元朗 - 深仔記

這是自己最喜歡去吃雲吞麵的其中一間店鋪，麵條及雲吞雖唔錯，麵雖未至於最好但都幾彈牙唔太重鹼水味，亦煮得好放底時麵條緊緊唔熟，但這都不是去吃的原因，原因在於雲吞湯底。記住麵條只得少於一分鐘黃金時間去食。自己的畸形食法是待應一放底後先飲啖湯讓麵稍吸一吓湯，用筷子成個麵夾起用口吹幾下吹散熱氣後才放回湯裡狼吞虎嚥。好的麵湯除了味道外溫度掌握亦十分重要，微燙不太熱既保留鮮味亦可稍延遲把麵條浸淋的時間，同時亦決定了你一口可喝下多少湯汁感受到何種味道。  
這裡的大地魚湯頗濃及鮮甜，大地魚味不會太搶。唯遺憾是湯的味道有時幾漂忽，唔係次次都咁鮮甜，有時會幾淡味吓，較保險是平日較少人幫襯時才好去，這亦只是較保險而非保證的方法，但起碼麵一煮好就可馬上放到你面前。

禾輋 - 龍悅

這次主要係幫襯佢個阿拉斯加蟹宴，因為有人極力推薦話好底同好食。又睇睇點。

單睇菜單確係幾底，只是一行人唔夠十二個有點擔心食唔晒。  
唔續樣講了反正做得幾好，味道唔錯合格有餘，碟頭亦比想像中大。香妃雞是一般正常酒樓鹽水雞，或加了很小酒或味去浸(因要去臊味)。阿拉斯加蟹話是活蟹清蒸，中蟹尺寸，鮮味及肉質比急凍好但就唔係十分明顯，隻蟹很多膏及白膏。  
魚做得好滑只是斑球炒得有點輕微過熟，今時今日因安全至上絶對收貨，而蒸的頭腩就蒸得剛剛好亦好好味，不過魚肉起得很乾淨所以無乜肉食。  
冬茸海鮮燴燕窩都好味，只是與其它菜拍埋一齊略略有點失色感覺無咁高檔，因為冬瓜茸幾多而燕窩唔多覺。  
鮮雜果花姿丸其實無雜果，是簡簡單單的炸蝦丸入面溝咗些花姿粒入去，熱辣辣時食超熱氣但亦很好食，正。  
飯及麵基本上無食過，因為飽到真係無能為力。紅豆沙本應都OK的，但唔知點解很苦，入面唔見有連子，而算無去連子芯亦未至於有咁苦，雖然係近似的苦味，真唔知點解。  
雖然唔講得好好食但已相當唔錯，睇埋價錢亦唔算貴，由於菜色較接近擺酒時的菜色，當扣返隻蟹都近成千蚊，二千蚊全包計外面未必食到其它菜色，碟頭亦大若唔太大食十四個人食都夠食。

大圍 - 三洋餐廳

去到大圍真係無乜太多野好食，一來貴二來選擇亦少，畀咗錢都唔一定等於食得好。諗住求其食個下午茶餐，見呢間餐廳都幾多人，真係所謂希望越大失望越大，都真係幾難食，豬扒炒意豬扒雖好乾鹹鹹地還算可以，意粉就唔好題，咬落很爛，另外那碟唔講都可能都唔知係星米，很濕又無乜咖喱味，亦好在無乜咖喱味因為咖喱一點也不好食。奶茶亦只是一般，重要唔熱只得少少暖暖地，無乜可以再講。

麥當勞 - 日日開More

今期麥當勞買一送一優惠17號又開始了，第一炮6件麥樂雞買一送一。

美食博覽 2016

係咪經濟唔好還是大會作了新安排，今屆美食博覽唔多覺同一公司在不同地方擺幾檔，亦唔知係咪眼大睇唔到，幾間龍頭公司似乎無擺檔，李錦記只有另一公司在賣它的產品，八珍、淘大、刀嘜、獅頭嘜同聖安娜等亦唔見。而台灣方面更無帶團過來擺檔。取而代之多了一些未見過的品牌，特別是業界的貿易場館多了很多大陸企業，唔係話歧視大陸人，佢地好多時只係派個人坐起道Hea或且瞓覺，又或者求其開樽醬瓜叫你自己"吉"來食，咁擺法不如唔好擺。

講返公眾館暫時絶大部份優惠唔算多，起碼外邊做特價時唔難搵到差不多價錢，只是這裡唔駛你去到處搵，所以見頗多人買野仍有點手緊。平的當然也有，例如梅林B2基本上100蚊10罐是幾樣罐頭任揀，咁當然首選圓罐火腿午餐肉。惠康方面亦有平，只是褔袋吸引力差了少少。  
無論大陸定韓國都用了很多不同東西餵雞生蛋，本都想買盒中藥材雞蛋試試，只是雪櫃已有6個國家的雞蛋在試，包括韓國蛋，再買會給人飛鏟，而且這口價Aeon減價時都一樣。  
出前一丁每年都係唔知佢想點，價又唔係平，唔通真係sale情意結。好似呢款寫住香港包裝的拉麵早幾星期惠康賣8蚊都無人買，無它，印象中得一個國家的產品會特登唔寫嗰道製造但又想人以為係第二道出，奇怪，會場工作人員話香港生產(唔係製造)(包裝只說香港包裝無寫邊道製造)，奇怪，反而而家貴咗重有d人買，奇怪。  
免費試食今年少了些，反而畀錢買的多了，尊貴區更甚。報紙講嗰d超筍免費試食真係撞唔到囉。

講少少業界區域，大部份主要國家的檔位數量均收縮了，之前講過中國除外，而其實還有日本除外且數量更是去年幾倍以上。日本人試食出手重，今年派得更勁，只要唔怕面朦真係可以食到你飽，當然到開放給公眾人事參觀時好多野可能已經派完。特別推薦日本豚肉及信越明星這蕎麥麵，非一般超市貨色，蕎麥本身唔起筋而蕎麥麵是韌且彈牙的，唔肯定加了什麼或作了何處理，反正很好食。  
在家電家品博覽那面見到德國寶推出了爆炒皇，好似好好玩咁，大轉盆唔知可唔可以用來炒粟子，不過估計火力或者唔多夠。

OK - Kabaya 綠茶百力支

OK便利店日本直送系列Kabaya綠茶百力支9小包裝賣緊$9.4一包，買滿50蚊重有9折，計返每小包都唔駛一蚊真係好平同好底，平過出面好多，加上綠茶朱古力味係自己至愛，當然唔執輸。留意這款朱古力會在較底溫度下熔，所以夏天要存放在較清涼的地方才可。

麥當勞 - 熱帶牛油果雞堡

已經好一段日子沒有幫襯麥當勞，這次佢推牛油果雞堡，睇完佢個電視廣告可謂完全提唔起興趣，甚至覺得應該係好難食的東西，估唔到點解麥記會淪落到咁嘅地步，出埋晒D咁嘅野，真係完全唔想食。點知近排無錢，死死氣諗住食個平價套餐，咁啱見到未食過而且都係比平價套餐貴多十蚊咪即管試吓。點知估佢唔到個包原來好好味。牛油果同醬汁都比想像中多，夾咁多牛油果食落都無"溜"的感覺亦無蓋過雞肉的味道，整體味道亦好，係鹹咗少少。雖然牛油果本身係好平的東西但在香港賣得一點也不便宜，計起上來個包一點都唔貴，值得推介，不過食就要找間做得較好同出手較重配料落得足的麥當勞至好去。  
真係唔明點解麥當勞會畀個賣得咁差的廣告出街。

佐敦 - 新新酒樓

據聞這酒家是附近結業的新樂酒樓老闆重開的。這次只是到這裡飲茶，若有機會都想去試一下晚飯看看水準如何。由於是平日關係，客人比想像中少，只有約八成枱左右有人入坐，由於位處九龍公園旁邊又位處高層，可以想像部份窗口大枱有無敵公園同彌敦道景，坐起道飲茶晚飯都咪話唔正。

講返食物，價錢其實比想像中平一點，和普通彌敦道的酒樓正價時段無大分別。點心方面唔係做得好精緻及有特色那類，雖唔講得好好味但以價錢論要收貨卓卓有餘。雞包仔做得幾好，但仍然唔夠流沙包做得好，夠流心饀料多包皮亦做得好，是做得相當出色的那類，要扣分就肯定是鹹蛋黃油香唔夠，就好似食月餅時蛋黃有否蛋黃油流出來一樣，不過中點廿蚊鬆d有咁水準重想點。

中環 - Ivan The Kozak

這篇文其實是出遲了，因為幾個星期前去的時候還是舊址而食店剛搬住新址營運。無辦法，電腦很多小問題，坐尾斑車升級Windows又搞了一大輪，到現在仍唔明點解經常打打吓中文會自己跳咗去變成打英文。由於只是搬遷，估計廚師都係嗰班，食物唔會變太多。這餐是團購飯，和散叫的沒大分別，只是散叫你未別會叫幾款咁近似的食物。

唔多識分乜野係東歐、烏克蘭定俄羅斯菜，由於東歐很多國家窮了很多年，好多時乜野放得入口的東西都會食，即係同早年的中國一樣，所以某程度上東歐各地的菜色都有點似，有時亦會與部份中國菜相似，當然比例上會更似西餐。

Fruit punch沒酒精的不過幾好飲，港式口味。紅白酒稍甜。  
烏克蘭排骨湯係咪成個中湯咁，只是煲完後加了些香草。味道幾清亦可以。  
沙律味道就如所見及所想一樣無乜特別，菜是鮮新的，沙律醬稍淡，兩款沙律的分別是是否在上面多放些臘肉。  
俄國傳統腰豆燴羊肩、俄國焗蘋果鴨胸及東歐煨香辣牛腩口味其實都比較似中式，似一般香港人睇完相後會想像到的味道，味道較淡不濃，米飯口味似印度米即無咁粘較爽口那種，初時食會覺得無乜味唔多好食，但撈埋汁之後就幾好食。  
之後的甜品有點失望，特色雪糕是維記雪糕。俄國士多啤梨薄餅入面的只是些少果醬，而且與頭盆的三文魚子薄餅是同一塊薄餅。烏克蘭蘋果批味道確係估佢唔到，那種味對年紀較大的人來講一講就明，年紀輕的人就不會明白。幾十年前有一種擦紙膠，上面印咗A-Z其中一個美化咗嘅英文字，而擦膠頂部黐咗一條綠色擦膠的。這款蘋果批差不多完全等同那種味。  
老細服務好主動好好，其它人就一個個主要係部份唔識廣東話唔知點去招呼你，整體幾好。食物雖說是烏克蘭及俄羅斯口味但稍偏向中式，除甜品外整體都算滿意。