英國篇 - Haagen Dazs Pralines and Cream

每次去英國都要食 Haagen Dazs 的 Pralines and Cream，這次叫人幫我留定，因為減價時一定是最快賣清的口味。這次再食配方似乎改了些，包了糖的碧根果仁多了但果仁糖漿少了且明顯無咁醎，底材溫尼拿雪糕似乎亦變深色了味道變了點，自己還是較喜愛舊食譜的鹹味，無論如何這款仍是自己最愛口味，奈何香港(包括專門店)唔賣。  
附上兩年前的照片作比較(真好採可以用回同一隻碗同一隻匙)。

英國篇 - My Old Dutch

在倫敦算是一間較有人氣且開了頗久的班戟店，這裡以鹹班戟為主。逢星期一其中一系列非自選饀料鹹班戟同甜班戟都會特價只售5英磅，臨近放工時間會大排長龍。  
碟頭很大，隻碟直徑有手臂加手掌咁長，見侍應一次最多只可以拿兩碟，因為個碟非常之大非常之重。至於班戟好唔好食就真係見仁見智，點了幾款老實講唔算太式合香港人食，特別是海鮮估唔到主要是面頭的幾片鬼佬鹹魚和幾隻蝦，而磨菇煙三文魚則較接近香港人口味亦是最好食的，最後那款 My Old Dutch 等於香港的招牌雜會菜樣樣有些。  
講真以5英磅來計是很底，食完會很濟且頗飽肚，細食的應該食唔晒一碟。不過若要飲杯野就要俾多約4磅同食多碟差唔多，所以不難見到有人沒有點飲品只要水喉水。這裡建議服務費12.5%算是一般所以服務也只是一般，若是去其它服務更好較高級的餐廳就要睇清楚小費收幾多至好入。

英國篇 - Costco

提起Costco都想講一講，佢其實係會員制的貨場，如大間的超市咁以食品為主再有衣服及電器等用品賣，由於會員制所以要會員帶住唔可以自己隨便行入去，超市收錢時亦要睇會員証。講咁多做乜?因為佢入面有間小食店賣的食物好平，當係給會員的甜頭所以要截住出面的外人，當中尤以焗薯平到笑，磅半銀一份只是其它地方幾分一價錢。  
有幾樣配料可選，當然吞拿魚最底食，一個大焗薯上面有近一罐半的吞拿魚，真係剩買罐頭都要咁多錢，細食的兩個人分一份也很足夠。味道方面由於很易整所以無乜撞板，唔算腥重幾好食的。

英國篇 - 西班牙林柿

這種林柿近年都不難在香港找到，只是價錢很貴吧，一級最大尺寸的閒閒地要賣幾十蚊一個，表皮有點瑕疵的也要廿蚊。雖然這次唔係去西班牙，但英國賣的價錢都唔太貴，一級的(圖中整箱的)在Costco(貨場)買都係幾十便士一個，如果較細一兩個碼表皮有少少瑕疵的(圖中只兩個柿的)在印度朋友開的街市舖頭買一磅更可以有5、6 個非常之平，熟了之後也一樣咁紅的。  
這種柿很爽甜，像日本產的富有柿一樣皮亦算嫩可以連皮一起食無苦澀味，只是甜度略差了一點，但一般仍比中國或韓國產的要甜及好味。基本上好唔好食同大細無直接關係，越紅越熟的更甜的機會便越大。要食就襯手好快過造了。

英國篇 - 家鄉雞

好多人會奇怪為何去到外國都重要幫襯家鄉雞，答案可以好簡單又可以好複雜。最簡單的答案係英國出街食野貴而家鄉雞是較便宜選擇。而複雜的答案確係幾複雜，試想想為何在香港或大陸食到的雞咁難食，咁嘅質數無可能在世界各地開咁多分店，這個就是問題所在。在香港原味的家鄉雞真係又細又乾又無味，而且唔知點解雞剩係得雞肶同雞翼，搵件雞胸睇吓都好難，試過見到有人投訴全筒雞九件都係雞翼，自己亦試過隻雞鎚細到好似大隻雞翼個鎚咁，試過係可以好似卡通片咁放入口拉返支骨出來一啖食晒(唔好學唔係死咗唔關我事)。

英國的雞只得原味而明顯大件很多，有時一件做得香港或大陸的兩三件，而且都有雞胸的，雞明顯較油肉質較幼嫩有雞味及香料味整體好食好多。這一定是不同地區有不同貨源的關係，唔知香港的會否算是垃圾級別(不過仍好過大陸)。比較奇怪的是就算英國本土都唔係間間好食，隨時都係一街之隔的分店果間好食就第時幫襯都好食，果間唔好食就下次幫襯都唔好食，主要分別是有些淡茂茂無乜味，難道每間分店都有固定而不同的貨源嗎?

英國篇 - Coka Cola Life

停了一排，首先帶來英國特別篇。

在英國的超市，不難見到有綠色招紙的Coka Cola Life賣，價格和一般可樂一樣。雖然香港都有幾間做外國人生意的超市有得賣，但價錢就貴到唔會買來試。在英國汽水被視為不健康食物，在追求健康的今日價錢唔會貴(因為經常減價)。買的時候雖然標價一磅八五，其實是兩磅兩支。  
佢自己寫話用天然甜味，死啦乜原來之前的底糖唔係天然野?另外注意佢唔係無卡路里而係底卡路里。至於最關心的味道，唔......唔好當佢係同牌子嘅可槳囉，味道差很遠，很奇怪為何有人會話差唔多味，氣泡更完全不同，自己就覺得隨時重差過雜牌可槳味，而且飲完之後有明顯甜味在口內殘留，不比很多其它的代糖產品弱，自己覺得殘留的味道有點似新鮮蘿漢果的甜味，不過其他飲過的人又話唔似，口味這家野真係見仁見智。  
唔知日後香港正式出會有乜唔同，若一樣的話相信唔會再買來飲，因為自己覺得唔好飲。

美版合味道杯麵

家興超市又在做合味道杯麵特價，不過今次唔係港版而係美版，印像中美版同港版係有分別的但近期很少食杯麵所以沒有買，若只是隨便搵點東西吃10蚊三杯始終都係平。

薑蔥浸生蠔

上次講過醃子薑時揸出的薑汁水唔好倒可以用來做餸，這次就做了一碟薑蔥浸生蠔。其實做法同一般的分別不大，只是由於薑汁有很多，可以用大量來浸。  
急凍生蠔洗淨，若用生鮮生蠔要用豆粉或生粉等來刷洗。鍋內倒入適量薑汁煮滾，由於之前醃子薑時加了鹽所以要試下鹹味，正常醎度便可，若太鹹要加水。加蔥段，放入生蠔大火煮熟即可，視乎蠔的大細由放入起計約煮分半至兩分鐘便可，煮好後將多餘的薑汁倒咁點便成，連平底鍋一同上枱都唔錯起碼洗少隻碟。  
由於薑汁多不用下油爆薑片，食得更清淡健康之餘且更無太多腥味，唔放酒或辣椒都沒問題。

醃子薑

今年是第二次醃子薑，無錯現在做是有點遲，子薑都有點老開始起筋，不過趕尾班車還算可以。這次做來送給人所以分量很多，若不要那麼多自己按比例減吧。材料5斤子薑、兩包一斤裝(600克)冰糖及一支中國白醋、幾茶匙鹽。不用冰糖用白糖都可只是冰糖較好味但做出來薑塊較黃。 兩斤冰糖用三大碗白醋煲煮至飽和(即糖不能再溶)，若仍有太多糖在煲底可再加些少白醋，反過來糖全溶可加點冰糖或白糖。放涼備用。  
子薑刮去皮，盡量不要搣得太細唔係切薄片時比較難切。用水洗淨後過凍滾水。切薄片，若要做得較甜口就要有咁薄切咁薄，否則可切厚點至約一毫米，用陶瓷刀會易切好多同切出來無乜起筋。這個工序很花時間，由於薑是圓的較難捉實要切薄片較難，但如一般切片方法先切平底部那每一片薑的切面就會少了一"忽"睇落無咁靚。  
由於太多所以分了兩兜，每兜放兩、三茶匙鹽醃半個鐘等薑片出水，然後用手有咁大力得咁大力將薑汁揸出，可重復再揸一次。若薑片切得薄揸出的薑汁較多做好後就無咁辣。留意揸出的薑汁不要倒掉可用來做餸，下次再講。  
將薑片放入玻璃樽，不要弄得太實要有一點點鬆，要甜點可再鬆點。倒入飽和的糖水，將薑片用筷子弄鬆點，有需要再補些糖水，煲入面少少未溶的糖可放埋入樽內。放雪櫃，若之前切得極薄三、四天後便可食用，若有一毫米左右建議起碼要一、兩個星期才可。

大埔 - 余曉記上海包

這店之前曾經講過生煎牛肉包幾好食，只是有一樣自己唔知道的事情，原來下午臨近放學時候，它會做定多多蔥油餅準備賣。  
這店的蔥油餅是比較似以前細個時上海舖外賣小店那種，即比較多粉及厚身。由於剛煎好非常香口無可能會唔好食，唔貴又大塊，若遇啱定要試試。

椰子蒸雞

上次講到打完椰汁剩了些椰子渣(椰絲)出來，其實仍是非常有用，這次用來蒸雞。在超市買一隻細的冰鮮雞，不要在黃色超市買，不知是否運送處理得唔好出了問題還是什麼原因，近來賣到的多款雞都非常臊唔出水跟本唔食得，雞洗淨在背脊剪開。  
用少少鹽先將雞醃一小時或以上，然後將雞底及面用椰絲包著，可再醃一下或直接放鍋中隔水大火蒸半小時(由於雞給椰絲包著所以是要蒸耐一點)。  
略放涼把椰絲刮出放另一碟底，雞剪好後放面，食得。  
這碟餸最好食的不是雞而是吸了雞汁的椰絲，由於椰絲曾打汁所以只有很淡的椰子味不會搶了雞味。

自製椰汁

天氣咁熱又剛打完風，想飲杯椰汁但係街邊檔賣到咁貴點飲得起。就算近年椰子漲價了兩三倍但椰汁本身仍然是一樣非常唔值錢的東西，為何不自己做，做完你就知有幾唔值錢。

首先不要買大陸椰子，不是品質不好而是一般買到的都較嫩唔夠椰子味，買泰國的較好，雖然自己開唔太難但開時會跌到成屋椰衣碎所以叫生果檔開埋更好，椰心水記得留返。回家後略洗淨、刨皮，刨皮時要小心，若自己開椰子要保持椰肉大塊點較容易刨皮，之後用凍滾水洗淨。  
大塊的椰肉略切細一點，將數片放入攪拌機，加糖，糖份量按自己口味及攪拌壺大小而定，第一次不用擔心太多或太少因可再調，若如街邊的只打一壺可在這時放花奶但因為會做很多可在均質處理時才放，加水，由於奶較易壞所以用冰水較好，放冰塊亦可，而由於暫時不放奶所以只用室溫水。  
慢或中速打一分鐘，椰汁倒入大煲中作均質處理，期間隔渣，用大匙壓下椰渣將渣內椰汁壓出，這些渣其實就是椰絲，做糕餅可直接拿來用，若用來煲雞之前就不要放糖。由於不做糕餅所以將渣倒回攪拌器，加幾片椰子後重覆之前步驟返打。但記住先試試之前的椰汁會否太甜或太淡來決定這次用多少糖。  
如事者重覆幾次後才用了約半個椰子，最後一次返渣不用加椰肉直接打兩分鐘，剩低的椰肉放冰箱留下次用。  
如不直接飲椰心水也可在這時倒入煲內，加一大罐花奶(不喜歡太奶味的就不要成罐倒晒)，由於之前無用冰水所以同時加入大堆冰。這時是最後的均質處理，試下味太甜可加水，太淡可加糖。  
唔覺唔覺做了約三公升半，你話幾唔值錢。若如一般街賣咁不用咁椰子味只需用1/3個椰子打耐少少已可做出同樣份量。  
留意椰汁有奶，做時要注意清潔及溫度，不要留太耐放雪櫃幾天內要飲完。若雪櫃無位放打椰汁時不要放那麼多水但做甜一些，飲時加點冰水可開回正常味道。最後，椰渣不要倒掉還有用的，下次再講。

馬鞍山 - 759阿信屋超級市場

還記得個多月前曾去過阿信屋長沙灣的超市，當時行了唔夠三分鐘便行返出來，因為賣的東西跟其它分店是原全一樣。到今次馬鞍山超市開業，又看看有何不同。  
首先是多了肉類同新鮮蔬果，再看看價錢果然非常震撼，唔係因為平而係原價再創天價新高，除極少量皇牌平價貨品外，俾你打個九折什至八折都未必會比兩間大超市平，更不用講外面街市價錢，真不明白到底打著什麼算盤。超市賣的東西暫時絕大部份都在其它分店可以買到，講真只是一間放大版的分店而完全未算是超市。店內亦加入賣化裝品的Kawaiiland及少量玩具同電器。  
現時阿信屋給我的印象已與平價脫鈎，因為好多東西已不是它最平，就舉幾個之前在討論區見到的東西作例子吧。例如之前有賣的合味道杯麵有人話佢賣六個幾好平，但你又知唔知家興超市同北區一些賣貨給自由行的小商店才剛剛結速賣十蚊三杯，同樣的貨品同樣是香港出產，明顯是生產商在清貨而有人食水較深。又例如品客芝士味薯片，兩大超市的是寫明美國生產但阿信屋的沒寫產地，印象中是有一個國家出品的東西是不敢俾人知是在那裡生的。再多一個例子吧，現時賣緊公價十蚊的日本杯裝啫喱多興屋紅磡國際都會分店特價只賣7.5(其它分店49蚊6杯)，咁就算俾個九折你又算唔算好平。

當然純話現在阿信屋的皇牌東西已唔算好平是很不公道，因為大家都知道佢個價是多少而用佢個價再減一點來打佢，整體上還是要多謝佢將物價拉底。不過單看這分店可以話佢完全唔知自己在做緊什麼，似乎佢要開始做多點市場調查及職員不要經常坐在寫字樓，了解賣什麼不是問供應商可給你什麼而是去先問你自己應賣什麼。舉個簡單例子，在馬鞍山區有什麼食品是賣得貴而又沒給兩大超市壟斷的，隨便已可答你其中一樣是雞蛋，馬鞍山區的雞蛋(包括街市)比平價地區如新蒲崗貴成半至三成，若做吓市場調查便不難找到，再看看阿信屋超市在賣什麼......日本雞蛋，無言了。

(2014-09-19 更新: 阿信屋果然有回應市場，文中所提馬鞍山超市的日本啫喱已特價每杯$7.8。另之前的水果唔夠平，現加了幾樣超低價水果，橙$1.3，柑$1.4，華盛頓蘋果$1.7(不過很多壓傷)，中國富士蘋果$2，還有壓沙西瓜每公斤$4(即每磅$1.8)，果真非常平。)

億長御坊 - 糉

這些台灣糭子是之前美食博覽買的，當時見寫著拿了很多奬滿有期望的。如果唔係當然唔會在這個時候才買台灣食物，無論如何，暫時唔買。  
盒子入面有三款糉，分別是潮州火腿鮮肉、台灣南部糭及潮州香菇蛋黃肉糉，分開三包。  
用了最簡單的方法滾水煮，打開糉葉，Oh My God，成隻火腿鮮肉糉散開晒，無它，糯米太少又沒有扎實，估唔到會犯這低級錯誤，這並非個別問題，三隻有兩隻是這樣，最差一隻散到全沾在葉上要用匙刮下來。除了這問題外三款糉確係幾多饀料，相片或看不出來，而香菇稍稍質數差點唔太香，肥肉唔算太肥幾淋幾香。  
可能真的比較喜歡廣東糉，這些台灣糉沒綠豆感覺沒那麼香，另外不太喜愛撈了醬油的糯米，當然這些都不是這些台灣糉的問題而是個人口味問題。