旺角 - 唐宮

近來都有些有在談論維景酒店，因食自助餐有十人次送一晚酒店房優惠。自助餐興趣就唔算大，反而想睇吓入面間中菜點心如何。一行入酒店，完全有返咗大陸酒店的感覺，因為又係有同一陣濃烈的"up"味(霉味)加清潔濟味。上到酒樓，估唔到都幾多人。打開張點心紙都有些少嚇一跳，因為價錢比預期中貴，拍得住很多高級酒樓價錢。  
點了個皇太子海鮮炒飯，唔多香口飯亦唔多彈牙，味道都幾行貨，點對得住百四蚊個價，唔難找到4、50蚊碟的茶餐廳貨色味道可以把它KO掉，分別或只是無元貝粒及蝦細隻很多，但亦唔好諗住這裡的蝦好好食，唔多爽口彈牙。  
其它的點心也不想講太多，用料尤其是蝦比較好很大隻，但奈何處理得唔好蝦肉或蝦丸又係唔爽口唔彈牙，浪費。大部份點心味道及賣相同一般屋邨酒樓分別真係唔大，部份重因唔多好食你推我讓一輪至食得晒，不過這裡卻是屋邨酒樓幾倍價錢啊。海蜇燻蹄等亦差，似外面交來貨色，味道似超市貨。  
話說回來又唔係一無是處，例如滷水羊肉(祕製東山羊)就做得幾好味，係貴同唔係個個like。

馬鞍山 - 三上日本料埋

本身全完沒想過去食日本野，只是咁啱同人行過見佢剛開章便入去試吓。睇睇個價錢講真都係比預期中貴，話晒唔係屋邨價而係較大型商場價，滿有期望的。

只隨意點了幾樣東西，先來的三文魚腩壽司、八瓜魚壽司及北寄貝壽司老實講句十非失望，皆因所用的魚生質數十分差，近似平價又做得唔多好那類日式放題貨色，壽司飯水準一般。之後的火炙三文魚腩壽司沒想過三文魚是全熟的，味道不過不失。而三文魚脆脆卷由於三文魚品質差，基本上都沒有什麼好食，入面的脆脆即炸粉算是不過不失。食食吓想起平價魚有機會是大連來的魚生，而有些平價食店更會用淡水的彩虹鱒充當三文魚，心驚驚更加唔想食，相信應該係自已諗多咗。  
最後的叉燒拉麵，噢No，塊叉燒做得似中式的叉燒多過日式的，麵相信是較一般的香港製麵舖出品，都可以啦，而湯底幾濃味及滑，幾好，係無咗半隻雞。整體亦算幾好。  
講真師父水準都可以，只是魚生級數唔多對路，唔多對得起個定價，唔改改真係死得。

雪糕糯米糍

還記得曾幾何時香港曾經流行過日本出產的雪糕糯米糍，但今時今日要買到還是是好食的確是唔容易。這款小倉大福都幾好食，紅豆稍為偏甜，因只放在冷櫃而唔係雪櫃出售，入面的相信唔係雪糕而只是忌廉之類，皮幾煙韌。

其實之前一田曾經賣過一款非常好食的Mochicream雪糕糯米糍，紅豆好香亦是有點偏甜，不過要成三十蚊一個，唔知係咪太貴在今成初之後已無再賣。下次試吓去佢葵涌間Cafe碰碰運氣睇吓有無得賣同係咪一樣先。

尖沙咀 - Tutto Bene Ristorante Italiano

相信而家都唔會有太多人食西餐會想起去尖沙咀諾士佛臺，無它，感覺上貴。無錯，晚上去食餐飯兩個人一千蚊睇怕都走唔甩，不過可能你勢估唔到這次介紹的餐廳午餐價錢可以咁親民，近期都幾喜歡來這餐廳午膳。

午飯時間去諾士佛臺靜到嚇死，大部份的餐廳唔做午市所以選擇唔太多。這餐廳的餐牌常常改，由於相片是上兩個禮拜六拍的所以就主要講這次的食物。看看餐牌有六款主菜可選，每款都只是百多圓另加一小費，包頭盤、湯、甜品及咖啡茶，係咪好平呢，其實已經跌Watt了(即差了點)，因為頭盤無得選亦差了點。  
這裡的麵包唔知係咪外面供應，唔係次次同款但都好好食，會焗返熱(多士會烘了)才上枱，稍有點可惜是牛油放在麵包旁，其中一盒牛油掂到麵包後溶了，店方要留意留意。  
四式頭盤中風腿甘瓜卷及炸魷魚圈無乜特別比較行貨，欖油鮮野菌點解會係鮮冬菇，講過好多次好憎西餐用鮮冬菇，鮮冬菇味太"搶"西廚無幾多個做得出色，而薄切吞拿魚柳拍晒手掌，黑色一點點的不是黑椒而是未烘的罌粟籽(做麵包用的popper seed)，加上醬汁好食，無奈分量很少。  
鮮蠔周打湯估唔到真係有一隻煮了有味的蠔(有點似罐頭)及醬汁在碗內，然後才倒湯在上面，個湯很濃很好飲，係過杰了些。而另一款雜菜湯比較清，有些少肉粒咁，無咁好飲但都算可以。  
到主菜香草酥焗三文魚柳配青檸忌廉沬出場，這次賣相幾行貨，個人唔鍾意拿但汁做成泡沫放在上面因味道太輕但當然好處是唔會整淋塊魚，亦唔會幾樣汁混在一起，只是唔太明近幾年好多西廚好鐘意咁整。見到塊魚咁薄都知會出事，無錯是熟晒，味道是幾好，或是價錢關係太薄中間不帶點生確實是遺憾。旁邊的菜沙律都可以，只是在沙律汁上滴了些味道有點像HP醬的汁效果反而無咁好，而且既然個青檸忌廉汁打了做泡沬，沙律個汁咪流晒落塊魚道囉，設計上是唔夠細心。  
另一道主菜野菌鮮帶子白酒忌廉寛條麵都幾好食，奈何野菌又加了大量鮮冬菇，Why?兩隻帶子(其實是元貝)好大隻，煎得幾好入面緊緊熟(日後有機會教大家如何用中式圓底鑊煎元貝可以做出更好效果)，個汁夠多且好好味，當然無冬菇味就更好，寛麵似新鮮或急凍的，食時帶點白烚開水感，正常外國人做法。  
甜品在這裡是完全唔掂，未食過似樣的，而且可以用失敗來形容。好似這款楊枝甘露布甸，真係咪玩啦。布甸帶點實，但致命的是柚子肉又老又苦，芒果汁的酦性加上奶的鹼性後成個布甸起晒粉粒，重乜搞成咁。最簡單改善辦法就係照中式酒樓做焗西米布甸的方式來做，當然果汁要先用蛋漿開好，再用比較好的柚子肉。  
咖啡茶也比較行貨，茶是一般茶包茶，咖啡是蒸餾咖啡，這次算好起碼唔太淡，有時勁難飲，好睇邊個沖。  
這裡服務都可以，大部份待應唔識廣東話。注意午餐唔會等你食完一道菜至上第二道。午市套價當無甜品剩食主茶加頭盤都底，而且水準唔錯同同區貴幾倍的其它同級數食店無大分別。

阿信屋

雖然好多人都覺得阿信屋搞埋咁多公價、正價超底價好煩，但其實重有幾多人唔知佢同一產品唔係間間賣一樣價?最其怪係佢地自己的店長好多亦唔知，無它，佢個定價方法確實太古怪唔知點搞出來，本來以為人流少的店舖部份產品會平點但又唔似，若話價格跟定同一批貨唔變又講唔通，因為係人都知佢d乜價乜價可以日日變，而且不同店舖不同價的貨品只佔很少量亦沒有定律，例如今次減價無意中又見到一款飲品在同一日內有這情況，一間做正價6折，另一間做公價7折。之前也見過急凍食品如長腳蟹及鯰魚柳等，又或合味道杯麵、罐頭、即時麵、日本米餅及日本乾麵等有這情況，部份更是同時不同定價及不同折扣。有時隔幾個街口的兩間分店已可見到價格差距。試過畀錢買真係收唔同錢所以唔係打錯價，真真奇怪。

其實平日每間分店的折扣亦不一定一樣，(唔計新開分店)呢間公價做9折第二間可以做8折。

幾款可樂汽水

而家好多人都話要健康，在一些國家無以前咁賣得，唔知係咪咁最近都幾多特別口味，近期試了些不同的口味。

在香港最多人曾經試過的相信是日本版的橙味可口可樂，無它，之前在阿信屋有得賣。講真汽水只有橙味而沒有橙成份是有點失望，橙味很淡，唔講又唔太留意的話飲完都可能唔知係橙味，剩餘覺得有少少怪怪地其它味。係咁多款入面最唔特別的一款。

百事白可樂買時幾難估到會是什麼味道，點知原來似係細個時侯大陸出的白色什果汁糖加可樂味再加點汽水餅味，唔知乜係大陸什果汁糖味?咪同黃箭香口膠差唔多味囉。冰凍時可樂味較淡果汁味較出，稍暖後可樂味較出。好唔好飲又係見仁見智，自己算接受到。

櫻花味百事可樂就唔多好飲，除非你鐘意櫻桃味可樂，因除顏色外真係同櫻桃味差唔多一樣，又即係咳藥水味。

可口可樂Life之前曾經講過，自己覺得飲落去好大陣羅漢果沖濟的代糖味(雖然唔係個個人都咁覺得)。而這款Green cola就咁睇落去隨時以為係同一品牌出品，但咁講得當然就唔係啦，之不過味道跟可口可樂Life極似，只是那種羅漢果沖濟味更重感覺更甜。

同場加影蒲燒鰻魚味可樂，老實講句，一點魚味或其它味都唔覺，味道就係細個時大陸所出、或一些細少品牌所出的可樂味，即有些少藥水味嘅可樂，或者不同主要係甜得來有些少唔同。

灣仔 - 唐宮壹號

近期很懶，雖然野照食但就停了寫blog剛好半年。這次6月30日去合和中心的唐宮壹號晚飯，亦是這酒家用這名字的最後一晚，聽待應講7月1日起幟哥會入主改做龍皇。感覺很可惜，雖然這裡晚飯麻麻地，但點心水準確是高出龍皇幾斑，是自己很喜愛的一間，希望之後點心在價錢及水準都不會有太大改變。  
當然點心也不是樣樣好，但部份確有龍皇那種搞搞震感覺。價錢比垃圾級"美金"其下那些平些少，但水準卻貼近高級酒店內酒樓的水準。放幾張之前影的點心相。小籠包拍得住外面做得較好的上海舖水準，酒樓算是難得。金沙苦瓜去了部份苦味後上蛋黃炒得幾好無過火。那兩隻雞仔其實是正常的鹹水角，旁邊雞蛋殼內的東西點睇都是雞蛋黃，但其實是份子料理入面的是芒果果蓉，整體幾得意但兩者夾唔夾就見仁見智。  
講返晚飯，唔係話佢唔好，但價錢算是有點貴，以價錢論食物總覺得有點唔上唔落，總有些差咁d、臨埋門撻Q的感覺，先講講乳鴨，水準是有點唔穏定，味道是幾好的，問題出在所用的乳鴨及風乾階段，這頪冰鮮鴨很多時皮下的水份同油份較多，皮亦較厚，風乾得唔好或唔夠的話炸完就會韌及咬落很油。最最簡單免除問題的方法是改用法國鵪鶉，皮薄，用滷水浸完後可馬上炸，中間完全不用風乾，人工極少。這類價格食肆每隻賣七、八十蚊有何難度，  
叉燒味道幾好入面亦淋，不過是有點"鞋"，可能唔夠肥或燒時過了點火。燒腩仔做得唔錯，但又係埋門一腳撻Q肉及皮勻有點硬，皮過厚刮得唔夠，入面的肥肉唔化開。無亂講的，試找間做得好的利苑(唔係間間做到)食吓就會明白。  
而這味金奬鑊仔煎德州牛柳是完全示範中廚煮西菜可以有幾咁失敗。味只有少少的鹽味及很重的雪肉味，咁已經失敗了一半，但最最失敗是肉過熟"鞋"及韌。煎這些扒一定一定要極猛火，還有一點很多中廚總是不明白的就是這些扒一定一定不可切得太薄，否則一落鑊就只有熟同過熟的分別，永遠做唔到半生或緊熟。相片由於放大了塊牛扒好像好大塊好厚，其實實物是幾細塊同唔太厚的。  
蒸蛋白本身又係樣樣都好卻衰在小問題上，你拿個咁淺但又唔係平底的碟來蒸蛋到底想點，一刮出來散晒。  
豆腐做得較好味道亦佳。若想再改善就是不要用鮮冬菇用返乾花菇，用好一點的豆腐，奇怪地目前的豆腐較差入面有些少豆渣，拌碟與酒樓級數亦唔多襯(其實普遍碟碟餸都有這問題)。