馬鞍山 - 大阪王將

又是另一間在試業的日式食肆，雖然之前都幫襯過其它分店覺得水準很麻麻，但新屎坑當然又試試。

點了個豬骨湯底東坡肉拉麵，唔算大碗，麵條無乜特別，東坡肉比想像中肥及無咁入味，仍算不過不失，不過湯底就幾差，唔夠濃味之餘重幾味精感，之但係個醬蘿蔔就幾濃味，結果成碗湯就只得果種漬物的味道。老實講句價錢$72唔算平，係人食過相信都情願比多十幾廿蚊去那些有名的拉麵店食，只可惜馬鞍山區沒有那些拉麵店。  
蒜片牛肉定食同樣是$72，牛肉片算幾厚但不韌，但個汁相當甜而又估唔到落了咁多蒜片都無乜蒜頭味，應是用買回來已炸好的蒜片，個蘿蔔漬物又係頗甜，唔係好明點解近期很多不同的日式食肆的漬物都很甜，而個麵豉湯就真係得麵豉同鹹味，唔多覺有木魚味。  
最後加錢配的原味餃子，相片拍出來仍可以，只是實際樣子是煎得頗濃，除此之外其實幾好食，皮薄及算有汁，味道亦唔錯。不過見到有些人點的餃子賣相相當嚇人，燶到有點近乎黑色，燶到咁不是早應扔掉嗎?最奇怪是食客竟然唔投訴。  
老實講句，以這次的水準來講價格起碼要調低兩成才算是比較合理，希望這都只是試業的問題並能很快得到處理，否則都有點危。