中環 - 鼎點

一間在中區有名氣的點心專門店，講真價錢一點都唔平算貴，或者因地處中區近蘇豪，所以價錢算係咁上下...掛。店舖很細所以坐了去對面酒吧，開了壺茶後看看個茶壺汚糟到無朋友，上面的汚積同油積多到嚇死你，而且壺茶亦都唔熱，茶葉是有些"行"味的底價茶葉。碗筷好多塵要洗過至好用。  
點了幾款點心，古法糯米雞雖然幾多饀但估唔到好似珍珠雞咁做，即係舖一層糯米放饀再放一層糯米，之後切開一舊舊才包，咁都算古法?最慘壓到糯米飯好似珍珠雞咁又爛又實，唔算做很好。  
足三兩蝦餃皇、鼎點焗叉燒包及羅漢煎腐皮卷就唔好理佢改個乜野名，總之就是三款正正常常的點心，做得算是比較好，水準如一般做得較好的點心專門店般，好得來又唔算好"標青"好有特色，叉燒包饀料稍稍過甜了點。  
之後的重頭戲來了，各價值88蚊的蟹粉小龍包同黑松露小龍包，放起枱上見到都已經唔太開胃，或者好食呢?有時食野食得多發覺好唔好食好多時真係有樣睇，咬了一啖已經想掉。兩款包基本上是一樣，只是一款在上面多放了少少黑松露醬。小龍包唔太熱只微暖，皮又厚又爛，理面只是一個大大的肉球很少肉汁，鮮味只一般。  
這理的服務亦唔算好，待應木口木面之餘唔太理客人，當然你叫得到佢地佢地都會為你服務。留意這裡所有的點心都放得歪歪斜斜，可見做得唔夠細心有點球球期期，以這個價錢論是差了點。整體來講是十分十分失望的一餐。

太子 - U購Select

星期六經過太子華潤本來想入去買點東西飲，點知見改了做"另一間超市"重要係剛剛開章，咁緊係入去行吓。見入面有很多很多Tesco品牌的貨品出售，Tesco是外國一間很大的超級市場，近幾年頻頻進軍多國但近來生意唔多好蝕錢蝕得很嚴重，品牌中Value系列是廉價版即質數差少少而價錢又平少少。店內Tesco產品價錢確實是幾平但頗多是歐洲版，產品本身沒有英文說明，特別是波蘭產的特別平，自己唔討厭波蘭貨因為覺得佢地的背景同口味其實幾似早期的中國，人又係幾友善又好勤力，又係基本上乜野放得入口的東西都會食。隨了Tesco產品之外，其它品牌價錢似乎就唔係特別便宜。  
講開這間超市幾奇怪，一入去見到的裝修幾似百佳但價錢牌旁邊會有產品的產地標注，但賣的東西又有幾分之一是Tesco貨，最奇怪是似乎佢好刻意咁唔想你知佢係乜野背景，無論宣傳單張定收據都完全無講佢係乜野集團開的，咁咪試吓問吓收錢員八卦吓，點知收銀員話唔係華潤唔係百佳，佢地咪就係佢地。正奇怪中，不過估唔到一張八達通增值單據偏偏出賣了佢地，擺到明就係華潤，怪唔得是華潤萬家的原址。

尖沙咀 - 金域假日酒店 Bistro on the Mile

還是第一次去這裡食自助午餐，由於是平日關係所以唔難搵位，而且計埋折扣都唔算好貴。可能平日午市關係，見熟客都幾多，有寫字樓做野的亦有在附近住的，唯當日待應服務幾好唔會只招待熟客而忽視街客，而且服務比現時好多其它五星級酒店都要稍稍好一點。

食物方面當然唔少得例牌動作刺身及壽司，不過食這兩款食物的人比預期少，三文魚等刺身是正常酒店水準，當然唔係乜野頂級魚場出品但都算唔錯，壽司講真就較差，唔食無乜損失。  
熱葷選擇算多，味道只是不過不失正常水準，無乜特式無乜驚喜，當日的"切切切"是焗完隻火腿，屬正常少鹽味道。  
這裡的冷盤亦是人有我有的種類，不過松葉蟹腳很有驚喜，所用的貨式品質較好，而且解凍做得很好沒有用水沖洗，蟹身仍有很少一點點冰是最識合的食用情況，蟹肉仍留有不算太鹹的海水味，味道在自助餐中明顯優勝，而且由自助餐開始到差不多完都能保持到同樣水準，且補充得幾快很少見到給拿光(或是熟客多不好意思一次拿太多的關係)。  
這裡的甜品款式算多，睇樣本來好有期望，無奈食落唔多掂，只是一般連鎖式餅店水平，好心倒返轉唔好以量取勝，整少點做返幾樣精緻好味的出來。話時話現在很多酒店的自助餐都加了很多價但甜品水平都變成咁。  
將來還會不會幫襯這裡的自助午餐?有機會相信還會，話晒食蟹腳同雪糕都差不多回本，再食點刺身熱葷感覺更加良好。

Taste

近日見Taste超市有很小的一部份貨品有個牌仔住"指定日韓貨品照價7折"，見標得唔清唔楚但又見無人睇人買，問過幾個職員點知佢地都唔清楚係乜事，之不過佢地都好幫得手主動幫手查，查過後話有個牌仔起後面的過機時就會有7折，雖然減價項目唔多約得廿種左右而且暫時無一種係韓國貨，不過由於唔係到期貨所以睇落都幾底，特別是部份貨品係減完價之後再打7折。做得咁低調似乎在試探如何向對手進行反擊咁喎。

銅鑼灣 - 盛八食堂

之前曾經去過屯門的盛八食堂感覺都唔錯，這次去開銅鑼灣唔知食乜好，見這店都幾有人氣便又入去試試。一坐底馬上感覺到張枱好細，枱面又放滿食具，要叫多點野食都會有難度，想叫待應可唔可以換張大少少枱不過真係想想好啦，一來當時無枱，二來待應好似一路講住"我睇你唔到，我睇你唔到..."咁。

終於落到單，點了吉列極上蟹餅滑蛋包飯連沙律餐湯及甜品，同山葵燒汁極上牛肉焗飯。先來個餐湯，得大半碗都好細吓喎，味道係茶餐廳水準重要係美而廉果隻，似開出來無乜味的粉芡，入面叫做多了三四片罐頭磨菇，相當失望。  
沙律就不過不失，沙律汁味道都可以但落得稍為太少。  
山葵燒汁極上牛肉焗飯比想像中乾，味道普通山葵味唔太重，炒飯底都算可以，問題係個汁好鹹，撈飯一齊食仍然好鹹，但唔撈又變咗齋雞蛋炒飯，若唔計好鹹整體亦只是很一般。  
之後的吉列極上蟹餅滑蛋包飯就做得比較好，雖然個汁的味道較預期差點點唔太鮮味比較行貨，不過這碟飯汁多總是要加點分，滑蛋整得唔係好靚但確係好滑同好食，蟹餅都可以的不過有無其實對碟飯唔係好大影響，剩個滑蛋皮同汁都可以食晒碟飯，只是無佢賣唔到錢，整體算做得幾好食。  
之後的雪糕又係幾行貨，唔知係咪想你回味吓舊式茶餐廳。味道不過不失雪糕都算中價貨式。  
食物明顯比屯門分店做得差，服務...咪話咗想你回味吓舊式茶餐廳，食餐飯啫，咁多要求做乜。

膠袋稅

由愚人節開始收的膠袋稅真係亂到九彩，似乎已前香港之所以成功真係因為政府乜都唔做，而家真係做乜衰乜，原因大家心照吧。政府高官最叻無主見怕"咩鑊"，一定是搵顧問公司或者係話人地外國點做佢又要點做，到時出了事就推得一乾二淨。

推行第三日已經見到有人在阿信屋鬧交，因為買雪藏野政府話可以有免費膠袋但佢地就照收錢，聽到打了電話去會計鬧佢佢地都話要照收，咁好似係行騙或者是誤導消費者喎，因為當時店舖內肯定沒收錢告示，跟手第二日就見到有分店有貼紙話唔理三七二十一係唔係都要收錢。  
阿信屋有更離奇的，佢地鼓勵人唔好拿膠袋(當然亦是擔心銷售會跌)所以每滿50蚊回5毫，早幾日由於唔識睇佢張收據所以問過佢職員點睇回贈，所以非常肯定張咭入面有三個半作回贈，點知今日行駛時只個兩蚊而餘額是零，幾日間沒有幫襯過，估計佢個系統有問題，只得提醒家人一有回贈就盡快用不要留。

惠康更搞野，買西瓜佢話只可以俾個很細的薄身裝橙膠袋，而背心袋就要收錢，問收銀話政府從來無講過免費膠袋只限邊一種，點解背心袋要收錢但細袋仔就唔駛收，佢都解釋唔到，咁試問一個西瓜怎樣可以放進一個薄身細袋，你俾我有用嗎?

又在專賣殺蟲藥的地方買了支殺蟲藥，這次店員違規沒有收5毫就用膠袋入了支殺蟲藥，但其實無論有否俾5毫買個膠袋你又會重用它嗎?若放進自已帶的袋子那之後那個袋你還會重用它嗎?洗乾淨再用?真的洗得乾淨?要用多少水?還有在電視上有新聞節目話有個主婦去街市買餸都會自行帶膠盒裝，出發點是很正確但奈何方法全錯。一般塑膠密度不太高所以其實表面有無數咁多細孔可以藏汚物細菌等而且跟本沒可能洗得乾淨。你試試用一般蒸餾水樽裝水飲，連續三四日後個膠樽便會發臭，其間無論你點洗都無用。隨非高溫長時間煮好像烚奶樽咁否則一般清洗消毒幫不了多少，但咁做所用的膠頂不了多少次便要報消，浪費除時比膠袋還大。正確方法應是用強化玻璃或不透鋼器具，而且還一定要用大圓底的器具，否則邊角位是如何自己也不能徹底清洗得到的，有意學的一定要留意。還有最環保的方式一定是盡可能到最近的地方買及若可能就用手拿不要用器具裝，這很多人也在做，在超市買包肉就直接用手拿回家。

有人話5毫啫，跌都跌咗，講咁多咪又係唔想比，但到底為何要收5毫?不是想你不用或少用膠袋?若你照俾錢照掉膠袋咁就有用?自己如很多新一代一直支持環保，但左慳右慳之後政府或環保人仕從來都只是冷言冷語話你地慳得唔夠多，聽到後有時都幾失落幾心淡。浪費最大的商人政府又幾時有膽叫佢地減少浪費呢?

香港電視網購 - Cult de Choco

在香港要買到來自世界各地優質朱古力著實不容易，一般的超市百貨或連鎖店來來去去都是那幾個牌子，好多時候都會想試試其它品牌。咁啱見到香港電視個購物網有間商店Cult de Choco是專賣幾個在港很少見的品牌朱古力，部份還是得奬作，咁咪又試吓搵吓這間店的網頁睇睇，估唔到這間店都真係幾有心並以網誌形式介紹了部份朱古力的特色。

本身其實想買Friis Holm兩款朱古力，分別是所有物料及製作程序都是一樣而只是一款在發酵過程中翻了兩次豆另一款翻了三次，看看單這個分別會令味道改變多少，無奈其中一款無貨，若只買其中一款就失了原先目的。結果買了另一款懶人朱古力，話果農懶唔肯除去同一果園其它品種的朱古力只種一種，結果這組合卻帶出了特別風味。另外亦選了Akesson's幾款得奬朱古力及其它一些。

落單後兩日後收到貨，盒上寫了注意事項，入面包裝用泡泡袋袋好，由於貨物由香港電視送比較小心所以這個包裝暫時可以。另一點比較窩心是每個買了的品牌朱古力跟貨都印了一份該品牌產品介紹給你等你知道產品有什麼特別，當然亦作宣傳之用。最細那排朱古力是贈品。  
這裡賣的朱古力每克約港幣個幾，聽落係幾貴但算是有道理。首先產品應是有質數的，第二這類朱古力唔係俾你拿往成排咬當飯食，是每次搣一小塊出來品嚐的東西，計返上來無咁肉痛。還有香港朱古力無論高底檔次一般比外國貴很多，但現在的賣價其實跟外國差不多什至更平。

只試了一款Akesson's的Fazenda Sempre Firme單一種植場出品，用的一種可可樹品種叫Forastero。天氣廿幾度已經有點想溶，若夏天要按照16-18度存放會很頭痕。味道在黑朱古力中算較甜不太苦，食落口頗順滑，帶些酦味，酸得來有點似咖啡的果酸味但沒那麼濃烈，該種可可豆的天然果味頗重，朱古力內略帶很少一點可可豆果肉渣，食了兩小塊後那種果酸香味在口中殘留了十多分鐘才散去，相當特別的味，是相當唔錯的產品。