鑽石山 - 元朗學記粥麵

雖然在food court裡面，見到個招牌同門面都有點期望，但睇住佢煮，再睇睇煮完樣，好快就已經無乜盼望。  
樣子其實唔太差，好大個碗不過只係有好多好味精嘅湯，上面的菜都相當淋，麵只不過不失唔算彈牙，但最大問題係牛筋很差勁唔好食，牛腩叫做好點，不過這次不是叫肥腩卻很肥近半是肥肉而又唔係入口會化開那種，味道較一般即通街都唔難食到那種。另外碟菜細碟到呀。

九龍灣 - 御苑皇宴

這次這餐食得真的很快，因為是下午茶時段接近二點半鐘才入坐，而酒樓方面入坐時已講明要早交場給人擺酒。拿起點心紙便剔剔剔，因為當時很多人都接近食完，叫點心的人不多所以點心來得幾快。來唔切每樣慢慢品嘗，只能說點心都唔錯，由於週日點心價錢平很多所以以折扣後的價錢計係唔錯幾好食，但若以平日貴很多的價錢計就唔多值。  
衝衝食完埋單已差不多清晒場。這紅盒子商場是很奇怪的，曾試過週日三點幾未夠四點在這商場想食下午茶，都沒規定中或西只是唔想去food court，但絶大部份食肆已做完下午茶有些已"打樣"休息或已開始提供晚餐，無它，人流少索性唔做。

九龍城 - 同心泰國菜館

九龍城有好多好多的泰國菜，要選一間都唔容易，特別是一間未去過的。這次見到同心，由於門面都不是特別光鮮，自己都沒諗過要去幫襯，不過同行有人堅持，即管睇睇點。

坐低先來了兩小碟小食，是魚仔乾，不過真係好辣好硬，講真除了辣之外，味道其實幾香口。  
之後的海南雞飯，唔算好特別，味道唔錯。  
泰式炒通菜正正常常，味道亦幾好。  
炒泰式粉(人地點的唔肯定個名)都好食，圖中紅色的是蝦仔而唔係辣椒，中間大片的是豆腐乾，整體較黏及甜比一般食到的濃味，幾多料幾野味，唔錯。  
最後的泰式豬頸肉估唔到個汁唔係放在小碟中給你點而是直接淋上面，上面綠色磨碎的是青辣椒，份量相信有半碗咁多，另加入了些紅椒青檸及魚露等，整個汁是超級超級辣，不過卻又好好味，下面的汁本身是煮菜汁不辣，但芥蘭慢慢吸了上面流落來的汁後便辣到飛起，愛辣的相信一定好喜歡，自己不太愛辣亦頂硬上吃了很多。  
這餐算是有些驚喜，味道比想像中好，只是有些食物較辣，所以要食得辣才好，但若叫廚房減辣就已經唔係同一樣野。

Marukyo 粟子紅豆燒餅

這款台灣製的粟子紅豆燒餅家興超市在清貨，每包5個只要14蚊感覺很底買，但注意食用日期只到8月5日，且這次清貨不是每間分店都有，相片拍自石陰分店。

上環 - 蓮香居

這裡之前都講過點心只是麻麻地，但就勝在夠懷舊可選焗盅唔要茶壺，而且這裡的茶葉在一般的酒樓中算是比較好。既然點心麻麻地咁就唔講點心睇吓上次無食的古法鴨腳包同串燒金錢雞。  
鴨腳包有點似鴨腳扎都是將東西扎在鴨腳上，不過外面用的是腸，入面有塊半肥肉及大片肝，味道是叉燒的味。而金錢雞比想像中細片，用的肉比較肥，入面是片薄雞肝，這個比鴨腳包更肥膩，味道又是標準的叉燒味。由於兩樣野都幾油膩，食完滯到唔太想食其它野，而且講真兩樣野味道麻麻地，都係食懷舊多過食味道。  
一餐飯點可以就咁結束，行到樓下有新鮮皮蛋酥又要幫襯吓。買完後正徬徨點樣分來食，櫃面姐姐可能遇過很多同類情況，二話不說問你想點切，之後用膠袋入著刀子幫手切開，非常謝謝。味道當然不及得奇華，但已算做得唔錯，且價錢平過奇華很多，都食得過。

旺角 - 倫敦酒樓

講起上來幾失禮，這間老牌酒樓在旺角開業了都不知有幾多年，還是第一次去幫襯。以平日早茶的價錢來講是有一點貴，而這裡是自己入去搵位及有搭枱，當然人唔係咁多唔駛企起枱後面等位，且這裡仍有推車仔賣點心，又是少數仍保留這些傳統的酒樓，另一傳統就係唔準自己出去埋單要侍應拿本薄來埋。

最估唔到的是點心真係有些驚喜，雖然唔係樣樣好但整體都對得住個講錢。最初影的相唔知點解損壞了所以只剩得幾張相，牛肚、牛栢葉、鳳瓜只一般，好多地方都沒有賣的魚翅餃味道都可以，蝦餃、灌湯餃亦正常。普遍點心就是價錢內應有的水準，既然一開始已講有一點貴所以其實整體是比一般酒樓水準好一點，但又未至於突出。  
之後突然見很多人出去排隊拿椰皇燕窩炖鮮奶咪又去排埋一份，果然真係做得很好，奶滑得來很有椰子味，這不是香油的味，可能是椰心水加埋入去一齊炖，不會如很多酒樓般滑得來只有奶味。

沙律冷烏冬

天氣熱到死，自己做個簡單的冷烏冬食算了，最復雜可能就是加了些腰果。

任何生果也可，見雪櫃有車厘子及一些杏脯乾就用這兩樣，車厘子去核杏脯切絲，一份沙律醬配兩份日本芝麻醬做沙律。腰果稍稍洗淨用鹽水浸5分鐘等佢有點鹹味，隔水稍吹乾後放入冷油中開鑊中火炸，油滾調細火再炸一兩分鐘便可撈起。烏冬是阿信屋的由於較硬煮4分鐘，過冷河再浸冰水，由於芝麻醬有油份所以處理烏冬時不用加油。撈起稍弄乾烏冬撈入沙律中，放入雪櫃雪十分鐘讓烏冬吸汁，試試味若不夠再調入芝麻醬。上碟後加了些火腿絲及灑腰果(腰果沒壓碎了)便成，半個鐘搞掂有得食。

機場 - 陳褔記

似乎是來自新加坡過江龍開的食店，見唔係好好生意，價錢有一點貴相信是原因之一，二號客運站唔就腳就是其二，又睇睇味道如何。

先來一個蜜汁叉燒，同食過的港式唔多同，肥肉不是夾在瘦肉中間，瘦肉較硬，味道麻麻地，仍是覺得港式的好食好多。  
店舖自稱的十大名菜馬來參峇海鮮炒飯，沒想像中特別，係多了些乾魚仔，有少少海參，都有幾多海鮮但有一丁點過熟，今時今日一丁點過熟可以接受，味道都可以但又不至於好好食。  
豆腐班塊煲，這個幾好食喎，係油咗啲，不過食得炆煮炸過的豆腐都預咗，只是它比正常再油一點。個砂煲有點裂同好汚漕，要換了。  
西檸雞，和正常在酒樓食到的沒大分別，雞有點過乾，汁夠多夠檸檬味，整體都好食。  
講真味道只是一般，特別是頭兩道菜，或者是口味問題，而接下來兩道接近港式口味的反而較好吃，不知廚師本身是否本土中式大廚。侍應比較年青，服務相當好。

淘大 - 鴻星海鮮酒家

記得早兩年曾經去過這裡飲喜酒，當時覺得這裡酒席的東西幾好食，這次有機會又去飲早茶睇吓點。

平日早上這裡不難搵位，無它，就算早茶平了點價機仍相當貴，一個最平的孖寶都要四十幾，稍貴的已經要過百，而且只比正價便宜很少，唔難理解為何這麼少人。唔理點樣睇睇食物係點最實際，老實講句，點心水準都幾平勻，平勻到完全沒有驚喜，平勻到和很多比它便宜近一平的酒樓唔會有太大分別，若唔睇價錢及唔知是那裡做的點心，亦只能說是一般不過不失。例如做得相當差的魚滑刀削麵，麵咪台灣乾的刀削麵，魚滑咪酒樓最行貨那種打邊爐鮻魚滑，湯底亦只是無乜味的味精水，這組合本身或者是可以的，只是當時做得明顯無 heart。咪以為這麵最差，還有更差的皮蛋瘦肉粥，粥底還可以，只是成碗粥近乎是無料的有味粥，只得很丁點的皮蛋碎及近乎找不到的肉粒碎，可能做二百碗這樣的粥都用唔到一隻皮蛋及一兩肉。就以這兩款點心來計，唔係話佢難食，只係俾得咁多錢唔會預期食啲咁嘅野。

來這裡或者真係食裝修，個人覺得完全唔值這個價，而服務以價錢論都算緊緊可以。

長洲 - 海龍王海鮮大排檔

在長洲食海鮮的舖頭都幾多，這次試試碼頭附近這一間。這裡的海鮮其實都不平，只是坐在海邊確實可以見到日落美景，景觀相當好，不過大熱天時就有點太熱。

味道整體其實麻麻地，稍為特別可能就係有用真的豆豉去做菜，另外長洲炒飯(好似係咁叫，由於唔係我發牌所以唔太肯定名稱)比預期中好食，中間有些少提子海鮮咁，由於裝了一碗才記得拍照所以看上去右上角少了點，實際是全碟滿的。用猛火炸的豆腐都可以，若多一點椒鹽會更好。  
酥炸生蠔就做得唔好，主要是蠔太細隻而炸粉很厚，炸得亦過了點火，且沒有特別醬汁點感覺始終差點。其餘蒸的象拔蚌、扇貝及鮑魚仔都比想像中細隻，蒸的火喉算可以，只是調味又是差了點，沒用好的豉油提不了鮮味。