麥當勞 - 日日開More

今期麥當勞買一送一優惠17號又開始了，第一炮6件麥樂雞買一送一。

麥當勞 - 熱帶牛油果雞堡

已經好一段日子沒有幫襯麥當勞，這次佢推牛油果雞堡，睇完佢個電視廣告可謂完全提唔起興趣，甚至覺得應該係好難食的東西，估唔到點解麥記會淪落到咁嘅地步，出埋晒D咁嘅野，真係完全唔想食。點知近排無錢，死死氣諗住食個平價套餐，咁啱見到未食過而且都係比平價套餐貴多十蚊咪即管試吓。點知估佢唔到個包原來好好味。牛油果同醬汁都比想像中多，夾咁多牛油果食落都無"溜"的感覺亦無蓋過雞肉的味道，整體味道亦好，係鹹咗少少。雖然牛油果本身係好平的東西但在香港賣得一點也不便宜，計起上來個包一點都唔貴，值得推介，不過食就要找間做得較好同出手較重配料落得足的麥當勞至好去。  
真係唔明點解麥當勞會畀個賣得咁差的廣告出街。

尖沙咀 - 李家 Chicken Take Away

見佢間炸雞店排隊排得咁厲害想試試都唔知要等幾耐，而過幾個舖位有佢的外賣店咪買外買試試。要了一份炸雞連氣水，炸雞是放在一個杯仔內，杯仔剛好可以蓋在氣水杯上，側邊有個位插飲管，這種韓式設計確係唔錯，方便單手拿而另一隻手可空出來食，且無論炸雞及氣水看上去都比較多。  
講返份炸雞，只能用難食來形容。雞本身無乜味好淡，但又偏偏炸到"乾爭爭"，就好似家鄉雞的雞粒咁乾。兩種醬汁其中一種是隨街都買得到的泰式甜辣醬，另一種蜜味芥辣算好點起碼有少少特色，加落去算幾好食(但唔係好好食)。  
其實韓式炸雞勁易整都唔明點解搞成咁，只是將外面個乾粉改成用蕃薯粉來炸，下次有機會講講點整。

麥當勞 - 騎騎笑煙肉雞堡

雖然食完個餐沒有"騎騎笑"，都覺得這款包是麥記近期做得較為好食的一款包。煙肉、雞肉及芝士的配搭確係幾好，另外雞塊能夠食到一絲絲雞肉唔係用免治肉又係抵讚。 
 
個人覺得這個包是幾好味，唯仍有些少地方可改進，雞塊味道相當淡，鹹香味主要來自芝士及減鹽煙肉，三樣東西一起吃當然好味又夠味，不過一來芝士唔係特別大塊，一頭一尾食唔到，二來唔係啖啖都食到煙肉，偏偏個包醬汁很少，當只係食到雞塊時會覺得個包較淡及"鞋"，有少少可惜。若能多番些醬汁或雞塊底加多另外一種杰身醬如蛋黃醬或三文治醬等，咬落去時有些少醬汁"必"出來就會更加好。

麥當奴 - 招財分享盒

對個餐幾有期望結果又幾失望，雖然味道算可以，但無諗過兩隻香烤雞翼會咁細隻且又咁乾無乜肉汁，明顯比之前點Jack那個分享盒差，話晒之前都有4款特色醬可以點可以混，問題只是4款醬彼此間味道唔係太夾不太適合混在一起點，特別是韓式醬味道太搶會完全蓋過其它醬料的味。不過來到招財分享盒就一點特色都沒有，麥香雞、脆香雞翼又是平時那些，點的醬又是平時點雞塊那些，同新年更無乜關係，最慘係一個人都唔夠食又食唔飽，重點同人分享。

英國篇 - Costco

提起Costco都想講一講，佢其實係會員制的貨場，如大間的超市咁以食品為主再有衣服及電器等用品賣，由於會員制所以要會員帶住唔可以自己隨便行入去，超市收錢時亦要睇會員証。講咁多做乜?因為佢入面有間小食店賣的食物好平，當係給會員的甜頭所以要截住出面的外人，當中尤以焗薯平到笑，磅半銀一份只是其它地方幾分一價錢。  
有幾樣配料可選，當然吞拿魚最底食，一個大焗薯上面有近一罐半的吞拿魚，真係剩買罐頭都要咁多錢，細食的兩個人分一份也很足夠。味道方面由於很易整所以無乜撞板，唔算腥重幾好食的。

英國篇 - 家鄉雞

好多人會奇怪為何去到外國都重要幫襯家鄉雞，答案可以好簡單又可以好複雜。最簡單的答案係英國出街食野貴而家鄉雞是較便宜選擇。而複雜的答案確係幾複雜，試想想為何在香港或大陸食到的雞咁難食，咁嘅質數無可能在世界各地開咁多分店，這個就是問題所在。在香港原味的家鄉雞真係又細又乾又無味，而且唔知點解雞剩係得雞肶同雞翼，搵件雞胸睇吓都好難，試過見到有人投訴全筒雞九件都係雞翼，自己亦試過隻雞鎚細到好似大隻雞翼個鎚咁，試過係可以好似卡通片咁放入口拉返支骨出來一啖食晒(唔好學唔係死咗唔關我事)。

英國的雞只得原味而明顯大件很多，有時一件做得香港或大陸的兩三件，而且都有雞胸的，雞明顯較油肉質較幼嫩有雞味及香料味整體好食好多。這一定是不同地區有不同貨源的關係，唔知香港的會否算是垃圾級別(不過仍好過大陸)。比較奇怪的是就算英國本土都唔係間間好食，隨時都係一街之隔的分店果間好食就第時幫襯都好食，果間唔好食就下次幫襯都唔好食，主要分別是有些淡茂茂無乜味，難道每間分店都有固定而不同的貨源嗎?

7-11

從來都超級孤寒的七仔，不嬲食完或飯完野想搵張餐紙抺抺手都九成九無，估唔到今次咁"大手筆"成疊餐紙放起道任拎，還要是優質的大張餐紙。打開睇睇，原來是順便幫自已賣賣廣告唔怪得咁好。希望唔好轉頭俾人一疊疊咁拿晒就好，還有就是要環保點唔駛錢都唔好嘥。

粉嶺 - 四眼仔腸粉

其實都是標準外面交來的腸粉，所以好難話好唔好食，就是一般的那種，只是這裡的醬汁落得一點都唔孤寒，豉油醬汁夠晒多底讚，價錢亦相當便宜。魚蛋就很一般，粉果亦是外面交來的，塊皮厚過我塊面有成半厘米厚，饀同皮都唔好食所以基本上冇乜人叫粉果，大部份人都係食腸粉最多加幾粒燒賣。

吉野家 - 感謝祭

吉野家細溫泉蛋牛肉飯連一杯熱茶包茶做緊特價$12至本月19號即星期六，由於好平所以大排長龍。自己將杯茶轉了做凍檸樂加多兩蚊亦是相當底，只是幫襯的將軍澳廣場分店較孤寒，牛肉少得頗可憐。

觀塘 - 香辣屋

同樣是位於CitySuper內，是泰式菜吧。食物質數同樣不理想偏淡(不是不夠鹹而是無乜食物鮮味的淡)，加點魚露叫做好點，貴得一點也不值。

觀塘 - 咖喱鄉里

本來對CitySuper入面的食店都滿有期望，看模型樣子也不差，可惜真實的東西竟可這樣極端。

胡椒餅無胡椒味(不過佢無話過是胡椒餅)，薄餅是預先做好的凍已不在話下，還是死死實實的(佢都無話過是印度薄餅)，雞鎚細到好似雞翼個鎚咁(文字上佢亦無話過是炸雞鎚只話是炸雞)，無乜味道，個飯亦是凍的，只有少少不太好的香料味，唯咖哩雞叫正常一點，亦只是一點。可能所有東西都是看過模型後一廂情願的想法，反正佢都無話過好食。

吉野家

這裡的牛肉飯幾好食，但更愛它的牛肉烏冬。烏冬幾有日本烏冬那種較彈牙質感，不是一般茶餐廳的廉價貨，只是感覺上約一年前左右用的烏冬更好更彈牙，現在的好像是次了一級，不知是否遇著部份分店煮的問題。

近這幾年吉野家的東西都不知加了多少次價，無計，舖租加到痴了線。這裡跟餐轉凍飯要加$2，無論凍茶定凍檸樂都是加$2，貪小便宜的我當然要凍檸樂。  
不同分店的食物都能維持一定水準，但酸薑(要主動問才有)可不可以用點較甜較好吃的，現在的太辣了，放進牛肉飯裡只是受苦。另一不確定的是是否外賣是細碗點的?最後很高興它取消了雙溫泉蛋早餐，因為這個早餐若外賣非常不環保，兩隻蛋分開兩個碗裝連蓋、湯(碗連蓋)，飯(碗連蓋)、飲品(杯連蓋及/或飯管、匙)、食具(小膠袋、筷子、紙巾、匙)及最後的膠袋，起碼15件用完即棄的東西。

麥當勞 - 冰雪新地

真係一路都沒有留意麥當奴原來很久之前就已經改了名做麥當勞，真真低調。講起低調，這次的冰雪新地優惠亦實在低調，相信很多人都沒有留意，在6月30日前所有冰雪新地每杯減$3，很底，但留意沒加雪糕的冰雪沒得減，優惠只在有外賣檔口仔的分店供應。  
講開冰雪，這個名字都不知道是誰改的，又是一次極度失敗的行銷名字，每次講也會覺得不好意思，不過講了也不會有人知你講什麼，包括在麥當勞入面做的職員(外賣檔口仔那個職員或除外)，這絕不是個別例子，因為曾試過問過起碼6、7間分店全部也是這樣，部份沒外賣檔仔的分店什至不知道麥當勞有這樣東西，更什的是有檔口仔的分店但在裡面櫃檯做的職員也不知道什麼是冰雪(講英文名稱Freeze只會更想死)，若講新地他們只會以為是下面是氣水那款，真真估不到今時今日麥當勞的推廣行銷會這麼失敗。

芝脆雞

之前很喜歡去這裡食炸雞，無它，雞大大件且又是即炸即食很香脆好味，覺得比家鄉雞要好太多了。但現在這店真的每下愈況，炸雞變了如家鄉雞一般的勁細雞塊，見到這麼小的極小春雞總有些不忍心吃下去，為何不可讓小雞們多活幾天呢?

另一點覺得可惜，就是服務真的差了很多，服務員很多都好像不太想做的。記得有一次買外買，收錢話為何不先打電話來落單(態度不算太好)，咁都ok啦，最多等耐點。俾完錢等了好久便問問，收銀入去查查話未得，看看張單後話起碼要等半個鐘，咁等啦，當時其實很少人，相信只得3、4張外賣單，點的亦只是一般炸雞薄餅啫但35分鐘都未有喎，我都識整薄餅的，焗十一、二分鐘之麻，計埋整都不用這麼久，便問下是否我聽唔到做好叫我呢?問收銀但佢做緊野唔得閒埋d客人喎，等了兩分鐘都重係無人得閒喎，終於廚房有個人見我等了咁耐出來看看，看完後話都係未有，不過這次佢就好好人，幾分鐘後就主動叫我過去拿。

今時今日咁樣唔得的了。

麥當奴咖哩漢堡及韓風辛辣雞腿包

估不到咖哩漢堡真的如之前網上所講外貌如爛屎一樣，更估不到韓風辛辣雞腿包真樣同相差咁遠。估不到今時今日麥當奴都搞成咁。

麥當奴分享拼盤

推出了一段時間的分享拼盤，只在晚上6時後供應。可能你會以為這是麥當奴第一次賣炸雞髀，其實不是，我也不知道第一次是在什麼時候，只記得去年初在大陸已食過，當時是十圓人仔一隻，頗細隻的。  
來到香港，雞髀一樣是這麼細隻，味就比大陸的淡了頗多，但其實仍然很濃味，感覺上有點像統一伊麵湯粉的那種味，肉炸得比較乾。一個人食太多肉太重味食唔晒，兩個人又唔夠食，一定還要加點什麼，所以其實都幾貴。

家鄉雞蜂蜜烤雞

"有無搞錯"，這是第一睇看到這個餐實物的感覺。在香港的家鄉雞，雞件的尺寸越來越細，雞鎚(雞髀下面一段)細到與其它食店的雞翼上面那個鎚已無大分別，實在太過份。至於味道，本身是可以的，但由於雞件實在太細，他們似乎沒有把烹煮時間相應地調短一點，肉頗乾。

老實講，當晚餐食會不夠飽，若再加點什麼其它食物肯定要5、6十圓，這個價錢，為何還要幫襯它?起碼另一間"芝脆雞"就沒有這問題。香港的家鄉雞，永遠只得雞髀及雞翼，現在還竟然細件成這樣，實在太過太過份，相信暫時不會再去。

榮式燒雞扒

又是一間相當有人氣的食店，價錢一般般都叫大眾化。雞扒是即製頗香口好吃，由於是壓著來煎所以是損失了部份肉汁，還好不是壓得太實尚可接受，唯最大問題是豉油真的是很一般的豉油，若可加點肉汁煮煮必定更加出色。
   
注意這裡說的是榮式燒雞扒，而不是彎仔軒尼詩道新潮裝修的餐式Wing'Simply Delicious，它是較高級的茶餐廳，供應食物款式全不同，味道亦不太好。

銅鑼灣 - 韓點

一間特許經營韓式快餐店。老實講，價錢不算平，因為份量不太多及飲品要另計，點了個韓式冷麵，單食這個女生可能仍能緊緊飽肚，男生就不成了。味道是可以的，汁是另外放在一個膠墫內要幾多自己加，汁都幾似韓國當地的味道，只是辣度減了，唯仍相當辣。最差的反而是賣相，紙碗把本身已經少的食物顯得更少，樣子這款已經算好看，看到旁邊所點的炸醬麵樣子頗赫人，只是不好意思拍別人的食物。看來這店真的要改善一下部份食物賣相，否則較難叫人試它的食物，更不好意思介紹人家去試它的食物。