沙田 - 富臨魚港

如果有最差食店推選，一定推薦這間富臨，多間的富臨服務差已不在話下，這間更是在表表之列。當然也有服務好的分店，例如之前講的新蒲崗店就幾好，太子店亦唔錯。  
食物本身都可以的，唔算話好好食但就差極有個譜，下午茶點了幾個點心只有蘿蔔絲蝦餅較差比較硬無乜味唔多好食，蘿蔔糕就無料較得舊粉，除此之外都可以反正特價之下都底食。  
講返服務基本上開完茶收完order紙後係唔會有人理你，反正無論有幾多個待應見到你想叫佢地沖水或收食完的空碟佢地都會當見唔到，兜口兜鼻叫佢地佢地應完都係唔會做，沖一壺水就用了二十分鐘以上，最後終於有待應沖水但極慢動作同黑面，當然唔會沖第二次水。食完的碗碟絕大部份枱都是下午茶臨完要清場時才推車仔一次過所有東西收，咁既服務真係難得。

還有碟煎釀茄子本身應好樣點的，但放在枱後馬上拿回換過碟較差的，好樣點的留返俾人。之後重話唔準自己出櫃面埋單，超，唔駛旨意會俾貼士。其實幾日前才去這裡食過火鍋，感覺上服務都無咁離譜，真係唔知搞乜鬼。

耀安 - 富東閣海鮮酒家

估唔到之前的東城咁快玩完變了現在的富東閣，看門面及裡面的裝修都有些格調，價錢都是差不得幾多。由於早茶的特價點心不多及在同區裡不算便宜，所以以早茶來講是有一點貴。  
看看食物質素，先來特價的鳳爪排骨飯及金針雲耳雞飯，餸比想像中少一點，味道幾好，飯幾香。  
不過蛋黃蓮蓉包就很過份，蓮蓉正常的，只是蛋黃少到......這不是個別情況，三個包都是這樣，蛋黃約只有一粉飯咁上下大。老細，叫蓮蓉包算把啦。  
叉燒包味道麻麻地都可以，綿花蝦丸亦都只是麻麻地講真唔係幾好味唔係幾夠鮮味，蝦膠幾鬆散。最後的生煎包本來好有期望，因送點心的呀姐在你面前將一點酒倒入去才開蓋，包下面亦有洋蔥。可惜真的可惜，首先呀姐因不熟手酒倒了在煲蓋上便馬上開蓋，根本沒有在鍋內焗一焗，何來酒香，二來包本身唔好食，饀少肉更少，調味亦唔好，整體說是唔好食。  
留意這酒樓剛新開很多東西例如食物質數也不能完全作準，除時師父也未必已全上班，只是這次的水準真係唔見得人，希望幾星期後能多多改善。

Godiva Messages Tout Chocolat Limited Edition

這朱古力是別人從外國買來送給我的，是專為旅行人事而設的特別版。紅色的盒子入面裝有四款不同的朱古力，樣子都幾"潮"(其實有點祖國feel)。先試綠茶味，只有入面一層薄薄的朱古力夾心醬料有綠茶味，所以茶味著實幾淡，濃返點會更好，其實另外三款請況亦差不多只是沒綠茶饀薄及淡得咁誇張，朱古就相當幼滑。  
雖然有頗多女士都好喜歡這品牌，自己對這品牌卻沒有特別偏好，特別是香港的朱古力賣得這麼貴，同一價錢選擇著實唔少，這款未必是自己的首選，但無論如何收到後仍是很喜歡。

海怡半島 - 淘園宴會廳

這次是去這裡喝下午茶，老實講句，水準是有點失望，食物只有炸馬蹄糕做得較有特色及較好(照片少了一塊因吃了才記得拍照)，其它的味道都較普通較一般，部份更加唔算係好食那類，除此之外亦沒什麼好講。  
價錢是有一點點，雖然餐後按總價格送晚飯現金卷，但由於不打算在這裡晚飯，真的得物無所用。

中環 - 沾仔記

沾仔記都算是一間有氣的雲吞麵店，近年來都開了頗多分店，這次試試中環落樓下這間。  
雲吞有三粒大大的雲吞，都有幾多蝦肉，麵都可以唔算好出色彈牙，算是保持水準。話口未完，咬開其中一粒雲吞，入面有大半竟然是生的，蝦肉還呈透明狀，既然蝦肉都唔熟唔駛旨意入面的豬肉會熟。極失敗，極失望。  
另外點的一碟菜心，落單時要求烚淋點，結果落單後唔駛一分鐘就送到面前，擺到明是預先一碟碟整好晒，邊個叫就落點蠔油落去，所以碟菜只有微暖，及一樣咁硬無淋點。碟菜雖然是正價但估佢唔到咁細碟，且蠔油一樣咁少。


整體除了失望就是失望，還有些少擔心會肚疴。

Merci 朱古力

經過深水埗家興超級市場，見Merci的禮盒裝朱古力正在清貨，相信是過年時的剩餘禮盒，德國製造每盒400克賣$29.9，重底食過其它平價排裝朱古力，緊係要支持一下。  
打開禮盒，估唔到是排得滿滿的，唔似很多其它牌子入面得幾粒。一共有七款味道，除一款有八粒外其餘六款均有四粒。話咁快食勻七款味，朱古力很軟滑，一入口就溶，唔錯唔錯。咁既價錢，底食到爛，馬上走去藍白色超市睇睇，原來賣緊八十幾蚊，過兩日經過如果重有得賣，一定要入多兩盒。

長洲 - 郭錦記餅店

要講長洲的餅店，又有邊間出名得過郭錦記，全因佢地的平安包是供應給太平清醮用。  
要買平安包也不太容易，就算平日都要早一點去，否則想睇吓個樣都無得你睇。老闆話壽包其實一樣啫，入面一樣係蓮蓉同蛋黃，不過平安包唔只得蓮蓉饀喎。壽包的蓮蓉都幾好，蛋黃好似有1/4個，包皮較厚唯幾鬆確係做得唔錯，可惜凍了始終無咁好食亦無咁香口，拿返屋企蒸返熱應更好食。  
同場加影江酥餅同合桃酥，江酥餅有兩個尺寸，都正常唯味道比一般的較甜口，合桃酥就真的好脆好食。講起傳統的合桃酥，真係唔知被騙了幾多年才知道合桃酥跟本是沒有合桃的，就連合桃香精或香油都沒有，奇怪奇怪，現今有幾多人知道這個事實呢。

日向夏

今年在香港都幾多日向夏賣，連稍大間點的超市也有，睇落去幾似一個黃黃地色的橙，切開來睇橙肉樣子同西柚好似，其實都唔知係原種定係雜交的。味道有少少酸酸地，有點似橙又有點似西柚或碌柚味，果肉味道麻麻地，只是果皮沒太多苦澀味所以可以連皮一齊食唔駛搣皮咁麻煩，連皮食也有一種特別的香味吃起來更好食。