自製迷你牛角包

天氣凍除了食火鍋，時間夠多的話亦可試試自己做牛角包。如能成功做到手做麵包的話，天氣涼要做牛角包也不難，只是做酥皮要花時間。未用手做過麵包的最好先試做麵包掌握了麵團所需濕度及發酵過程後才做牛角包會比較容易。

 材料
 一磅高筋粉及適量的粉用於灑在枱面及麵團之用(約略咁上下就得，做嗰時都係倒了小半袋1Kg粉完全無磅過)
一包快速酵母(7克裝)
20克及180克(共200克)室溫放軟了的無鹽牛油，不可太熱有油流出
糖約4茶匙(平匙不要凸起)，不喜糖可自行減少份量
牛奶適量(約半杯奶加半杯水開稀，不喜奶味可再稀點)
雞蛋一隻
鹽約1/4茶匙(純粹調味用，唔想鹹的可以落少點或不用)

 
一磅麵粉加20克牛油、酵母、糖用手略搓勻，用奶水一路倒一路搓至剛成粉團便可，每個牌子的粉或每批粉的吸水量唔同，可以有極大分別，所以唔一定要用晒所有奶水，反過來唔夠水可再加，如做甜麵包一樣由於糖份較高比較黐手是正常，但太黐手就可能太爛，所以話做過麵包知道要去到什麼程度較易，否則見先爛些少後慢慢再一湯匙一湯匙咁加粉到剛可搓成團狀而沒太黐手便可。粉團略搓滑就得不要過份地搓因不想起麵筋。用保鮮紙包著放一旁約半小時讓粉團內的筋鬆開。  
舖保鮮紙，180克牛油切片放保鮮紙上成四方形，用括刀刮平中間的空隙，面舖保鮮紙再碌一下使厚度平均。相信很多人都知道這個偷雞方法，因為師父輩用粉皮包牛油球的方式係少點功夫但要較有技巧才做得好。  
之前的粉團碌成面積比牛油塊大一倍的四方形，打斜放牛油塊，四個角摺起包好。再碌成長條，薄點便成，儘可能四個角直角一點，在粉團1/3及2/3位置用棍壓一下，否則對摺後這個位厚了再碌時粉團容易擠出來之後較難做成方角，在表面灑些少粉防止黐埋，兩面向中間對摺，放雪櫃。留意做時用了矽膠墊，所以只需卷起成卷放雪櫃之後打開便可直接再加工，懶人方法。雪是為了讓牛油硬點唔好溶，及讓粉團的粉筋鬆開，否則之後由於筋性再碌平粉團時會收縮回彈得較厲害，較難碌出較四正的酥皮及四個角很難做出方角，特別是最後一次粉皮已很薄，若碌得唔夠方想用手拉一拉就很易穿。第一次及第二次由於粉皮較厚雪20分鐘左右便可(時間夠的半小時或更長亦可)。若中間困了氣泡用叉刺穿便可。  
拿出粉團，這次向另一方向(即轉了90度)重復碌粉皮成長條，粉團1/3及2/3位置壓一下，灑粉，對摺，放雪櫃。再重復一次。此時己成2x3x3=18層酥皮。最後一次因要儘量壓粉皮到最薄程度所以起碼要雪半個鐘讓粉團的筋儘可能鬆開。拿出後儘量碌到最薄及維持酥皮四正有方角，因太圓或斜角有可能之後要切走做成浪費。若好像所用的矽膠墊唔夠大便把酥皮碌大後介開兩份才各自再碌大。最後成了54層酥皮。

切成等邊三角形尾段中間初開，"mark"開開口後卷起，收口位向下放焗盆。由於自己食賣相無咁重要，兩邊切出來的三角邊可以兩塊合成成另一個牛角包。放焗爐內發酵，爐內放一杯熱水(不要掂到焗盆)稍加溫加濕幫助發酵。發酵一小時後取出，包會厚了約一倍(但只會大了少少)。雞蛋全個打勻後在牛角包表面掃上蛋漿。  
焗爐預熱至250C，見到表面開始變少少金黃後多一兩分鐘便可(不要打開焗爐門來看)，像這次放焗爐中層焗了7分鐘，可自行加減時間。之後調低爐熅至200度再焗13-15分鐘便成。

自製果醬

早幾日星期日無意之中睇了一集大台嘅咩咩補習班教人整果醬，雖然話係細路仔節目，但係都唔好"亂咁嗡 當秘笈呀"亂咁來，跟佢咁做不如出去買樽來食好過。

自己整果醬很易，亦當然唔想落化學野。部份水果如士多啤梨或菠蘿等因果膠很少，所以一般都會加檸檬這類含大量果膠的水果，且亦能增味。如本身多果膠的水果就不用加檸檬，不清楚某類水果果膠多不多，上網查一吓便可，否則多加點檸檬亦無防。外面賣的果醬一般就直接加果膠或其它類似物品。

先要準備三至四個果醬樽，多準備一些好過到時唔夠樽用，因為水份及果膠每次不同，一時未做好都唔知會做到幾多。何謂果醬樽?就是玻璃樽身，鐵蓋入面底部有一圈橡膠用來壓著玻璃瓶口的，若唔清隨便拿任何一瓶醬料的樽來看就會明。唔好睇少這種瓶，消毒後果醬能放多久全看它。

士多啤李約兩至三磅，洗浄後開邊，因為果皮不很透水，不開邊的話要多煮幾倍時間，隨時一個鐘都未得搞掂。檸檬一個，若想慳錢多做點果醬，加多個檸檬亦得，當然會酸點及無咁濃士多啤李味，但自已做士多啤李用得多酸點也會好食。檸檬皮可自行決定是否也加點，若加就記得將入面白色內皮全去掉。

沙糖約一碗半(飯碗)，雖然可根據喜好減少糖份減甜，但由於不像外面賣的加了防腐濟，做好的果醬開蓋後是靠糖份來保存，所以不要減太多，情願每次食少點來減糖。  
用較大的煲或鑊水份會揮發得快一點，糖水滾起後氣泡很多難破，若用煲要選高身的，若平底鑊要小心點特別後期要收細一點火防止滾出。將士多啤李、糖及檸檬汁倒入煲內攪均，若有時間可放半個至一個小時，等部份士多啤李的水份給糖抽出之後就唔駛煮咁耐，否則可直接開火煮。火要猛些讓水份蒸發，後期差不多好時要收細些唔好煮燶。正常士多啤李開邊水份多帶皮出水慢煮半個小時走唔甩(除非真係好大火或切細粒點可加速)，全去皮水份唔太多的水果10-15分鐘可能已成。一直煮到煲邊果醬旁有一層膠狀物就差不多，若初做不肯定可先收細火，滴一滴落冰塊面(或隔著匙放冰面都可)，用手攪一吓看看會否變杰身(像平時煮餸鈎了稀芡的汁就可，凍了會杰很多)，會就可以熄火並馬上把果醬倒入果醬樽，盡量滿一點這對之後消毒保存防腐有幫助。  
自己做出好的果醬由於水份少糖份高，正常放雪櫃一兩星期食完沒問題。若想存放更久便要進行殺菌消毒，做得好的話未開蓋前放雪櫃一兩年什至更久是沒問題。將還很熱入了果醬的樽放入滾水內(樽口向上)，水位約浸到樽的一半左右，高點更好但唔好畀滾水走入樽口，一般大小的樽大火滾半小時便可﹐更大或果醬凍了才殺菌的話便要更久，一做完殺菌時應會見到樽內的果醬在滾得，否則繼續煲吧。果醬樽幾有趣，你唔好以為擰緊蓋後佢何時候都係密封的，在高熱情況下入面的氣體能微微推起蓋頂然後從膠邊泄去，到壓力減底後又再醬將蓋子密封，這情況在殺菌時不停在重復，而殺菌完後由於溫度降底入面壓力底形成真空，蓋子便會壓得緊緊的。  
做果醬由於會加很多糖，選些酦些但果味濃些的水果效果較好，以士多啤李為例，大陸產較大粒的士多啤李做出的果醬品質除時比外國貨好很多。初學者做杏桃這類去皮果醬較易，唔駛好似煮極都未得咁。

自製沙律

近排日日係咁食，一於清淡點自己整個沙律食吓。一於重本製作，理得佢係乜野沙律。中秋將近很多水果都很靚，就用大量水果，橙只去掉大部份皮，加日本水晶梨、青提，煎香火腿午餐肉、台灣香腸，灑上羊奶芝士，清新一點直接用熱情果肉當沙律汁。正。

嫩雞煨麵

天氣熱到死唔多想食飯，臨時做個速食嫩雞煨麵。先在冰箱拿塊雞胸肉放入微波爐至稍解凍(仍然結冰但用刀可輕易切得入)，切片，加薑絲、少少雞粉及酒醃一醃。  
用要煮三分鐘的幼身乾麵熱水加些少鹽煮二分鐘，過冷河最後沖水時加少少油在水裡防黏又唔油。  
水加些少雞粉及鹽，由於麵已有鹹味所以湯要略淡。煮滾後關至最細火，倒入雞塊浸熟，約兩分鐘，不用滾起。倒入麵條，維持最細火避免雞肉變老，數分鐘後湯微滾食得。用了廿幾分鐘，唔好睇樣以為好清淡，味道唔差得過外面一般食店做的好多。

人參雞糭

臨近端午有無諗過搞搞新意思，自己整返隻人參雞糉。用了兩飯碗糯米、兩枝韓國人參(不要用一般超市買到的因無論幾大支都無乜參味，要去尖沙咀韓國人開的小店買)、一些龍眼肉及蒜。

蒜頭去皮，所有野洗淨，人參中間粗的莖位十字破開，雞肚放入一枝及小部份蒜及龍眼肉，再填開糯米。剩下的糯米撈入剩下的龍眼肉及蒜。用一洗淨之煲湯袋底放糯米，放雞及另一破開人參，再填滿糯米，綁好袋口後煮一個鐘再焗一個鐘，之後再煮返滾後食得。  
煮糉的湯可以飲所以糯米及煲湯袋無上油，拿走煲湯袋時糯米比較黏袋結果樣子唔多靚比較遺憾，另湯可加少少鹽調味。

薑蔥浸生蠔

上次講過醃子薑時揸出的薑汁水唔好倒可以用來做餸，這次就做了一碟薑蔥浸生蠔。其實做法同一般的分別不大，只是由於薑汁有很多，可以用大量來浸。  
急凍生蠔洗淨，若用生鮮生蠔要用豆粉或生粉等來刷洗。鍋內倒入適量薑汁煮滾，由於之前醃子薑時加了鹽所以要試下鹹味，正常醎度便可，若太鹹要加水。加蔥段，放入生蠔大火煮熟即可，視乎蠔的大細由放入起計約煮分半至兩分鐘便可，煮好後將多餘的薑汁倒咁點便成，連平底鍋一同上枱都唔錯起碼洗少隻碟。  
由於薑汁多不用下油爆薑片，食得更清淡健康之餘且更無太多腥味，唔放酒或辣椒都沒問題。

醃子薑

今年是第二次醃子薑，無錯現在做是有點遲，子薑都有點老開始起筋，不過趕尾班車還算可以。這次做來送給人所以分量很多，若不要那麼多自己按比例減吧。材料5斤子薑、兩包一斤裝(600克)冰糖及一支中國白醋、幾茶匙鹽。不用冰糖用白糖都可只是冰糖較好味但做出來薑塊較黃。 兩斤冰糖用三大碗白醋煲煮至飽和(即糖不能再溶)，若仍有太多糖在煲底可再加些少白醋，反過來糖全溶可加點冰糖或白糖。放涼備用。  
子薑刮去皮，盡量不要搣得太細唔係切薄片時比較難切。用水洗淨後過凍滾水。切薄片，若要做得較甜口就要有咁薄切咁薄，否則可切厚點至約一毫米，用陶瓷刀會易切好多同切出來無乜起筋。這個工序很花時間，由於薑是圓的較難捉實要切薄片較難，但如一般切片方法先切平底部那每一片薑的切面就會少了一"忽"睇落無咁靚。  
由於太多所以分了兩兜，每兜放兩、三茶匙鹽醃半個鐘等薑片出水，然後用手有咁大力得咁大力將薑汁揸出，可重復再揸一次。若薑片切得薄揸出的薑汁較多做好後就無咁辣。留意揸出的薑汁不要倒掉可用來做餸，下次再講。  
將薑片放入玻璃樽，不要弄得太實要有一點點鬆，要甜點可再鬆點。倒入飽和的糖水，將薑片用筷子弄鬆點，有需要再補些糖水，煲入面少少未溶的糖可放埋入樽內。放雪櫃，若之前切得極薄三、四天後便可食用，若有一毫米左右建議起碼要一、兩個星期才可。

椰子蒸雞

上次講到打完椰汁剩了些椰子渣(椰絲)出來，其實仍是非常有用，這次用來蒸雞。在超市買一隻細的冰鮮雞，不要在黃色超市買，不知是否運送處理得唔好出了問題還是什麼原因，近來賣到的多款雞都非常臊唔出水跟本唔食得，雞洗淨在背脊剪開。  
用少少鹽先將雞醃一小時或以上，然後將雞底及面用椰絲包著，可再醃一下或直接放鍋中隔水大火蒸半小時(由於雞給椰絲包著所以是要蒸耐一點)。  
略放涼把椰絲刮出放另一碟底，雞剪好後放面，食得。  
這碟餸最好食的不是雞而是吸了雞汁的椰絲，由於椰絲曾打汁所以只有很淡的椰子味不會搶了雞味。

自製椰汁

天氣咁熱又剛打完風，想飲杯椰汁但係街邊檔賣到咁貴點飲得起。就算近年椰子漲價了兩三倍但椰汁本身仍然是一樣非常唔值錢的東西，為何不自己做，做完你就知有幾唔值錢。

首先不要買大陸椰子，不是品質不好而是一般買到的都較嫩唔夠椰子味，買泰國的較好，雖然自己開唔太難但開時會跌到成屋椰衣碎所以叫生果檔開埋更好，椰心水記得留返。回家後略洗淨、刨皮，刨皮時要小心，若自己開椰子要保持椰肉大塊點較容易刨皮，之後用凍滾水洗淨。  
大塊的椰肉略切細一點，將數片放入攪拌機，加糖，糖份量按自己口味及攪拌壺大小而定，第一次不用擔心太多或太少因可再調，若如街邊的只打一壺可在這時放花奶但因為會做很多可在均質處理時才放，加水，由於奶較易壞所以用冰水較好，放冰塊亦可，而由於暫時不放奶所以只用室溫水。  
慢或中速打一分鐘，椰汁倒入大煲中作均質處理，期間隔渣，用大匙壓下椰渣將渣內椰汁壓出，這些渣其實就是椰絲，做糕餅可直接拿來用，若用來煲雞之前就不要放糖。由於不做糕餅所以將渣倒回攪拌器，加幾片椰子後重覆之前步驟返打。但記住先試試之前的椰汁會否太甜或太淡來決定這次用多少糖。  
如事者重覆幾次後才用了約半個椰子，最後一次返渣不用加椰肉直接打兩分鐘，剩低的椰肉放冰箱留下次用。  
如不直接飲椰心水也可在這時倒入煲內，加一大罐花奶(不喜歡太奶味的就不要成罐倒晒)，由於之前無用冰水所以同時加入大堆冰。這時是最後的均質處理，試下味太甜可加水，太淡可加糖。  
唔覺唔覺做了約三公升半，你話幾唔值錢。若如一般街賣咁不用咁椰子味只需用1/3個椰子打耐少少已可做出同樣份量。  
留意椰汁有奶，做時要注意清潔及溫度，不要留太耐放雪櫃幾天內要飲完。若雪櫃無位放打椰汁時不要放那麼多水但做甜一些，飲時加點冰水可開回正常味道。最後，椰渣不要倒掉還有用的，下次再講。