觀塘 - 囍

早幾日陪人去了觀塘碼頭附近買廿蚊條繼碼牛仔褲(主要得24-26吋腰圍，無得試同尺碼唔太準每款都要再讀尺)。之後想平平地食野就決定去這裡食火鍋，貪佢平得來水準唔差。  
60分鐘任食火鍋配料雖然唔算太多，但今時今日50蚊左右(未計加一)這個價都幾難起第二道搵到，同一般日式火鍋一樣有齊肉丸菜蔬等配料，肉丸品質算唔錯菜亦洗得夠乾淨，飲品就百士、生力Ice同紙包道地等，午市火鍋不供應雪糕及飯。  
湯底選了椰子，都幾有椰子味，不過入面唔係次次都有椰子肉同椰子粒。  
講返每人可選一碟的肉類，豬肉無乜特別，反而肥牛唔錯，不會太肥同多筋，而最好同最底食應該是雞因為真係講明有半隻雞，這個份量幾難起第二處搵到，不過入面其實無椰子，要椰子湯底點椰子湯就是了。雞相信是冰鮮唯處理得好只有很少雪味，不過略嫌斬得太細件比較多碎骨，熝菜時要小心碎骨。  
整體水準幾好，同外面近百蚊位的比這裡或者還要好些。不過這裡的醬料開得比較稀，亦沒有莞茜供應確是少少遺憾。另外當日供應的豆卜有很大"油益"味，同待應講了估唔到佢地完全唔處理，相信是供應商的問題用的萬年油"益"了，雖然唔會食壞人，但話晒豆卜都係平價野，退返畀供應商就得何必自己冒險，必要時棄掉亦不會有太大損失，話晒招牌最緊要。"油益"味同雪味重的肉一樣，放少少入鍋內成煲野好快都係嗰陳味唔駛食。

自製果醬

早幾日星期日無意之中睇了一集大台嘅咩咩補習班教人整果醬，雖然話係細路仔節目，但係都唔好"亂咁嗡 當秘笈呀"亂咁來，跟佢咁做不如出去買樽來食好過。

自己整果醬很易，亦當然唔想落化學野。部份水果如士多啤梨或菠蘿等因果膠很少，所以一般都會加檸檬這類含大量果膠的水果，且亦能增味。如本身多果膠的水果就不用加檸檬，不清楚某類水果果膠多不多，上網查一吓便可，否則多加點檸檬亦無防。外面賣的果醬一般就直接加果膠或其它類似物品。

先要準備三至四個果醬樽，多準備一些好過到時唔夠樽用，因為水份及果膠每次不同，一時未做好都唔知會做到幾多。何謂果醬樽?就是玻璃樽身，鐵蓋入面底部有一圈橡膠用來壓著玻璃瓶口的，若唔清隨便拿任何一瓶醬料的樽來看就會明。唔好睇少這種瓶，消毒後果醬能放多久全看它。

士多啤李約兩至三磅，洗浄後開邊，因為果皮不很透水，不開邊的話要多煮幾倍時間，隨時一個鐘都未得搞掂。檸檬一個，若想慳錢多做點果醬，加多個檸檬亦得，當然會酸點及無咁濃士多啤李味，但自已做士多啤李用得多酸點也會好食。檸檬皮可自行決定是否也加點，若加就記得將入面白色內皮全去掉。

沙糖約一碗半(飯碗)，雖然可根據喜好減少糖份減甜，但由於不像外面賣的加了防腐濟，做好的果醬開蓋後是靠糖份來保存，所以不要減太多，情願每次食少點來減糖。  
用較大的煲或鑊水份會揮發得快一點，糖水滾起後氣泡很多難破，若用煲要選高身的，若平底鑊要小心點特別後期要收細一點火防止滾出。將士多啤李、糖及檸檬汁倒入煲內攪均，若有時間可放半個至一個小時，等部份士多啤李的水份給糖抽出之後就唔駛煮咁耐，否則可直接開火煮。火要猛些讓水份蒸發，後期差不多好時要收細些唔好煮燶。正常士多啤李開邊水份多帶皮出水慢煮半個小時走唔甩(除非真係好大火或切細粒點可加速)，全去皮水份唔太多的水果10-15分鐘可能已成。一直煮到煲邊果醬旁有一層膠狀物就差不多，若初做不肯定可先收細火，滴一滴落冰塊面(或隔著匙放冰面都可)，用手攪一吓看看會否變杰身(像平時煮餸鈎了稀芡的汁就可，凍了會杰很多)，會就可以熄火並馬上把果醬倒入果醬樽，盡量滿一點這對之後消毒保存防腐有幫助。  
自己做出好的果醬由於水份少糖份高，正常放雪櫃一兩星期食完沒問題。若想存放更久便要進行殺菌消毒，做得好的話未開蓋前放雪櫃一兩年什至更久是沒問題。將還很熱入了果醬的樽放入滾水內(樽口向上)，水位約浸到樽的一半左右，高點更好但唔好畀滾水走入樽口，一般大小的樽大火滾半小時便可﹐更大或果醬凍了才殺菌的話便要更久，一做完殺菌時應會見到樽內的果醬在滾得，否則繼續煲吧。果醬樽幾有趣，你唔好以為擰緊蓋後佢何時候都係密封的，在高熱情況下入面的氣體能微微推起蓋頂然後從膠邊泄去，到壓力減底後又再醬將蓋子密封，這情況在殺菌時不停在重復，而殺菌完後由於溫度降底入面壓力底形成真空，蓋子便會壓得緊緊的。  
做果醬由於會加很多糖，選些酦些但果味濃些的水果效果較好，以士多啤李為例，大陸產較大粒的士多啤李做出的果醬品質除時比外國貨好很多。初學者做杏桃這類去皮果醬較易，唔駛好似煮極都未得咁。

元朗 - 深仔記

這是自己最喜歡去吃雲吞麵的其中一間店鋪，麵條及雲吞雖唔錯，麵雖未至於最好但都幾彈牙唔太重鹼水味，亦煮得好放底時麵條緊緊唔熟，但這都不是去吃的原因，原因在於雲吞湯底。記住麵條只得少於一分鐘黃金時間去食。自己的畸形食法是待應一放底後先飲啖湯讓麵稍吸一吓湯，用筷子成個麵夾起用口吹幾下吹散熱氣後才放回湯裡狼吞虎嚥。好的麵湯除了味道外溫度掌握亦十分重要，微燙不太熱既保留鮮味亦可稍延遲把麵條浸淋的時間，同時亦決定了你一口可喝下多少湯汁感受到何種味道。  
這裡的大地魚湯頗濃及鮮甜，大地魚味不會太搶。唯遺憾是湯的味道有時幾漂忽，唔係次次都咁鮮甜，有時會幾淡味吓，較保險是平日較少人幫襯時才好去，這亦只是較保險而非保證的方法，但起碼麵一煮好就可馬上放到你面前。

禾輋 - 龍悅

這次主要係幫襯佢個阿拉斯加蟹宴，因為有人極力推薦話好底同好食。又睇睇點。

單睇菜單確係幾底，只是一行人唔夠十二個有點擔心食唔晒。  
唔續樣講了反正做得幾好，味道唔錯合格有餘，碟頭亦比想像中大。香妃雞是一般正常酒樓鹽水雞，或加了很小酒或味去浸(因要去臊味)。阿拉斯加蟹話是活蟹清蒸，中蟹尺寸，鮮味及肉質比急凍好但就唔係十分明顯，隻蟹很多膏及白膏。  
魚做得好滑只是斑球炒得有點輕微過熟，今時今日因安全至上絶對收貨，而蒸的頭腩就蒸得剛剛好亦好好味，不過魚肉起得很乾淨所以無乜肉食。  
冬茸海鮮燴燕窩都好味，只是與其它菜拍埋一齊略略有點失色感覺無咁高檔，因為冬瓜茸幾多而燕窩唔多覺。  
鮮雜果花姿丸其實無雜果，是簡簡單單的炸蝦丸入面溝咗些花姿粒入去，熱辣辣時食超熱氣但亦很好食，正。  
飯及麵基本上無食過，因為飽到真係無能為力。紅豆沙本應都OK的，但唔知點解很苦，入面唔見有連子，而算無去連子芯亦未至於有咁苦，雖然係近似的苦味，真唔知點解。  
雖然唔講得好好食但已相當唔錯，睇埋價錢亦唔算貴，由於菜色較接近擺酒時的菜色，當扣返隻蟹都近成千蚊，二千蚊全包計外面未必食到其它菜色，碟頭亦大若唔太大食十四個人食都夠食。

大圍 - 三洋餐廳

去到大圍真係無乜太多野好食，一來貴二來選擇亦少，畀咗錢都唔一定等於食得好。諗住求其食個下午茶餐，見呢間餐廳都幾多人，真係所謂希望越大失望越大，都真係幾難食，豬扒炒意豬扒雖好乾鹹鹹地還算可以，意粉就唔好題，咬落很爛，另外那碟唔講都可能都唔知係星米，很濕又無乜咖喱味，亦好在無乜咖喱味因為咖喱一點也不好食。奶茶亦只是一般，重要唔熱只得少少暖暖地，無乜可以再講。

麥當勞 - 日日開More

今期麥當勞買一送一優惠17號又開始了，第一炮6件麥樂雞買一送一。

美食博覽 2016

係咪經濟唔好還是大會作了新安排，今屆美食博覽唔多覺同一公司在不同地方擺幾檔，亦唔知係咪眼大睇唔到，幾間龍頭公司似乎無擺檔，李錦記只有另一公司在賣它的產品，八珍、淘大、刀嘜、獅頭嘜同聖安娜等亦唔見。而台灣方面更無帶團過來擺檔。取而代之多了一些未見過的品牌，特別是業界的貿易場館多了很多大陸企業，唔係話歧視大陸人，佢地好多時只係派個人坐起道Hea或且瞓覺，又或者求其開樽醬瓜叫你自己"吉"來食，咁擺法不如唔好擺。

講返公眾館暫時絶大部份優惠唔算多，起碼外邊做特價時唔難搵到差不多價錢，只是這裡唔駛你去到處搵，所以見頗多人買野仍有點手緊。平的當然也有，例如梅林B2基本上100蚊10罐是幾樣罐頭任揀，咁當然首選圓罐火腿午餐肉。惠康方面亦有平，只是褔袋吸引力差了少少。  
無論大陸定韓國都用了很多不同東西餵雞生蛋，本都想買盒中藥材雞蛋試試，只是雪櫃已有6個國家的雞蛋在試，包括韓國蛋，再買會給人飛鏟，而且這口價Aeon減價時都一樣。  
出前一丁每年都係唔知佢想點，價又唔係平，唔通真係sale情意結。好似呢款寫住香港包裝的拉麵早幾星期惠康賣8蚊都無人買，無它，印象中得一個國家的產品會特登唔寫嗰道製造但又想人以為係第二道出，奇怪，會場工作人員話香港生產(唔係製造)(包裝只說香港包裝無寫邊道製造)，奇怪，反而而家貴咗重有d人買，奇怪。  
免費試食今年少了些，反而畀錢買的多了，尊貴區更甚。報紙講嗰d超筍免費試食真係撞唔到囉。

講少少業界區域，大部份主要國家的檔位數量均收縮了，之前講過中國除外，而其實還有日本除外且數量更是去年幾倍以上。日本人試食出手重，今年派得更勁，只要唔怕面朦真係可以食到你飽，當然到開放給公眾人事參觀時好多野可能已經派完。特別推薦日本豚肉及信越明星這蕎麥麵，非一般超市貨色，蕎麥本身唔起筋而蕎麥麵是韌且彈牙的，唔肯定加了什麼或作了何處理，反正很好食。  
在家電家品博覽那面見到德國寶推出了爆炒皇，好似好好玩咁，大轉盆唔知可唔可以用來炒粟子，不過估計火力或者唔多夠。

OK - Kabaya 綠茶百力支

OK便利店日本直送系列Kabaya綠茶百力支9小包裝賣緊$9.4一包，買滿50蚊重有9折，計返每小包都唔駛一蚊真係好平同好底，平過出面好多，加上綠茶朱古力味係自己至愛，當然唔執輸。留意這款朱古力會在較底溫度下熔，所以夏天要存放在較清涼的地方才可。