馬鞍山 Cha & Cha

這次只是去幫襯下午茶，睇餐牌選擇都幾多但價錢有點貴。最估唔到吉列豬扒沙律碟頭會細成咁，豬扒都唔叫大件，沙律重要係放起個裝醬汁嘅細兜入面可想而知有幾少。味道方面沙律是熱帶什果罐頭做，而豬扒雖然塊肉唔太厚但粉都唔算厚，算幾好食。  
另一碟豬扒飯就一舨茶餐廳水準，反而幾大碟。  
茶無乜特別，較一般貨式。  
整體味道都可以，但眼見下午茶碟頭普偏相當細，價錢明顯稍稍偏貴唔太值。

大圍 - 三洋餐廳

去到大圍真係無乜太多野好食，一來貴二來選擇亦少，畀咗錢都唔一定等於食得好。諗住求其食個下午茶餐，見呢間餐廳都幾多人，真係所謂希望越大失望越大，都真係幾難食，豬扒炒意豬扒雖好乾鹹鹹地還算可以，意粉就唔好題，咬落很爛，另外那碟唔講都可能都唔知係星米，很濕又無乜咖喱味，亦好在無乜咖喱味因為咖喱一點也不好食。奶茶亦只是一般，重要唔熱只得少少暖暖地，無乜可以再講。

馬鞍山 - 嚐味

睇到個名相信都估到係味皇集團的公司，話晒味皇的海南雞飯都唔差，又試試這裡的如何。首先賣相都幾果其，菜沙律菜唔算好新鮮，不過它與大豆芽的味道都算可以的。這裡的去骨海南雞亦是只提供泰式醬，沒有泰國食肆咁辣及咁多青檸味，都可以的，雞肉仍有微暖都算嫩滑，飯唔太油亦唔太香口。講了這麼久見到咁多"都"字都估到整體是合格但唔算出色，比起正常味皇水準是有點差距。

馬鞍山 - 食德棧

在馬鞍山唔想在大商場內搵食，在商場外圍找了這間店試吓它的乾炒牛河。主角出場，炒功相當唔錯喎，河粉有煎香後才炒，拿到來時非常夠鑊氣，牛肉亦是剛剛熟。比較可惜的是油多了少少，另外河粉較碎，最最可惜是店舖所用醬油太差，無豆香味無醬油鮮味。  
檸茶無乜太特別，茶麻麻地，杯茶唔大而檸片相對頗多所以"督"多幾吓會好酸。  
不知有多少間食店都是敗在使用差劣醬料手上，有時食店為了省那一個幾毫醬料錢導致食物差了少了人幫襯真係得不償失，這裡的牛河由於唔係好大碟計起上來價錢都不算便宜，下午茶餐加杯野飲都要四十幾蚊應有能力用較好的豉油，否則只白白浪費了不錯的炒功。

西環 - 大頭蝦餐廳

很簡單的下午茶餐，價錢屬一般唔算貴，食物中規中舉唔算話真係好好，但在這個價位這類餐廳中亦以是做得較好的了。香茅豬扒飯一如其它店舖一樣唔多覺香茅味，醬油亦與預期中的香蔥油有些分別唯整體都叫好食。香茅雞翼河就十分行貨，除了幾大碗外無乜特別。奶茶算幾好較接近一般茶餐廳質數，但唔多夠熱熱些更好。  

元朗 - 貳郎燒雞扒

這間店去年中曾經幫襯過一次，那次叫了炒粉麵及湯麵之類的東西真係炒得好差好難食，只得豬扒包叫做食得吓。這次再去食早餐食物質素明顯比前好，招牌的雞扒確是幾好味，似乎是即做的，雞皮雖然唔可以話係脆但唔係好油，雞肉亦不會"乾爭爭"，這點明顯比有名的榮式雞扒好，唔錯唔錯，係細塊咗啲。  
至於湯公仔麵，睇樣都知唔應該有任何祈望。檸茶亦只是一般貨色。  
至於加錢選的半份多士估佢唔到又做得好好喎，麵包夠厚烘得亦剛剛好，唔知係唔係人少關係注意麵包是切完才烘所以切口邊也有烘到。

光輝圍 - 759茶餐廳

這次算是有少少特登去這裡食野，看看雷聲咁大的759茶餐廳如何。在門人有價目表列出所有供應食物，奈何有約一半是指定時間供應，不過有很多茶餐廳都係咁。至於價錢，散叫在同區來講係貴，無它，這區租金算平，食客以工廠寫字樓為主所以一般價錢都要平，三、四十蚊連飲品的套餐一街都係。而這裡午餐三、四十蚊算是合理。  
點了鐵板蒜茸羊架拼司華力腸意粉及焗牛扒煙肉飯，奶茶及檸茶。無錯茶餐廳是咁畸形先上咖啡茶，奶茶算不過不失茶餐廳水準，唔係特別香滑但都可以的。檸茶就得啖笑，淡到有點似檸水，就好似你飲了大半杯但又想飲多杯喎，於是就倒杯熱水入去倒滿再飲過咁，而且只是微暖，難飲極。  
例湯中湯唔知是什麼湯只見到有隻雞腳，湯的味道就好似你將任何處理食物時剩下的東西全掉入去煲，咪即係餿水咁味，唔講都估到唔好飲。  
而西湯姐姐話係羅宋湯，由於無肉所以其實應該係雜菜湯至啱。湯內有很多雜菜，味道可以的只是略欠鮮味，最簡單改善方法咪加些雞粉入去，否則要維持素食略加多一點糖都可。  
主菜終於出場，鐵板好熱汁的味道幾好，兩隻羊架的肉都唔係好完整唔知點解，無乜羶味，意粉有很輕微的爛應是煮時水溫唔夠但仍好過好多茶餐廳。  
焗牛扒飯味道亦唔錯，上面加了芝士焗得夠燶算是Bonus，令香氣及味道加分不少，米飯亦唔錯，或是用返自家入口米所以唔駛用最平的米，最大問題是牛扒加得太多鬆肉粉所以無乜咬口。  
兩份主菜以價錢論是幾好味但就有同一問題略偏鹹了些，記得鐵板會極速揮發水份個汁略淡會較好，而一般芝士或煙肉因有鹹味加親個汁亦都要減鹽。

同場發生了小插曲，遠處有人投訴但內容聽得唔清楚，估計是第二枱客點的同一食物兩次送錯去佢張枱，佢好'興'又驚人計佢錢。當時兩個餐廳話事人處理得很好不停賠罪而沒有在任何客人面前講過任何其它說話，反而部份食客同伙記不停地在遠處講駛唔駛咁緊張。點解拿出來講?第一係無論如何食店都是真的犯了錯，不會因為小事就唔係，第二同客人理論或俾說話佢聽是極蠢的，所以就算在該客人面前，或在客人離開後在其它客人面前亦不應評論任何客人的行為或問題。最後一點是很多食肆都會犯，暫時未見過有任何一間能正確處理，就係食物離開了任何店員的監管後那怕只有一秒鐘，該食物都要扔掉不可再拿給其它客人，因為你不會知道其間發生過什麼事，拿錯枱就應是直接損失。

講一個真實個案，有次去食魚蛋粉，同枱有個呀伯可能怕熱所以食麵時將自己飲開杯茶倒點落自己碗麵道整凍點才食，其實有很多戴假牙的人都怕食很熱的東西。咁佢食完一碗再叫多一碗，點知個伙記拿錯隔離枱碗麵給他他直覺便馬上倒茶入麵內，之後又馬上發現唔係佢要的野就同伙記講，伙記二話不說將佢碗麵拿過隔離枱，前後只是幾秒間發生的事。

佐敦 - 澳洲牛奶公司

曾幾何時都幾喜歡去這裡食茶餐，貪佢價錢幾平且炒蛋幾好食，那個年代都以經多人但總唔會搵唔到位。時至今日行過門口經常見一大行自由行及本地人在排隊等位，唔想花時間所以已很多年沒有再幫襯，這次咁啱唔駛等便又睇吓點。

首先見到的是比以前坐得很迫的座位坐得更迫，每張枱都不知加了幾多個位，客人的東西又多。第二服務更差，想問伙記多一句都唔得，因為佢地實在太忙亦非常唔願意理你。先叫一個燉鮮奶，唔多掂喎，唔知蛋白太少定燉得唔多夠有少少唔"擎"，失敗，希望只是一時失手。這東西並非如一般人所想其實極易做，自已做只要用鮮奶完全取代開水就得，一隻蛋白加砂糖打勻，加砂糖入去打因為砂糖可以幫手磨爛蛋白之後唔駛過篩，開一盒新牛奶，由於牛奶消毒時的消毒方法已等於開水煑滾再降溫，所以可直接用很方便，凍熱都沒關係，一隻蛋約可開一碗至一碗半奶，要看蛋大細及想要實定軟，你無睇錯用奶代替水只要落很少雞蛋。加奶後輕攪就可有少少不溶的蛋白不影響因白色不太覺眼，只要不太多泡就可。用保鮮紙包碗面防倒汗水，放入電池爐，水浸至碗身一半，用凍水熱水都可電池爐熱得快沒關係，90度水滾後15分鐘就可。若無電池爐就可用鑊加預熱熱水至包好的碗碗底，中細火15分鐘。這樣做全無難度且還可在碗底加料，如豆沙及蓮蓉等(放入後要輕輕攪一攪或按鬆點)。  
講返主角炒蛋都幾滑，多士仍然幾厚身，把蛋加在上面一起吃很好吃。叉燒湯意粉都OK，湯算濃，叉燒就幾麻麻地，好多意粉好大碗。一張枱咁多人坐東西根本放唔落，伙記要如相片咁樣放野都算係香港特色。  
奶茶本應幾好飲，不過衰唔熱，只有少少暖暖地又是失敗。

屯門 - 羅麥記

近來的懷舊茶餐廳真係越開越多，這間亦唔例外，分店也越來越多，這次試吓V-City入面的一間。  
餐牌有點像以前的手冊，不過想真點以前的手冊邊有咁闊，大細反而似後面有九因歌那種簿。自己幾喜歡飛行棋棋盤的餐紙，不過這飛行棋棋盤也著實抄得過份地一樣，只入面的文字改了。  
講返食物，點了乳鴿仔，又估唔到幾香口幾好食。而蝦多士不是好好食但都合格，主要是上面釀的料薄了點，以佢收的價錢厚返多多都唔會有難度。  
豬羅包兩食即係豬扒包兩食，味道基本上只是一般。豬扒唔係特別野味又唔係好特別，兩食的分別只是一邊多了點酸菜另一邊是齋豬扒，裡面沒有醬汁配料亦少所以真心講句其實唔好食不過都係積返點口德話佢味道一般算了。  
磚頭豬扒包是估唔到咁大份，成磅麵包挖空後放飯及豬扒，汁唔夠任加且不限味道，雖然汁的味道幾麻麻但麵包返焗過很香點咩汁都好食，唔錯唔錯。分量很大，要食清相信三個人至搞得佢掂。  
最後(其實應說最先因茶其實是最先來)，茶都唔錯，奶茶幾濃滑幾香，不過就唔夠熱只是暖暖地略熱，可惜可惜。

香港仔 - 新昌發

入到去香港仔只想食點較簡單的東西，便去了這裡食碗粉。今時今日香港仔都唔多算係旅遊區，反正自由行唔去就唔似旅遊區，這些較老的食店人情味亦比較濃，部份食客門都有各自打招呼，隨了酒樓外算是比較少見了。  
先來一杯茶，都有茶餐廳應有的水準，再來的牛腩麵，估唔到會俾咁多湯，湯的味道算可以，只是頗味精，牛腩味道不過不失，牛腩不只照片中影到咁少的，只是湯多有一半牛腩沉了在湯入面見唔到，麵本身的質數一般而煮的時間幾好沒有過淋。 另外一碗魚蛋粉魚蛋都幾好食幾爽口，唔知係唔係買回來的，除些之外味道亦正正常常沒什特別。  
不知從何開始香港人便鐘情於食清湯腩，清湯腩除了油少之外自己覺得味道總不及柱侯牛腩，只是好的濃湯柱侯牛腩真的買少見少，莫非吓吓都要自己落手做。

大埔 - 一樂燒臘飯店

這家店真係幾奇怪，點樣奇怪?最近幫襯了兩次，第一次非常好食，第二次就只是一般，單看食物風格及水準的分別真的不敢相信是來自同一食店。  
先看看第一次，店家燒了頗多燒鵝在店內放涼，單看樣子相當吸引。點了半隻燒鵝，肉質很嫩滑多汁，肉亦醃得有味道，明顯比中環的一樂好食很多，若要彈的應是醃肉味道仍可再好一點。一起點的齋瀨亦可以，湯底都算可以。  
同場加影燒肉飯，燒肉又是做得相當好，用的肉雖然唔係好的腩肉，做出來的燒肉卻很淋滑好味唔"鞋口"，只是皮比較厚及只有一點點脆，唯已比大部份燒肉做得好。  
講完天便講吓地，由於覺得好食所以很快又再去幫襯，點知這次希望大失望卻更大。一開始想點的燒肉及燒排骨沒供應，於是點了燒鵝胸飯，這次的燒鵝燒得比較燶，而肉質是死死實實的，像一般街市燒臘檔死死實實的那些，味道跟上次本應差唔多但因幾乾無肉汁所以便差了，只能算是一般般。  
再來叉燒飯，更加失望，又係死死實實的，而且不但唔夠味重乾曾曾，外面上糖亦上得唔夠，如果講唔好食又過份咗一點，或者用只是一般貨色來形容更好。  
最後的多寶飯以滷水為主，有兩件雞幾片紅腸，半隻鹹蛋加幾多的鵝翼。紅腸就唔多好食，鼓油雞幾好味不過太少了，鵝翼比想像中淋好易咬，滷水味像唔錯做得幾好。  
最後又係那句唔知佢想點，兩次的燒臘明顯是出自不同師父，是原有師父放假嗎?還是第二次的學師仔未滿師?