微熱山丘 - 鳳梨酥

自己不是特別鐘情這些貴價鳳梨酥，不過有人送就當然食，看看這個微熱山丘的鳳梨酥怎麼樣。  
包裝真的幾靚，可能由於是台灣買所以有個布袋裝著，紙盒又有條蝴蝶形橡筋，打開來看亦很精美，鳳梨酥這家東西的包裝在台灣真的越來越誇張，可直迫日本。微熱山丘的鳳梨酥似乎比其它牌子稍稍大件一點，酥皮幾薄且由於形狀較四方所以鳳梨與酥皮的比例會較高，食落口會食到更多鳳梨肉，愛吃鳳梨的人更易覺得它比其它牌子好吃。  
味道方面都幾好，比很多牌子好，不過由於是放得較久接近食用期限才食所以不作多評。鳳梨酥這家東西跟一般中式酥餅一樣，剛出爐不久時最好吃，頭幾天還很好，之後味道會越來越差，所以很難比較那種牌子較好食，即使同一日出爐，每一天都可能有點分別，亦因為這樣在香港買到或食到的很多時候都沒台灣專門店買到的好吃。

大埔 - 陳漢記粥麵專家

這是在大埔一間相當有名氣食腸粉及煲仔飯的地方，由於日間沒煲仔飯吃，只好主力吃腸粉。  
先來一杯奶茶，屬於做得好的港式奶茶，只略略唔夠滑。另外一碗及第粥自己沒有食過所以不作評論，聽聞都可以的。  
主角腸粉終於出場，有蝦、叉燒及豬潤腸，食了一口，唔係呀，試勻幾款，更覺唔係自己杯茶，粉皮是有點薄但就較爛，更加唔係咩玻璃腸粉，豬潤都幾碎且又唔係好特別，叉燒更加唔算好味，豉油醬料亦無特別，整體自己覺得唔好食。  
再試試炸兩，真係差到無朋友，油炸鬼又淋又韌，腸粉又爛，試一次夠晒皮。

沙田 - 小王牛肉麵

這店開了好一段時間都沒幫襯過，又試試它的下午茶。  
先試試原汁牛肉麵，湯底都算可以但牛肉味不很濃，之不過太鹹了，牛筋太淋沒咬口，麵條算可以，整體合格但唔算好好味。滷蛋豬扒飯只屬一般貨色，同樣地算合格但唔算好好味。  
至於台式炸醬麵睇樣就知唔好食，唯食落更差，只能用很難很難食來形容，得個甜字但甜得來又唔好味，雖然得好細碗但都真係骾唔落。最後的鹽酥豆腐就'淡茂茂'，差不多等同炸好後沒加調味一樣。  
最後的台式蜂蜜冰茶味道正常好飲只是略甜了一點，估唔到有正常台式奶茶店賣的那麼大杯。

新蒲崗 - 富臨漁港

要數市區酒樓的任食火鍋，相信這裡都是數一數二的平價。同朋友來這裡打邊爐主要是貼貪易搵位及易搵車位，好耐無去過今次再去估唔到價錢重平咗，留意海報上的價錢才正確，火鍋紙上的不正確，而開始時間應是晚上6:00才對。  
肥牛都可以的只是唔記得影相，配料都是正常任食那些質數且算是唔錯，一樣有汽水啤酒但就沒有竹蔗水等飲品，可能人不算太多服務都可以，這個價錢沒投訴了。

中環 - Brasserie Le Fauchon

中環的 Soho 都真係有很多餐廳，要食勻晒都唔容易，這次去食的是假日午餐，價錢算是比較平。  
首先是法國長麵包，相信是普通麵包店交來的，所以是正正常常麵包店買到的水準。比較特別的是麵包任食，唔夠可以問侍應再要，旁邊一小片是牛油。  
其中一個餐的頭盆巴麻水腿蜜瓜沙律，樣子靚唔靚就見仁見智，沙律汁味道很麻麻亦唔多夠，蜜瓜較生只有少少甜，火腿因價錢關係亦較一般。蟹籽蝦湯份量很少，大啖點幾啖就完，味道其實近似蕃茄湯多過蝦湯，都可以的。  
主菜紐西蘭羊扒伴蒜茸汁味道都可以但又唔算好好食，賣相就麻麻地伴碟功夫唔多得。  
甜品選了 Tiramisu，這些一家大細會食的餐當然唔會有酒味，不過跟 Tiramisu 真係唔多罅間。味道同一般屋邨做得好少少的餅店分別不大。最後的咖啡茶無乜好講，味道比一般茶包的好但比好的茶餐廳差。  
另一個餐似乎同餐牌寫的好唔同，不知是否點錯了另一個餐，沙律是鴨胸沙律及粟米湯，主菜是羊腩，味道同用些少鹽白烚沒多大分別，羊腩是淋的亦沒有膻味，不過真係唔係我杯茶只能用唔好食來形容。  
最後的甜品蛋糕仔亦唔好食，好在極細塊。  
水準當是高級茶餐廳較好，反正價錢亦只屬高級茶餐廳或稍為貴一點，唯部份食物碟頭得細。

東涌 - 聯邦皇宮

這次去飲下午茶，下午茶點心價錢較一般大形屋苑酒樓貴少少，又睇吓食物係唔係好一點。  
釀矮瓜是正常樣子正常味道，只是上面加了點木魚片送來時好像日式煎餅咁郁吓郁吓幾得意。  
牛百葉味道算不過不失，面的一層牛百葉蒸得有點老有點韌，中間的就沒問題。  
流沙包外表幾好樣，不過搣開真係唔見得人，包皮厚到......饀少到......真係得相中見到咁多饀，味道亦只是麻麻地。突然好懷念以前灣仔新星的流沙包，有好香的鹹蛋黃味且能見到有少少鹹蛋黃油，不小心吃真係醬爆噴汁的，不過兩三年前已有點走樣試過幾次都無咁好食，最明顯是無咁香鹹蛋黃味無咁流心無咁多饀，饀顏色由較橙黃變成吉士醬的黃色，唔知係咪換過師父，雖然仍比很多食店好食但特登去食就無謂了，好耐無幫襯過現在如何就唔知了。  
這裡的雞扎就唔錯，起碼是用淮山等的較舊式做法，雞幾滑沒上很多粉，成碟都幾好味。  
整體不計算流沙包只算幾好不過不失，與大形的連銷酒樓差不多，係咁又為何要俾多少少在這裡食?或是地區因素選擇不多吧，附近的富東亦不見得好樣。

元朗 - 雷神

以經沒去加太賀不知多少年，佢以前個掌舵人在元朗開了這間店便又去試試。店內頗多咭片及手寫粉筆牌寫上價目及當日推介等東西，也懶得理佢寫什麼，揭揭餐牌點了個豬扒拉麵及極上活白鱔串燒。  
豬扒都唔錯，比很多這類店要好，只是炸得有點過火老了點，否則會好很多。旁邊的沙律就較行貨，沒有任何特色或好味的醬料確是遺憾，只得一個最基本的沙律醬，其實是旦加點東西入去沙律醬撈一撈都會更好，自已就加了一包日式介辣入去。至於拉麵，湯底選了醬油都幾好味，不過這裡的拉麵用熱鍋上且確是燒到很熱，湯熱到不得了滾咁濟，還記得之前說過這類湯麵最好要降溫嗎?這樣才可在吃麵時同時吸入更多的湯汁，這裡的卻是反道而行，熱到要吹凍才放得入口，這樣麵上只能留有很丁點的湯汁，可惜可惜，還有另一問題，鍋燒得實在好像仍在煮著麵條，食慢點麵會淋。麵中有半隻糖心蛋，做得時間剛好，有人唔明白為何這類糖心蛋表面都會上滷汁，其實廚房很多東西都很大味，若問你在飲用的水喉水加片檸檬有何作用或便會明白，當然亦好像矜貴點。  
白鱔串燒這個很好味，燒得時間剛剛好，香口得來仍有頗多肉汁，鱔肉仍帶點韌有咬口，即燒即是即燒不是那些整定的貨色可比，醬汁配合得頗好，只是有點貴及要些時間等，唔係叫多兩串。  
這裡似乎新人頗多，另外老闆及伙記亦可能不太覺得自己有時講野幾大聲，無錯大聲唔等於沒禮貌，只是聽上去卻有點怪。另外最後唔好下下點菜都好像俾全世界知道一樣會更好，話晒部份香港人會介意點得寒酸，或介意給人知道大食唔好意思叫咁多。