。  
至於好不好食，可以講每次都有種沒上次好食的感覺，可能成本上漲部份用料慢慢差了，又或者一代傳一代後廚房沒有根據醬料及食材的變化來重新調整食譜吧。來這裡也不要只用口吃東西，要吃吃服務，反正服務是中式食店少有的好。

西頁 - 旺泰特食

這間店在西頁區都幾有人氣，這次入去試試，正所謂希望越大失望越大，在這裡又一次應驗。  
食物真的唔係咁好，亦唔係好有鮮味，重幾重味精，最差是咖哩軟壳蟹，係就係幾大隻蟹幾大碟，但咖哩味道唔夠香同無乜鮮味，點麵包食都唔覺得好食，蟹的粉漿又幾厚及好淋，整體只能用難食來形容。其它的餸菜亦只是一般貨色，所以都唔想講太多，蝦餅串燒算是好一點。  
點的部份餸口味唔算好泰國，反而有點似茶餐廳出品的泰國菜，以價錢論唔係好合格，就算俾少點錢亦不難找到更好食的。

長洲 - 故鄉茶寮

好多人都幾喜歡這裡的紅豆餅，來到當然都買個來試試，它的味道跟外面賣的頗不一樣，餅皮較似舊式那種夾沙糖食的大餅味道，餅皮做得較一般薄，紅豆饀料頗多，奈何所用的紅豆質數麻麻地，豆沙亦炒得唔夠豆沙略過濕同唔夠甜，結果豆沙唔多香口。感覺上除非做豆沙包或豆沙麵包豆沙才會這樣濕，做這類夾餅還是用乾身點的豆沙比較好。整體味道只算好一般，食物嘅野各花入各眼，可能真係唔係我杯茶。

元朗 - 亞曼咖哩屋

老實講句，真係比較少去褔田徑這一帶的食肆，見有間印度咖喱店又咁啱想起好耐無食過咖喱，午市價錢又唔貴咪入去試試。  
門口見入面無乜人，又有侍應出來拉客最初都驚驚地，咁咪問定佢咖哩雞、牛、羊邊樣最好食，佢實例牌話三樣都好食，於是問佢三樣佢最鐘意食邊樣，佢答羊咁咪就食羊(其實一早都打算食羊)，要薄餅加印度奶茶。  
最早到的是印度奶茶，本身唔太喜歡這類似用真空電鍍做的茶具，但裝的是印度奶茶卻又覺得幾有特色幾匹配。奶茶是預早煲好入落暖水壺，紅茶味較一般港式奶茶出，另外似有很淡很淡的香料味，又估唔到幾滑幾易入口。而餐湯稍稍油了點，唔太肯定是什麼湯，只見到入面有一片青瓜及一絲雲耳，相信是蛋花瓜湯吧，但青瓜煲唔到咁濃味的，不知是否加了味素，第一口可喝到青瓜味但習慣後就唔多覺，湯都可以的。而加埋本身有一杯清水，幾口渴到可喝夠。  
到主角出場，先試試咖哩汁，是標準濃味及杰身的印度咖喱，唔係好覺辣(後來才知可選辣度)，可能遷就香港人關係減了香料所以香料味相對唔係太濃，作為香港人的我當然會喜歡這種安排，且真的幾好味。入面的羊面連骨煮得剛好淋，應是另外用香料煮好再放入咖哩中，肉能索汁所以都可以，不過無咁索汁的薯仔就稍稍淡味了點。薄餅是即做的且幾好味，唔會好似那些做定再返熱的死死實實，如能薄身很一點點使食起來軟一點或更好。薄餅份量好大，同樣薄餅在外面可能已算是兩份。  
這餐食到飽飽，以價錢論好滿意。廚房真的是印度人做廚的，至於正不正中就很難講，話晒印度咁大邊個地方做出來的味道至係正中?店內沒有濃濃的香料味因這店是新開無耐，有機會定要再試試其它東西。