Muller Corner Vanille D'or 及 Danone Oykos Luxury Greek-Style Pear

平時香港的雪藏乳酪貴到死閒閒地可以是外國的幾倍價錢邊捨得買，行過Fusion見兩款即日到期的乳酪在清貨速銷，特別是有喜愛的Corner品牌系列便又買來試試。

先講講Corner的，一般Corner的乳酪包裝是果醬放一格而乳酪放一格，由於分開放所以總份量是比其它品牌稍多。而這款是一格放了包了薄朱右力的球形餅乾及塗上了金色，另一格是乳酪混入加了溫尼拿的拖肥糖漿，溫尼拿味幾淡，朱古力餅份量頗多，乳酪話係用忌廉做好像高檔點及本身加了糖。整體不太甜，成個配搭複雜得來味道幾討好。未試過而喜歡食乳酪的值得推介，另外還有幾款口味如香檳士多啤梨等有機會再試。  
至於另一款Danone的亦有些驚喜，叫得Greek Style就預咗乳酪會頗杰，還好未至於膏狀，這款下面用的是啤梨果肉粒加糖漿，明顯比用啤梨果蓉的果醬高檔得多，整個啤梨粒糖漿及乳酪有相當香濃的啤梨味有點像加了香精。整體略偏甜而乳酪味較淡，講真成盒似甜品多過似乳酪，飯後當甜品食應該相當不錯。  
試完上述兩款乳酪，奶製品似乎又進化了。

元朗 - 貳郎燒雞扒

這間店去年中曾經幫襯過一次，那次叫了炒粉麵及湯麵之類的東西真係炒得好差好難食，只得豬扒包叫做食得吓。這次再去食早餐食物質素明顯比前好，招牌的雞扒確是幾好味，似乎是即做的，雞皮雖然唔可以話係脆但唔係好油，雞肉亦不會"乾爭爭"，這點明顯比有名的榮式雞扒好，唔錯唔錯，係細塊咗啲。  
至於湯公仔麵，睇樣都知唔應該有任何祈望。檸茶亦只是一般貨色。  
至於加錢選的半份多士估佢唔到又做得好好喎，麵包夠厚烘得亦剛剛好，唔知係唔係人少關係注意麵包是切完才烘所以切口邊也有烘到。

鰹魚素

在阿信屋買的小袋裝鰹魚素，每次煮完急凍烏冬用它來作湯底都幾好，一盒正價約三十蚊，當然特價七折時更底。細包裝較衛生及方便，每次一小包開大半飯碗熱水，味道就係出面舖頭食烏冬時湯底的味道，好過成日用雞粉。

尖東 - 煌府婚宴專門店

這次一大班人去這裡食晚飯，個場本身主力做婚宴所以裝修得幾靚但亦因此平日非常靜得很少很少人幫襯。  
點了一圍全包宴，價錢都可以。乳豬海蜇講真幾差，海蜇以酒樓質素來講是相當差，又鹹又唔爽脆，乳豬就有點淋但少人點好多時就係咁無計。上湯龍蝦伊麵碟頭係大但唔夠鮮味，花姿炒豬頸肉就正正常常。  
生菜蠔豉崧有點驚喜，食法有點像片皮鴨用粉皮包著食，蠔豉崧炒得好香口幾好味，唯只得生菜及海鮮醬配襯就有點失色。  
蟲草花野菌浸菜相當行貨，同飲茶一般點的蟲草花浸菜無乜分別。  
蒸石斑有點蒸得太熟，都係果句今時今日好多食店情願安全點蒸耐點所以蒸老一點都可接受，味道亦屬酒樓正常水準。  
南乳黃金雞只係唔多覺有南乳味的炸子雞，皮吹得夠乾炸得夠薄，奈何炸好後可能放久了才送來皮已有點通風淋了，調味亦差了些。  
南瓜帶子粒炒飯本身炒得頗好帶子亦多，飯夠香夠乾身但奈何煮時稍稍唔夠水所以飯香得來帶點硬。唔肯定橙紅色的是紅蘿蔔還是南瓜，但翠肉瓜本身就是南瓜的一種所以點都是有南瓜在裡面。  
甜品就是桂花糕及紅豆沙，桂花糕味道幾好不過大菜太多過實了點，紅豆沙用的紅豆唔靚所以唔夠香唔多好食。  
整體味道只是不過不失，餸菜鮮味總是差咁D比較似一般屋邨普通酒樓咁，這也無可口非，若你有咁多間酒樓你都會叫你最好的廚師去最旺那幾間分店返工吧。而碟頭有返咁上下大，唔係咁大食的話十二個人好夠食。

麥當奴 - 招財分享盒

對個餐幾有期望結果又幾失望，雖然味道算可以，但無諗過兩隻香烤雞翼會咁細隻且又咁乾無乜肉汁，明顯比之前點Jack那個分享盒差，話晒之前都有4款特色醬可以點可以混，問題只是4款醬彼此間味道唔係太夾不太適合混在一起點，特別是韓式醬味道太搶會完全蓋過其它醬料的味。不過來到招財分享盒就一點特色都沒有，麥香雞、脆香雞翼又是平時那些，點的醬又是平時點雞塊那些，同新年更無乜關係，最慘係一個人都唔夠食又食唔飽，重點同人分享。

赤柱 - 鐘菜

來到赤柱可以食野嘅地方似乎好多但頗多價錢都唔平，剩底較平的似乎得麥記同市集旁一些巷仔的細餐廳，由於這天是平日關係，所以選了鐘菜。它星期六、日價錢相當貴，一碟點心閒閒地都要三十幾四十蚊起，而星期一至五點心就全日半價，價錢同外面屋邨酒家正價差唔多，不過佢又免茶免加一喎。

鐘菜其實是稻香集團其下一間較高級酒樓，去年初也曾經幫襯過一次，由於門面大坐近門口有機會很多麻雀飛入來同你爭野食。這次再去服務明顯差了，待應變得更冷漠，而點心籠由全矽膠製好多改返用竹製，個人覺得竹製更好更有飲茶的那份情懷，亦不覺矽膠蒸籠為較衛生或新派高檔。

講返食物，點心選擇唔算好多，水準一定比一般的稻香好但唔可以話好好，只是點都對得往半價後的價錢有突，而正價就顯得唔值。點了的醉雞味道可以雞幾滑，酒道算夠。燸米飯就好行貨唔算好食，好多普通的酒樓亦能做得更好。鳳爪幾大碟，用的雞腳本身是較好較厚肉那類加上醬料幾好幾野味，唔錯唔錯。其它的小籠包及糕點等亦屬正常預期之水準。整體最大問題又是頗鹹了些。  
點解最近食野經常出事?菠蘿叉燒包又出大問題，表面睇落都無乜唔妥，但咬落去就出晒事，個包重係生架，麵包的粉團仍然是糊狀明顯未熟，講過好多次這類搓出來的中式粉團一定唔可以唔熟否則有衛生問題。結果當然是換過，廚房全部返焗然後俾過碟新的，奇怪的是為何之前沒有人投訴，莫非照食?

光輝圍 - 759茶餐廳

這次算是有少少特登去這裡食野，看看雷聲咁大的759茶餐廳如何。在門人有價目表列出所有供應食物，奈何有約一半是指定時間供應，不過有很多茶餐廳都係咁。至於價錢，散叫在同區來講係貴，無它，這區租金算平，食客以工廠寫字樓為主所以一般價錢都要平，三、四十蚊連飲品的套餐一街都係。而這裡午餐三、四十蚊算是合理。  
點了鐵板蒜茸羊架拼司華力腸意粉及焗牛扒煙肉飯，奶茶及檸茶。無錯茶餐廳是咁畸形先上咖啡茶，奶茶算不過不失茶餐廳水準，唔係特別香滑但都可以的。檸茶就得啖笑，淡到有點似檸水，就好似你飲了大半杯但又想飲多杯喎，於是就倒杯熱水入去倒滿再飲過咁，而且只是微暖，難飲極。  
例湯中湯唔知是什麼湯只見到有隻雞腳，湯的味道就好似你將任何處理食物時剩下的東西全掉入去煲，咪即係餿水咁味，唔講都估到唔好飲。  
而西湯姐姐話係羅宋湯，由於無肉所以其實應該係雜菜湯至啱。湯內有很多雜菜，味道可以的只是略欠鮮味，最簡單改善方法咪加些雞粉入去，否則要維持素食略加多一點糖都可。  
主菜終於出場，鐵板好熱汁的味道幾好，兩隻羊架的肉都唔係好完整唔知點解，無乜羶味，意粉有很輕微的爛應是煮時水溫唔夠但仍好過好多茶餐廳。  
焗牛扒飯味道亦唔錯，上面加了芝士焗得夠燶算是Bonus，令香氣及味道加分不少，米飯亦唔錯，或是用返自家入口米所以唔駛用最平的米，最大問題是牛扒加得太多鬆肉粉所以無乜咬口。  
兩份主菜以價錢論是幾好味但就有同一問題略偏鹹了些，記得鐵板會極速揮發水份個汁略淡會較好，而一般芝士或煙肉因有鹹味加親個汁亦都要減鹽。

同場發生了小插曲，遠處有人投訴但內容聽得唔清楚，估計是第二枱客點的同一食物兩次送錯去佢張枱，佢好'興'又驚人計佢錢。當時兩個餐廳話事人處理得很好不停賠罪而沒有在任何客人面前講過任何其它說話，反而部份食客同伙記不停地在遠處講駛唔駛咁緊張。點解拿出來講?第一係無論如何食店都是真的犯了錯，不會因為小事就唔係，第二同客人理論或俾說話佢聽是極蠢的，所以就算在該客人面前，或在客人離開後在其它客人面前亦不應評論任何客人的行為或問題。最後一點是很多食肆都會犯，暫時未見過有任何一間能正確處理，就係食物離開了任何店員的監管後那怕只有一秒鐘，該食物都要扔掉不可再拿給其它客人，因為你不會知道其間發生過什麼事，拿錯枱就應是直接損失。

講一個真實個案，有次去食魚蛋粉，同枱有個呀伯可能怕熱所以食麵時將自己飲開杯茶倒點落自己碗麵道整凍點才食，其實有很多戴假牙的人都怕食很熱的東西。咁佢食完一碗再叫多一碗，點知個伙記拿錯隔離枱碗麵給他他直覺便馬上倒茶入麵內，之後又馬上發現唔係佢要的野就同伙記講，伙記二話不說將佢碗麵拿過隔離枱，前後只是幾秒間發生的事。

美國 Envy 蘋果

今年有很多日本的玉林蘋果賣，周街的生果舖都有，講真係幾好食，不過自從食過美國的 Envy (愛妃或艾菲)蘋果之後，估唔到玉林蘋果幾近被完全 KO，無論蘋果的香味及甜度，Envy都能輕易勝過玉林，而且兩者價錢幾近相同。真係再俾唔到原因點解重要買玉林蘋果而唔買 Envy，或者唯一不及的是 Envy 爽甜得來肉質比較硬，要有番一定牙力才好，長者或不太喜歡。