深水埗 - 祥興記上海生煎包

這店新開，門口招牌仍蓋著紅紙在試業中，己急不及待入去試試。由於試業，只提供幾款食物，但由於只喜歡食佢嘅招牌生煎包，其它食物無大興趣，所以對自己影響不大。  
可能在深水埗暫時不算太多人認識，所以買煎包的人不算多，反而比較多人試佢嘅餛飩或粉絲湯。生煎包一樣係28元4隻，只是食落相當失望，可能始終是試業好多野未掌握得到，味道雖然都算唔錯但以祥興記的水準來講完全不合格，餡料隻隻份量唔同以夠死，其中三隻重要嚴重偏少，最少一隻餡料無咗近三分一，唔好以為影響細，結果係3隻包全部湯汁都很少，得最多餡那隻合格。亦由於餡料少，包的收口位變相厚了，加上試業時煎包賣得慢，舖頭又唔敢一吓子大火煎夠個包反而等個包在最後階段起個煱內慢慢烘，結果係煎得唔夠乾身香脆，收口那舊粉脆得來韌韌地，有點失望。請比較一下在尖沙咀分店拍的照片，可以見到無論湯汁及底部煎香的部份都有很明顯分別。  
希望在正式營業前能把問題改善好。

尖沙咀 - 祥興記上海生煎包

這其實是早些時候幫襯的，而家應該改了用紙盒裝而唔係用膠盒，只是之後講開深水埗分店便順便睇睇個比較。分店可能由於舖位比較細，所以設計上是做外賣而無堂食的，當然門口外有幾個類似加出來非正式的坐位，只是同你坐係街食無大分別。價錢都係佢自己的標準價而沒有因為在尖沙咀而賣貴點。  
睇返生煎包，總維持水準，多湯汁之餘帶點醬油鮮味，包的收口位放在下面煎煎得幾香脆，相當好食。而黑松露生煎包反而無乜特別，只是在標準的湯包內放入少少黑松露醬，黑松露醬都係標準嗰隻味道，無話好特別，但唔知係咪因為黑松露醬佔據了部份湯包內空間，結果是湯汁明顯少了很多，較為可借，相信生蝦生煎包問題會更嚴峻。還是還原基本步食返原味更佳。

沙田 - 靠得住粥麵小館

由於很少出街食粥是覺得好食，包括很多有名的粥店都係咁話，因為九成九以上的人煲粥，包括很多店舖都係唔知自己做緊乜，方法有點問題。唔好見到煲粥就以為粥係就咁煲出來，即係唔好見到燉蛋就以為碗蛋係燉出來一樣，明明同蒸水蛋無分別，中式野係咁，無得照字面解，只是很多人唔了解，你諗吓以前農村用柴火瓦煲點可能用死煲爛煲的方式煲到廣東粥出來又唔燶就可能會明白唔係咁整。因為唔係三言兩語講得到，下次有機會再講點樣煲廣東粥。

這次主要睇睇這店出名的雲吞麵。麵條的確係幾爽口彈牙，仍有些少鹹水味但唔算重。湯底只是麻麻地，大地魚味唔太夠同唔夠鮮。雲吞細粒得來水準及味道只一般，改做牛筋腩後亦只是普普通通。就係咁多，淨食齋麵夠了。這裡要收茶錢不過蘋果茶算幾好飲。

油麻地 - 功夫點心

沒有影太多相，反正無太多野好講，點心水準整體只算是不過不失，部份什至唔係太好食，只是在幾家分店中唔係最差的一間，自己覺得起碼比深水埗分店做得好。以價錢及水準論是有點偏貴。

海洋公園 - Bayview Restaurant 及 大態貓餐廳

好多香港人都知道去海洋公園可以去旅行社等地方買入場票可以平些，但就極少人知道其實除了入場票之外中旅社還可以買埋餐卷，連入場卷一齊買只要加多$75，如長者或生日可免費入場獨立買餐卷就$95，之後可以起山頂嘅Bayview Restaurant或山下嘅大態貓餐廳食野(以前有三間可選而家得兩間)，一碟主菜加一杯12oz汽水，但留意就算本身選套餐包Haagen Daz雪糕但用餐卷是不包雪糕的，咁就唔駛自己帶野入公園食或帶咁多野入公園飲，冬天隨時可以兩手揈揈入塲舒舒服服。塲內飲品一點都唔平，相對買餐卷都幾抵。但就要留意就算中旅社職員都未必知原來自己公司有餐卷賣，可能要叫佢地去電腦查清楚，還有出年海洋公園加價，餐卷亦可能會加價，要問清楚。  
先睇睇Bayview Restaurant，剛好在山頂吊車站下面，窗外有超級無敵靚景培你食飯，位就當然要先到先得，由於國內同胞一般比較早食飯，十二點鬆點好去到，咁好大機會可以直入，否則唔好話窗口位，等位隨時都要成個鐘。  
餐廳是自助形式，自己拿完食物排隊去收銀處畀錢。餐廳提供基本套餐包主菜、汽水加雪糕約收185蚊左右，按主菜種類有廿蚊咁上下上落，要加餐湯等就再另收費，剩要主菜當然都得，只係唔好諗住好平。比較早兩年套餐約145-165蚊明顯貴了很多，而且碟頭細了，食物級數亦跌晒watt。以前可能要照顧國內同胞一碟飯兩個唔大食的人分來食勉強夠，而家三個人分兩碟比較好，之前較似三星級酒店餐廳菜色但而家較似高檔茶餐廳菜色，好似當日選的牛腩飯，另外還有意粉或公司治等。味道可以但唔好太高要求，以主題公園內的餐廳來講算好食的了。  
再試試山下的大態貓餐廳，基本上是題供中式燒味飯、麵、粥，套餐約145蚊左右包一碟燒味飯、Haagen Daz雪糕汽水及一支細樽裝水(本身餐牌無話套餐有汽水同雪糕亦無寫價錢有點亂)，用餐卷來換就只有燒味飯同汽水，相對來講直接買套餐都所差無幾，環境亦較差，明顯無山頂間咁底。燒味味道是正常酒樓的味道，相信是外面公場交來的，燒味份量以雙拼碟頭飯來講是多的了。  
兩間餐廳都似乎唔太介意你地分一碟飯來吃，或拿外面買的飲品在餐廳內飲，咁當然唔好太過份啦，唔好要人難做麻。還有一些題外話，見當日很多大陸團張餐卷是包雪糕的，但佢地或者拍凍都無要(哎呀畀我呀嗎)。

荃灣 - 釣魚翁

講完馬鞍山釣魚翁，又睇睇荃灣的釣魚翁。估佢唔到無論早茶定下午茶都相當旺場，比旁邊的明苑明顯旺很多，其實係早一個星期飲完早茶覺得點心幾好食之後再去下午茶，這裡早茶有相當多的國內人事幫襯，或許是這樣把價錢推高了吧，價錢明顯較貴，而且星期六日下午茶除特價點心紙所寫點心外無得平，所以都唔駛太刻意等下午茶時段才去幫襯，反正唔平得好多。

講真腸粉係幾好食，不過砌返埋其實得兩條。藥膳豬腳仔算係比較少見，幾爽口，味道唔錯係差咁些當歸味。牛栢葉亦好，不過下面好多白蘿蔔。糯米飯是出奇的少臘味，但又出奇地重臘味味，最外層糯米很濕很爛而中間正常，可能做好後冰過再拿出來放涼，中央公場出品?鯪魚球算係最平嘅點心，都做得幾好，比馬鞍山店再好味一點。

馬鞍山 - 釣魚翁

記得最初幫襯北斗翁是iSquare尖沙咀分店，當時是走頗高級路線，到現在分店多了部份分店價錢較為平但其實仍是有點貴，這次幫襯的馬鞍山分店就是其中一間。這店由開幕都數個月前都去過幾次但無一次是覺得滿意的，這次又睇吓點。

先看看點心，點心是比之前改善了，之前的點心味道其實和一般屋邨酒樓沒大分別，咁多人去只是附近無乜高檔酒樓，最近的稻坊只是更加垃圾除非你想貼錢買氣受，就算自己迎海商場亦無乜似樣嘅野食，難怪人地話馬鞍山係美食嘅沙漠，這帶更是沙漠中的沙漠。這次再去點已經比較貼近集團其它酒樓的水準，算係唔錯對得起個價錢，比較其怪的係特價食物(主要是滷味類)比前多了，而且係好平好平嗰隻。  
這店的燒味做得幾好食，特別是之前的乳豬四寶飯只係賣48蚊真係又平又好食，不過今個月48蚊已經改了做乳豬鹽焗雞飯，咁啱當日無乳豬，只好睇睇之前的四寶飯懷念一吓。那堆飯不是一飯碗而是一湯碗，成碟飯做得人地一碟半有多，兩個人如果唔大食凈食佢都夠晒。  
特價$13.8的鹽焗雞瀨算係幾平，雖然話係鹽焗雞，其實係加了醬油來浸的鹽水雞，味道亦介符兩者之間，無雪味，比較奇怪是帶有少少花香味，但就講唔出是什麼花。而更平的還有$23.8半隻口水雞，都係嗰隻鹽水雞，但倒了麻辣辣油在上面，都相當辣，其實面頭唔放花生放蒜蓉更好。  
這裡服務算唔錯，星期六日下午茶時段唔計特價野點心平兩蚊，都可以試試。

尖沙咀 - 頂好海鮮酒家

細個嘅時候去街間中都會經過佢門口，無錯只係經過，嗰時要出街食飯都唔容易更何況去尖沙咀。當然今時今日出尖沙咀食野以經好平常，這間落地牢的酒家價錢仍算有點貴，不過和美心集團那些也只是差不多價。

講真點心唔算好特別，流沙包係好流心味道都可以，但咬開個包明顯見到饀料規側埋一邊，包功唔多掂。其它點心味道屬預期之內，合格但無乜特別。反而想介紹吓佢嘅炸魷魚鬚較為特別(但近排無賣可能有季節性)，外面的不是炸粉而是芋泥，食落好似芋角咁好重芋頭味，喜唔喜歡就要看你喜唔喜歡吃芋頭。  
最後當然點了蟹粉小籠包，一個一籠，個包同灌湯餃差唔多大，噢其中一個未夾頂部已穿了個小孔，好在小心點都夾得起。皮好薄放起道都有點透光，非常之多湯汁，只是蟹粉多得來無太多蟹鮮味而只得高湯味有點可惜，不過講真香港已很難食到好有蟹味的小籠包，重有幾多間食店會自己拆蟹肉，大部份都係用拆好嘅急凍貨，咁人地又會唔會用靚蟹來拆肉急凍呢。

馬鞍山 - 盈福28

路過見到這店剛剛在試業，門口又有優惠券，咪又入去試吓。睇餐牌應該想做些比較新派的菜色，特別是包點，價錢是比想像中貴。

先來的沙薑豬手，碟頭比想像中大，豬手雖已不錯但沒想像中彈牙，起碼比附近的上海姥姥差點。味道方面有點不似預期，雖然新鮮沙薑落得已唔少，但蒜蓉著實多，有點變了蒜蓉豬手。  
奶黃蜜語其實是流心奶黃包，但味道又係有點不似預期，奶黃味道比較似吉士味多過奶黃味，由於賣得算貴以價錢論包有點發得唔夠鬆，吉士流心濃味得來始終無傳統奶黃咁香口，味道雖合格但唔算好出色。  
雲吞擔擔麵味道又係有點不似預期，味道與其說是擔擔麵不如說是四川麻辣麵與擔擔麵的混合體。Oh No，當日的雲吞入面的蝦未煮熟。唔計蝦只得一半熟，整體味道不過不失。  
蟹粉鍋粑是用優惠券送的，鍋粑是有一點點唔夠鬆化，可能是米粒本身較細的問題或炸得唔太平均。蟹粉入面都幾多蟹肉，不過個汁用了南瓜蓉來開，南瓜味太重差不多完全把蟹肉味蓋過，而且南瓜蓉有另一個問題，就係放涼了後會"擎"到變成膏狀。這道菜味道算可以但整體改做其實失敗。  
最後的脆皮牛魔點醬其實是炸牛腩點黃咖哩，牛腩幾淋但再淋多一點點更好，肉較"鞋"，上的脆粉是正想的酥炸脆漿，咖哩汁亦是正常的餐廳咖哩汁。這碟菜其實是將咖喱牛腩分開來上枱，創意唔錯效果亦幾好。  
見到別人點的包點只是在包上蓋些得意公仔，亦唔係想像中咁出色。可能是新派菜關係好多味道都不似預期，但當然唔係話佢唔好食。可能是試業關係味道平衡暫做得唔太好，這亦是一般廚師在剛轉了用慣的醬料牌子後有機會遇到的問題，希望在正式開業時可以正常返。雖然價錢有點貴，但由於碟頭比較大(不計包點)，計返上來其實都差唔多唔算貴。味道唔算偏鹹但偏向濃及杰，食完會幾飽同幾"濟"。當日待應服務態度相當好。

元朗 - 深仔記

這是自己最喜歡去吃雲吞麵的其中一間店鋪，麵條及雲吞雖唔錯，麵雖未至於最好但都幾彈牙唔太重鹼水味，亦煮得好放底時麵條緊緊唔熟，但這都不是去吃的原因，原因在於雲吞湯底。記住麵條只得少於一分鐘黃金時間去食。自己的畸形食法是待應一放底後先飲啖湯讓麵稍吸一吓湯，用筷子成個麵夾起用口吹幾下吹散熱氣後才放回湯裡狼吞虎嚥。好的麵湯除了味道外溫度掌握亦十分重要，微燙不太熱既保留鮮味亦可稍延遲把麵條浸淋的時間，同時亦決定了你一口可喝下多少湯汁感受到何種味道。  
這裡的大地魚湯頗濃及鮮甜，大地魚味不會太搶。唯遺憾是湯的味道有時幾漂忽，唔係次次都咁鮮甜，有時會幾淡味吓，較保險是平日較少人幫襯時才好去，這亦只是較保險而非保證的方法，但起碼麵一煮好就可馬上放到你面前。

禾輋 - 龍悅

這次主要係幫襯佢個阿拉斯加蟹宴，因為有人極力推薦話好底同好食。又睇睇點。

單睇菜單確係幾底，只是一行人唔夠十二個有點擔心食唔晒。  
唔續樣講了反正做得幾好，味道唔錯合格有餘，碟頭亦比想像中大。香妃雞是一般正常酒樓鹽水雞，或加了很小酒或味去浸(因要去臊味)。阿拉斯加蟹話是活蟹清蒸，中蟹尺寸，鮮味及肉質比急凍好但就唔係十分明顯，隻蟹很多膏及白膏。  
魚做得好滑只是斑球炒得有點輕微過熟，今時今日因安全至上絶對收貨，而蒸的頭腩就蒸得剛剛好亦好好味，不過魚肉起得很乾淨所以無乜肉食。  
冬茸海鮮燴燕窩都好味，只是與其它菜拍埋一齊略略有點失色感覺無咁高檔，因為冬瓜茸幾多而燕窩唔多覺。  
鮮雜果花姿丸其實無雜果，是簡簡單單的炸蝦丸入面溝咗些花姿粒入去，熱辣辣時食超熱氣但亦很好食，正。  
飯及麵基本上無食過，因為飽到真係無能為力。紅豆沙本應都OK的，但唔知點解很苦，入面唔見有連子，而算無去連子芯亦未至於有咁苦，雖然係近似的苦味，真唔知點解。  
雖然唔講得好好食但已相當唔錯，睇埋價錢亦唔算貴，由於菜色較接近擺酒時的菜色，當扣返隻蟹都近成千蚊，二千蚊全包計外面未必食到其它菜色，碟頭亦大若唔太大食十四個人食都夠食。