2015年9月29日 星期二

尖沙咀 - 李家 Chicken Take Away

見佢間炸雞店排隊排得咁厲害想試試都唔知要等幾耐,而過幾個舖位有佢的外賣店咪買外買試試。要了一份炸雞連氣水,炸雞是放在一個杯仔內,杯仔剛好可以蓋在氣水杯上,側邊有個位插飲管,這種韓式設計確係唔錯,方便單手拿而另一隻手可空出來食,且無論炸雞及氣水看上去都比較多。  photo Lees Chicken Take Away-01.jpg 
講返份炸雞,只能用難食來形容。雞本身無乜味好淡,但又偏偏炸到"乾爭爭",就好似家鄉雞的雞粒咁乾。兩種醬汁其中一種是隨街都買得到的泰式甜辣醬,另一種蜜味芥辣算好點起碼有少少特色,加落去算幾好食(但唔係好好食)。  photo Lees Chicken Take Away-02.jpg 
其實韓式炸雞勁易整都唔明點解搞成咁,只是將外面個乾粉改成用蕃薯粉來炸,下次有機會講講點整。

2015年9月26日 星期六

Potong - 榴槤雪條

喜歡食榴槤的人相信一定會喜歡這種雪條,從盒面見到寫住Durian floavoured都應該知道真係有用榴槤來做。  photo Potong Durian floavoured Ice Confection-01.jpg 
拿出來食真係會食到有少少榴槤肉在裡面,重試過食到有粒榴槤殼粒釘添,差點"吉"到食時要小心。這種雪條最最優勝的地方是有頗重的真榴槤味,而一點榴槤膏那種味都沒有,價錢不算貴,喜歡食榴槤的人很值得試。而缺點是由於真係有用榴槤肉來做(雖然都有加人做味道),每個榴槤的香味都會有差別而它的均質處理不算很好,所以有時的榴槤味會較香較重有時就較差,同一盒味道雖差唔多但另外一盒味道就可能有分別,食多幾盒就會發覺差別都幾大。  photo Potong Durian floavoured Ice Confection-02.jpg
 photo Potong Durian floavoured Ice Confection-03.jpg

<2016-07-14 更新:最近一批應改了配方,榴槤肉含量似少了很多及溝多了水,榴槤味淡了及無咁奶味較為冰感,食味差了頗多。新貨雪條橫切面由四方形變成長方形,此款不再推介了。>
 

2015年9月16日 星期三

尖東 - 海景嘉福洲際酒店自助午餐

這次試試酒店內的Cafe on M自助午餐,可能是平日關係,加上這裡比起附近的酒店價錢稍稍貴一些,人不是太多,見部份也是商業上的人客,又或是這個原因,無論是大堂到餐廳侍應或是自助餐中廚房的員工,服務態度也相對地比很多酒店好,值得一讚。唯平日星期一至五自助午餐並不提供生蠔,試唔到佢聽聞是比較好的生蠔有點可惜。

先試試魚生,三文魚品質唔錯,幾甜口有魚味,八爪魚都好食,只是切的刀手是學師仔切得唔多好,所有魚都切得太薄太碎無乜咬口,而吞拿魚魚肉明顯有散開的情況,之前曾問過外面的壽司師父話係解凍程序出了問題,既然係咁魚生都係唔好食咁多。再試埋手卷同腐皮壽司,腐皮壽司是偏甜那種,味道很好,無奈想拿多一舊都無佢之後無再出,手卷是即叫即做,之但係魚又是切得太碎,整體無乜特別。  photo Cafe On M-01.jpg  photo Cafe On M-03.jpg 
再試試松葉蟹腳,蟹肉霉得很,咬了一口已唔想食,一定又是解凍程序出了問題,全日魚生蟹腳均可跳過。  photo Cafe On M-02.jpg 
燒肉麵說來有少少故事,開始時唔知道餐廳的生麵原來是裝飾用,同師父講要生麵點知佢馬上叫人入廚房拿了個雲吞麵叫個師父仔煮,見佢煮了近半分鐘都重繼續煮給我叫停了講真真係有點唔好意思,廚房各人完全無面黑而且態度仍很好,是酒店自助餐中少見,底讚。為免太淋所以只叫師父仔落很少清湯,雲吞麵麵身幾幼幾彈牙不過鹼水味好重,之後的燒肉都可以還有些少脆。  photo Cafe On M-04.jpg 
之後試試熱葷,選擇只一般多,整體都幾好味。另外餐廳提供數款即炒意粉,本來對這些自助餐意粉無乜祈望,但又估佢唔都幾好食,有外面做得好點的餐廳水準,當然如果選海鮮類意粉海鮮必定會煮得過熟。  photo Cafe On M-05.jpg  photo Cafe On M-06.jpg  photo Cafe On M-07.jpg 
到最後甜品就真係有點驚喜,之前講過現在很多酒店自助餐的甜品都很"行貨"只有連鎖餅店的水準,而這裡的甜品卻很有以前自助餐酒店的甜品水準,唔可以話好出色,但明顯有些誠意,見拿咁多來食都知道絕對收晒貨,唔錯唔錯。  photo Cafe On M-08.jpg  photo Cafe On M-09.jpg  photo Cafe On M-10.jpg 
這裡自助餐水準是比較高對得起佢個價錢,服務也是比較好,唯冷凍食物的解凍問題必須好好處理。

2015年9月15日 星期二

自製沙律

近排日日係咁食,一於清淡點自己整個沙律食吓。一於重本製作,理得佢係乜野沙律。中秋將近很多水果都很靚,就用大量水果,橙只去掉大部份皮,加日本水晶梨、青提,煎香火腿午餐肉、台灣香腸,灑上羊奶芝士,清新一點直接用熱情果肉當沙律汁。正。  photo Salad-01.jpg  photo Salad-02.jpg