沙田 - 靠得住粥麵小館

由於很少出街食粥是覺得好食，包括很多有名的粥店都係咁話，因為九成九以上的人煲粥，包括很多店舖都係唔知自己做緊乜，方法有點問題。唔好見到煲粥就以為粥係就咁煲出來，即係唔好見到燉蛋就以為碗蛋係燉出來一樣，明明同蒸水蛋無分別，中式野係咁，無得照字面解，只是很多人唔了解，你諗吓以前農村用柴火瓦煲點可能用死煲爛煲的方式煲到廣東粥出來又唔燶就可能會明白唔係咁整。因為唔係三言兩語講得到，下次有機會再講點樣煲廣東粥。

這次主要睇睇這店出名的雲吞麵。麵條的確係幾爽口彈牙，仍有些少鹹水味但唔算重。湯底只是麻麻地，大地魚味唔太夠同唔夠鮮。雲吞細粒得來水準及味道只一般，改做牛筋腩後亦只是普普通通。就係咁多，淨食齋麵夠了。這裡要收茶錢不過蘋果茶算幾好飲。

灣仔 - 麵屋武藏

在銅鑼灣一帶有很多日式拉麵，食過好幾間出名嘅都確實唔錯，只是要搵個位肯定排隊排餐死。咁啱去到附近行去灣仔都唔遠，諗起這間未去過便去試試。睇吓餐牌都唔平，同其它出名拉麵基本上差不多價或是平一點點吧，而食品選擇就多些。點了叉燒白武骨同豚肉片黑武骨味道都幾好，湯很濃但味道比較雜，相對地確係比唔上其它有名的拉麵店，差咁啲嗰種好鮮嘅感覺。  
再點了份厚揚土佐豆腐，真係無乜特別，同一般上粉炸豆腐無大分別，點了醬油汁亦唔覺有幾好食，比較失敗。  
這裡位置較偏除飯市外人比較少，無"食完就好走啦"那種感覺，坐得較舒服，但卻缺少了那種想返去再食的感覺，或者試過就算了。

深水埗 - 蘇媽蘇媽馬來西亞食品專門店

近排好懶雖然食食食但都沒有太多出文，當然好多都沒什麼好談亦是原因，睇返手機影落都唔少相，這間位於深水埗行細的店就是其中一間，與其話店其實更似街頭少食。咖喱嘅野好難話一款咖哩個個都話好食，自己覺得這裡的麵咖喱湯以價錢論確實唔差，是相當濃味的一類，比較帶辣，價錢唔貴，反而小食會差些少，有機會可以試試。而近幾個月賣埋串燒，價機相對地貴，拍得住一般舖頭，由於是即燒要有相當多時間坐係道等至得，下次再有無限時間等才有機會試(眼見真係等好耐)。

曾拌麵 vs 双人徐獨居乾麵

這次比較一吓這兩款香港有得賣的台灣人氣乾麵，看看那款較好吃。

先看看價錢較貴的麻辣味獨居乾麵，入面有4個沒印刷的透明膠袋裝著的乾麵，各自附上一包混了辣油的醬料。香港賣的並沒有附上滷蛋及豆乾，比較可惜欠了這些特色。

曾拌麵外面的包裝就沒有咁討好。同樣是4個麵但入面每個袋都印上品牌資料，感覺反而較高級。辣油同醬料分開包裝，唔食辣的直接唔落辣油就得，比較簡單。

兩款的醬料味道差唔多，都是煮過帶點蔥味的甜口淡鼓油。曾拌麵的辣油就明顯帶川椒的麻味，但感覺上仍是獨居乾麵的醬油鮮味稍為討好。

再試麵質(所有配料都是自己加進去的)，反正這點高重要。其實麵質同阿信屋賣的台灣刀削麵唔差好遠，特別是獨居乾麵(上面有滷蛋那張相)唔事前講明可能食完都唔知，講明的話食時亦好可能分唔到。而曾拌麵麵質Q(彈牙)得來就比較淋沒有咁死實，當然亦只是比較起上來好一點點。麵質是曾拌麵較優。

整體上是曾伴麵較優，特別是加上價錢因素。當時買時曾拌麵要差不多60蚊一包，這幾天一田超市減價賣40蚊，有興趣可以買包來試試，試完就算了，而獨居乾麵要差不多80蚊，HKTV個網上價會較平，但講真這個價錢不試也擺。之後都係去返阿信屋買刀削麵，加塊豬扒同煎蛋，爆香紅蔥加淡口甜鼓油，整個港式豬扒蛋撈刀削麵，反正還有誰能做出比淋在豬扒煎蛋飯上面更好味的蔥味醬油。

元朗 - 深仔記

這是自己最喜歡去吃雲吞麵的其中一間店鋪，麵條及雲吞雖唔錯，麵雖未至於最好但都幾彈牙唔太重鹼水味，亦煮得好放底時麵條緊緊唔熟，但這都不是去吃的原因，原因在於雲吞湯底。記住麵條只得少於一分鐘黃金時間去食。自己的畸形食法是待應一放底後先飲啖湯讓麵稍吸一吓湯，用筷子成個麵夾起用口吹幾下吹散熱氣後才放回湯裡狼吞虎嚥。好的麵湯除了味道外溫度掌握亦十分重要，微燙不太熱既保留鮮味亦可稍延遲把麵條浸淋的時間，同時亦決定了你一口可喝下多少湯汁感受到何種味道。  
這裡的大地魚湯頗濃及鮮甜，大地魚味不會太搶。唯遺憾是湯的味道有時幾漂忽，唔係次次都咁鮮甜，有時會幾淡味吓，較保險是平日較少人幫襯時才好去，這亦只是較保險而非保證的方法，但起碼麵一煮好就可馬上放到你面前。

灣仔 - 新仙清湯腩

來這裡食野純粹衝著佢門口寫住連續4年獲米芝蓮指南推介，由於無睇過本指南唔知佢寫乜，所以點了碗招牌清湯牛腩河同熱檸茶。先來的熱檸茶要求佢地沖濃點，所以和正常是有點分別，飲落茶味一般和一般茶餐廳無乜分別。  
主角清湯牛腩河出場，個碗幾大但睇落無乜野野咁，原因是得好少河粉，好多野浸咗落湯入面，牛腩實際上無照片睇到咁少。河粉都幾滑，湯都幾好飲，牛腩無想像中咁好食，淋得來都仍有些咬口但不是很鬆化那種，味道隨牛肉味之外都幾清淡吓，蘿蔔就是白烚蘿蔔，整體唔覺得好特別，未至於係最好食那類。做得最好的牛腩應是肉質纖維部份淋得個有些咬口且有很多肉汁，而纖維中間的筋膜脂肪有點化開，當然要做到咁談何容易，特別是多肉汁這點十間牛腩店差唔多十間都死，因為要用香港或大陸的新鮮牛腩，進口或雪藏牛肉都很難做得出，功夫亦絕對唔野少，成百蚊斤牛腩煮完縮剩一半都無，到時收你二百蚊碗又有幾多人會幫襯。  
唔知係咪呢碗特別少河粉，食完都重覺得幾肚餓。

鑽石山 - 元朗學記粥麵

雖然在food court裡面，見到個招牌同門面都有點期望，但睇住佢煮，再睇睇煮完樣，好快就已經無乜盼望。  
樣子其實唔太差，好大個碗不過只係有好多好味精嘅湯，上面的菜都相當淋，麵只不過不失唔算彈牙，但最大問題係牛筋很差勁唔好食，牛腩叫做好點，不過這次不是叫肥腩卻很肥近半是肥肉而又唔係入口會化開那種，味道較一般即通街都唔難食到那種。另外碟菜細碟到呀。

中環 - 沾仔記

沾仔記都算是一間有氣的雲吞麵店，近年來都開了頗多分店，這次試試中環落樓下這間。  
雲吞有三粒大大的雲吞，都有幾多蝦肉，麵都可以唔算好出色彈牙，算是保持水準。話口未完，咬開其中一粒雲吞，入面有大半竟然是生的，蝦肉還呈透明狀，既然蝦肉都唔熟唔駛旨意入面的豬肉會熟。極失敗，極失望。  
另外點的一碟菜心，落單時要求烚淋點，結果落單後唔駛一分鐘就送到面前，擺到明是預先一碟碟整好晒，邊個叫就落點蠔油落去，所以碟菜只有微暖，及一樣咁硬無淋點。碟菜雖然是正價但估佢唔到咁細碟，且蠔油一樣咁少。


整體除了失望就是失望，還有些少擔心會肚疴。

灣仔 - 巴蜀軒豬扒酸辣米線

這間店舖早兩、三年間中都會去幫襯下，貪佢的豬扒好食，湯底辣得來味亦唔錯，明顯比一些連鎖酸辣米線店做得好。既然去開灣仔，便再去光顧。

先來的豬扒粉由於叫的是不辣的，所以其實較似肉碎湯，肉碎是用醬油醃過那種，由於不辣所以略為失去這店的特色，還是點個少辣的更好，而豬扒就保持水準幾好味。  
再來的炸雞粉炸雞就真的走晒樣，蝶雞又乾又薄又少肉和以前食的差很遠很遠，是"乾爭爭"頗差那種，一點也不好食，為何搞成咁，好在碗粉仍保持水準，亦仍然地太多油。

大角咀 - 越旺美食

經過見到這店似乎比其它左近的店舖旺，入去食了個下午茶，沒有叫它的招牌咖喱，只點了個香芧豬扒金邊粉。湯河其實都幾茶餐廳貨色，唔太似越南食肆提供那些，亦沒有咁好味，不過個價錢就差不多，算是有點貴，特別是以大角咀這區來講。湯底幾味精，隨此之外沒什麼其它味道，豬扒其實可以的，只是無乜香芧味及太茶餐廳口味，紅豆冰唔係幾夠紅豆所以甜得來唔夠豆味同奶味。  
老實講句這個粉就算下午茶來講有埋野飯都唔係好值這個價，不如正正經經去越式餐廳食，否則直頭去有粉麵賣的茶餐廳食算了。

旺角 - 好旺角粥麵專家

幾次經過佢門口，見佢話麵是自家製造，點都要試試 。 
叫了個雲吞麵，樣子沒什麼特別，麵煮得不錯剛剛好，只是麵質唔係話好特別，不是很彈牙那種，湯底亦是不過不失，雲吞亦唔覺好特別，當然價錢亦不是貴很多。這裡用的碗比較大所以麵沒有被托起還是浸在湯中，一煮好服務員拿過來便要馬上食，同朋友講多兩句就淋晒唔好食啦。

光輝圍 - 金來越南粉

想起來都有十多年沒有幫襯過這小店，記得當年它在這裡開店的時候(感覺沒有廿年，是否在其它地方搬來這裡?)不時會去這裡食它的越南粉，因為那個時候它用很多牛骨來做湯底，非常好味，差不多是在香港能吃到最好的牛骨湯底之一。不過今時今日牛肉不知加價加了多少倍，這小店一碗粉卻只加了幾蚊，而且碗粉還大碗了不少，沒可能放那麼多牛骨來做湯，現時只能說湯底還幾好啦。  
想食越南粉這裡仍是不錯的選擇，起碼不是純味精湯，只是不要午飯時候去唔係有排等。還望日後牛肉價格回落能做回往昔的湯底。

上環 - 權記雲吞麵

相信一開始應該用平來形容它的雲吞麵，無錯今時今日13蚊碗麵都唔知去邊道搵。至於麵本身，煮麵的時間很好沒有煮過龍麵幾彈牙，但麵的鹹水味很重，煮麵水應有很濃的鹹水而無換走部份水且又帶了去湯底，很不好。雲吞很大粒，唯有點似傳統的煮法，即事先煮好至近全熟後放碗中用水沉著，有人叫時再很快滾一滾，當然亦可能是煮的時間過了火所至，明顯地蝦肉會很熟以至縮得很利害，蝦肉不霉但並不是蝦肉緊緊熟那種彈牙爽口。  
牛筋味道只不過不失，無奈亦是鹹水味破壞了湯底。  
想食一碗平的麵這裡是不錯之選，只於麵太重鹹水湯底太味精，要食好野或去別間更好。

元朗 - 東記潮州粉麵專家

簡單的魚蛋粉，魚蛋都幾好食，湯底麻麻地，河粉就是現時很多粉麵舖都選用質數較差那種。真的不明白為何現在這麼多粉麵店用這種較厚身較硬又無咁香滑的河粉，真的無得揀焗往要食嗎?還是請願俾多一兩蚊食碗較好的粉麵。

恆安邨 - 津津粥麵茶餐廳

很奇怪為何馬鞍山的食肆會這麼少，如還要選有水準的，隨時用一隻手來數5隻手指都用唔晒。這次在新港城左近浮沉了好一會也找不到那一間想去幫襯，結果越過耀安邨還是沒有目標，最後行到去恆安邨已經唔太想食野，於是去了這裡食碗麵。  
廿幾蚊一碗魚蛋粉在屋邨唔算平或者叫一般價錢，下午茶時段跟多一杯凍檸茶一碟油菜各加多$6算係咁上下。魚蛋都算可以但粉較一般，現時很多粉麵店為減底成本都用了這類次一級的河粉，湯底亦只是一般，檸茶比想像中細一點，味道中規中矩普通茶餐廳口味，油菜亦是較細碟頭的一族，且太淋了。

九龍城 - 黃明記

雖然現時去黃明記食粉麵的人叫做多返，但真係風光不再，很難回復當日的光彩，點碗墨魚粉來試下便馬上知道原因。無錯是比幾年前最難食的時期好多很了，但仍只屬一般應有的水準。以"觀樂今霄"年代為最好食的時期來計，當時黃明記是香港幾家最出名的粉麵店之一，它的墨丸與現在比有較多的墨魚碎且彈牙得多，墨丸河入面是有兩片墨魚鬚的，其它粉麵加的就是午餐肉，不要少看這兩片午餐肉能提供的油香。而與現在最最大的分別，就是少了豬油渣，及用了冬菜來取代中國芹菜，結果......就是兩樣完全不同的東西，不同的食味，不同的檔次。 店面雖然是裝修過，很慶幸牆上的水牌給保留了下來，每塊水牌都有幾十年歷史是古董了。

花墟 - 香港仔魚蛋粉

記得很多年前香港仔魚蛋粉在旺角開了一間分店，那時覺得它的價錢貴，皆因那個年代不太難找到十蚊一碗做得不錯的粉麵，好在咁多年來佢亦沒有瘋狂加價，慢慢的已變得與其它粉麵店價錢相近，這次幫襯的花墟分店平日還有下午茶餐，又睇下點先。  
叫了魚蛋粉，來到都有點驚但唔識喜，好似冇乜野料咁，好在食落正常，魚湯幾好味及很少很少油，魚蛋魚片都好食但不是特別好同量幾少，算啦，今時今日廿蚊有咁質及量已相當唔錯(正價的話就麻麻地啦)。茶要加8蚊亦無乜特別只是不過不失，都唔算平唔口喝就唔好叫。

沙嗲皇

真係加價加到痴咗線，去年還可以在午餐時段在這裡連加一小費用三十幾圓吃一碗沙嗲豬扒金邊粉及喝一杯台式飲品，最近就加到近五十圓，咁貴真係重點食得落，好在碗粉叫做大碗返，有返兩塊豬扒，不過五十蚊還是太貴了。這個午市套餐餐牌沒寫的，但問待應就應該每間分店都有。  
杯百香果綠茶完全不夠涷，冰都溶晒了，所以另外問待應拿了一杯冰。