旺角 - 牛一

去完屯門，又睇吓旺角分店如何。午市人氣明顯比較弱只得很少食客，但晚市就相當多人，這裡服務亦明顯比較差，但咁講又好係唔係好公道，因為當日香港的侍應才比較晦氣，另一新移呢民侍應態度很好，真估唔到。還有唔知點解似乎經常漏單，幾次向唔同侍應加牛肉每次(係每一次)等了十幾分鐘後都話漏單，食吓停吓非常唔過癮。  
牛肉同配菜質素同屯門分店差唔多，又係平價牛肉較一般同類火鍋店好但配料就差一級，配料無屯門分店咁多。見隔離枱點澳洲和牛，咁無理由拿架相機去影相所以無相架，只是澳洲和牛水準就明顯較一般未必及得上其它同類店舖。

屯門 - 牛一

一間市中心相當有人氣的日式火鍋店，價錢相對比其它類似的牛肉火鍋店是平點，當日只幫襯最基本最平的牛肉，不過佢的牛肉質素又真係比其它類似火鍋店好，所以亦難怪有咁多人幫襯。  
之不過湯底及其餘配料就真係再次一級，唔算得好但種類相對地多很多，菜疏種類亦經常轉但亦係次一級的質數，部份較老及重泥味。  
軟雪糕都唔錯幾好食不過幾甜，怕肥唔好食咁多。  
鐘意食牛肉的去這裡多食幾碟牛肉會覺得唔錯，否則唔必是最佳選擇。這裡的侍應相信很多都是新移民，但唔好以為服務會好差，其實佢地都好勤力為你服務的，只是員工少非常忙碌同習慣上有時做得比較似家庭式經營咁無咁客氣。 有時做得比較似家庭式經營咁無咁客氣。

灣仔 - 麵屋武藏

在銅鑼灣一帶有很多日式拉麵，食過好幾間出名嘅都確實唔錯，只是要搵個位肯定排隊排餐死。咁啱去到附近行去灣仔都唔遠，諗起這間未去過便去試試。睇吓餐牌都唔平，同其它出名拉麵基本上差不多價或是平一點點吧，而食品選擇就多些。點了叉燒白武骨同豚肉片黑武骨味道都幾好，湯很濃但味道比較雜，相對地確係比唔上其它有名的拉麵店，差咁啲嗰種好鮮嘅感覺。  
再點了份厚揚土佐豆腐，真係無乜特別，同一般上粉炸豆腐無大分別，點了醬油汁亦唔覺有幾好食，比較失敗。  
這裡位置較偏除飯市外人比較少，無"食完就好走啦"那種感覺，坐得較舒服，但卻缺少了那種想返去再食的感覺，或者試過就算了。

觀塘 - 囍

早幾日陪人去了觀塘碼頭附近買廿蚊條繼碼牛仔褲(主要得24-26吋腰圍，無得試同尺碼唔太準每款都要再讀尺)。之後想平平地食野就決定去這裡食火鍋，貪佢平得來水準唔差。  
60分鐘任食火鍋配料雖然唔算太多，但今時今日50蚊左右(未計加一)這個價都幾難起第二道搵到，同一般日式火鍋一樣有齊肉丸菜蔬等配料，肉丸品質算唔錯菜亦洗得夠乾淨，飲品就百士、生力Ice同紙包道地等，午市火鍋不供應雪糕及飯。  
湯底選了椰子，都幾有椰子味，不過入面唔係次次都有椰子肉同椰子粒。  
講返每人可選一碟的肉類，豬肉無乜特別，反而肥牛唔錯，不會太肥同多筋，而最好同最底食應該是雞因為真係講明有半隻雞，這個份量幾難起第二處搵到，不過入面其實無椰子，要椰子湯底點椰子湯就是了。雞相信是冰鮮唯處理得好只有很少雪味，不過略嫌斬得太細件比較多碎骨，熝菜時要小心碎骨。  
整體水準幾好，同外面近百蚊位的比這裡或者還要好些。不過這裡的醬料開得比較稀，亦沒有莞茜供應確是少少遺憾。另外當日供應的豆卜有很大"油益"味，同待應講了估唔到佢地完全唔處理，相信是供應商的問題用的萬年油"益"了，雖然唔會食壞人，但話晒豆卜都係平價野，退返畀供應商就得何必自己冒險，必要時棄掉亦不會有太大損失，話晒招牌最緊要。"油益"味同雪味重的肉一樣，放少少入鍋內成煲野好快都係嗰陳味唔駛食。

馬鞍山 - 三上日本料埋

本身全完沒想過去食日本野，只是咁啱同人行過見佢剛開章便入去試吓。睇睇個價錢講真都係比預期中貴，話晒唔係屋邨價而係較大型商場價，滿有期望的。

只隨意點了幾樣東西，先來的三文魚腩壽司、八瓜魚壽司及北寄貝壽司老實講句十非失望，皆因所用的魚生質數十分差，近似平價又做得唔多好那類日式放題貨色，壽司飯水準一般。之後的火炙三文魚腩壽司沒想過三文魚是全熟的，味道不過不失。而三文魚脆脆卷由於三文魚品質差，基本上都沒有什麼好食，入面的脆脆即炸粉算是不過不失。食食吓想起平價魚有機會是大連來的魚生，而有些平價食店更會用淡水的彩虹鱒充當三文魚，心驚驚更加唔想食，相信應該係自已諗多咗。  
最後的叉燒拉麵，噢No，塊叉燒做得似中式的叉燒多過日式的，麵相信是較一般的香港製麵舖出品，都可以啦，而湯底幾濃味及滑，幾好，係無咗半隻雞。整體亦算幾好。  
講真師父水準都可以，只是魚生級數唔多對路，唔多對得起個定價，唔改改真係死得。

旺角 - 盛八日式火鍋放題店

這店舖由新開到現在都幫襯了好幾次，期間都睇住佢越做越多不同優惠卷，無事先印定些就幫襯真係幾唔底。如果是普通肥牛任食，去這裡其實都未必好底，皆因除肥牛外其它火鍋配菜同甜品質數只是麻麻地，部份如三文魚刺身等亦只有晚市才供應，質數亦很一般，雪糕無估錯應是維記。  
去這裡食放題還是主攻飛驒牛才是正道，無錯係好貴，但牛肉確係靚，食多幾碟乜本都回返晒。之不過牛肉唔係次次都咁好食的，試過其中一次牛肉臊到完全食唔落，之後再叫兩碟都係咁。不過只是嗰次出事，另外去過幾次牛肉都是正常的。

銅鑼灣 - 一蘭拉麵

在銅鑼灣有很多有名的日式拉麵店，而這間肯定是近期的人氣皇，而且似乎亦只有佢是年中無休的。試過幾次晚上經過佢門人口，條人龍都長到不得了，咁啱這次平日下午，人留很少，唔駛等位可以直入，店入面的客人不多，可以周圍影吓相。  
這裡只提供一款拉麵，當然亦一如其它有名的拉麵店再按喜好挑選湯的濃度、麵硬度等各項。選了濃湯厚油及半份辣醬，由於要影相所以要硬麵咁快快手影完就變成普通硬度。

 厚油其實都唔係好油，而湯底確係幾鮮味又夠晒多，一如日本湯麵一樣偏鹹，叉燒又是很少，麵條都幾好。  
這裡的拉麵碗碗底有字食住，咪又飲埋d湯睇睇。唔駛覺得唔好意思喎，曾問過日本人佢地話係有日本人會咁做的。  
無論味道與價錢必定可與附近的豚王或魂可以比美，係選擇少點，而一風堂雖一樣好食但就略細碗了點，Jo就太油膩了。

深水埗 - 吉豚屋吉列豬扒專門店

碰啱這店試業第一天，見入面有幾個講日文的人，又有些供應商來祝賀，最重要是試業的幾天只提供了4款飯提供優惠均一價$50免加一，貪心一吓當然又是試試。  
之前都曾經講過同系的九龍灣分店，老實講句，當時的印象真係好麻麻，水準頂多叫做合格。這次又看看深水埗分店有否驚喜。這店店面較窄所以近外面背著廚房是一行的bar台位，點了吉列咖喱豬扒飯，另加$8(試業期間飲野仍要加一)點了杯巨蜂乳酸特飲。特飲的乳酸味無之前飲過的咁重而提子味比較出，飲起來比前正常了但仍只是一般唔算好好飲。  
到吉列咖喱豬扒飯出場，先試試塊豬扒，唔知係唔係開業唔衰得，塊豬扒勁好食喎，鬆軟得來很多肉汁，有些少肥膏但唔會油膩，肉的厚度都唔薄，反之炸粉及麵包糠只是薄薄一層，咬落去真係啖啖肉，做得非常非常之好。白飯食落去很有日本米的口感，雖不是珍珠米但仍頗彈牙香口，底讚。之不過有得必有失，個咖喱汁超鹹且杰了些，肯定是調較時出了錯或煮乾了水，食完成碟飯都撈唔到1/3的咖喱汁，味道亦是比較行貨似日式咖喱磚的味道。放旁邊的豬扒醬汁及芝麻醬汁就無改變，芝麻醬仍是比較行貨唔太香，豬扒醬汁濃得來梅子味其實又唔係咁能提高豬扒的鮮味(起碼與近似的日式炸豬扒店來作比較)。  
試業日期至8月30日，特價後真的超值，有興趣的快去試試。

馬鞍山 - 大阪王將

又是另一間在試業的日式食肆，雖然之前都幫襯過其它分店覺得水準很麻麻，但新屎坑當然又試試。

點了個豬骨湯底東坡肉拉麵，唔算大碗，麵條無乜特別，東坡肉比想像中肥及無咁入味，仍算不過不失，不過湯底就幾差，唔夠濃味之餘重幾味精感，之但係個醬蘿蔔就幾濃味，結果成碗湯就只得果種漬物的味道。老實講句價錢$72唔算平，係人食過相信都情願比多十幾廿蚊去那些有名的拉麵店食，只可惜馬鞍山區沒有那些拉麵店。  
蒜片牛肉定食同樣是$72，牛肉片算幾厚但不韌，但個汁相當甜而又估唔到落了咁多蒜片都無乜蒜頭味，應是用買回來已炸好的蒜片，個蘿蔔漬物又係頗甜，唔係好明點解近期很多不同的日式食肆的漬物都很甜，而個麵豉湯就真係得麵豉同鹹味，唔多覺有木魚味。  
最後加錢配的原味餃子，相片拍出來仍可以，只是實際樣子是煎得頗濃，除此之外其實幾好食，皮薄及算有汁，味道亦唔錯。不過見到有些人點的餃子賣相相當嚇人，燶到有點近乎黑色，燶到咁不是早應扔掉嗎?最奇怪是食客竟然唔投訴。  
老實講句，以這次的水準來講價格起碼要調低兩成才算是比較合理，希望這都只是試業的問題並能很快得到處理，否則都有點危。

旺角 - 大瀛喜

這裡的日式放題是在同價位中做得比較好的一間，特別是星期六日下午時段都只是百幾蚊一個人，相當底食，由佢初開章到而家自己都幫襯了很多次，都睇到佢有好多轉變。

這裡的刺身算是轉變得比較多的一環，之前有較多的裝飾物同大大隻船咁拿俾你，現在就無咁豪裝。一般普通的三文魚甜蝦等都有，當然唔好預期會用好優質的材料，只是"都算新鮮"，由於量大三文魚就唔會去清啡色部份。不過自從曾經有一次見佢地點樣處理三文魚後都係少食為妙，由於要大量處理三文魚，果次見過佢地將幾大盆三文魚柳放在櫃枱上切，自己進餐的個多小時內三文魚都沒有放在雪櫃內。

這裡的手卷尺寸比較小，一口一個，勝在有海膽手卷。而壽同味道就麻麻地。

串燒燒烤等做得幾好，醬汁美道都唔錯，幫襯幾次的水準當然都會有較好食或無咁好食，都要睇邊個師父做出來，不過水準算是幾平勻。蟹粥等算可以，鍋物等要看鍋底，有些如一些日色料理般非常甜。

天婦羅較一般但都唔怪得佢地，因為好的天婦羅個粉漿要用冰水開且即開即用，咁炸出來個粉漿才會散開，既然一般香港食店的天婦羅都做唔到這些任食店當然無辦法做到。

甜品是做得比較差的一環，食唔食都無乜所謂。

其實這裡食物的選擇很多，一定過百款，只是年紀大食唔落咁多，分幾次食都試唔晒。食物質數是比最初開業時稍稍差了點，不過在同類同價錢中仍是最好的其中一間，自覺味道起碼比另一間吉壽做得好，坐亦坐得較舒服。