馬鞍山 - 食德棧

在馬鞍山唔想在大商場內搵食，在商場外圍找了這間店試吓它的乾炒牛河。主角出場，炒功相當唔錯喎，河粉有煎香後才炒，拿到來時非常夠鑊氣，牛肉亦是剛剛熟。比較可惜的是油多了少少，另外河粉較碎，最最可惜是店舖所用醬油太差，無豆香味無醬油鮮味。  
檸茶無乜太特別，茶麻麻地，杯茶唔大而檸片相對頗多所以"督"多幾吓會好酸。  
不知有多少間食店都是敗在使用差劣醬料手上，有時食店為了省那一個幾毫醬料錢導致食物差了少了人幫襯真係得不償失，這裡的牛河由於唔係好大碟計起上來價錢都不算便宜，下午茶餐加杯野飲都要四十幾蚊應有能力用較好的豉油，否則只白白浪費了不錯的炒功。

尖沙咀 - 南海一號

有人請去這食店食飯，當然第一時間應承，這是團購的4人餐目，原價$2480現$1180。在這裡食晚飯，由天光食到天黑，睇住維港慢慢亮燈，確有一番情趣。

餐前小食是一籃炸蝦片，唔知是越南還是印尼帶微辣的那頪，幾好味，奈何有點通風淋了一點。之後的三小碟前菜，麻辣貢菜做得幾爽口，這道菜在大陸食過很多次，與之比較的只能說幾好但唔係特別出色。陳醋雲耳幾濃雲耳味，只是奇怪這些小雲耳為何這麼厚身，與自己食開的所謂"貓耳"或"老鼠耳"確有佢離，咬落去感覺無咁好。最後的麥糖脆芋絲做得頗精緻好味，炸好後灑上些少麥芽糖膠，香脆之餘有些少甜味卻不會蓋過芋頭香味，唔錯唔錯，不過若同客人一起就唔好點這前菜，會食到一枱都係，待應唔會幫你清理枱面，亦很難幫你清理。最後，三小碟一起放在枱中間，確像神枱上的三小碟，唔多"老禮"(吉利)喎，確需考慮換過第二種碟。  
薑蔥花雕燘東星做得相當好，外面幾香脆而入面夠滑，味道亦佳，只是與做得好的海鮮酒家仍有些距離，主要是外面香脆時又要再放在砂鍋，唔係話佢煮過了火而係無人地做得咁滑。  
韭皇蔥爆花膠柳比較行貨無乜特別，無乜好講，唔通韭皇同蔥都只用條心來炒都要講?咁嘅價錢唔係應該要預咗?  
金銀蒜元貝蒸勝瓜又蒸得幾好味，勝瓜蒸的時間剛好吸了汁後好好味，只是唔係太明為何一半元貝要先炸過，話金銀蒜啫唔駛連元貝都炸埋，又唔係特別靚，唔覺太熟了嗎?另一遺憾是每塊勝瓜都不同高度，元貝每一隻又很不同樣，開邊的刀功實太差明顯地一邊厚一邊薄，另外當然不要預期元貝是新鮮的，話晒唔係海鮮酒家。整體是好味但要執執個賣相先。  
鮮果咕嚕肉用了部份鮮芒果肉代替菠蘿，效果好好。而豬肉用的是五層肉，嫩滑之餘效果亦唔錯。可惜整體水準只算唔錯，話晒這道港式咕嚕肉真係考牌之作，好難好難做得好，這裡亦一樣有些地方出了問題，首先汁收得唔夠濃味唔夠杰及乾身，炸粉會很快淋，而用五層肉無錯係好，但熱食時咬落咪一泡油，要凍了點才好味，但因汁收得唔好凍了點皮又更淋了。  
最後的泡飯做得很精彩，濃魚湯中有些蝦湯味，加上炒米的香味，無太濃的薑味同胡辣味但又唔腥，唔會話邊種味蓋過邊種味，無野好講，只能舉起兩隻大姆指，極佳之作。 (枱布上有很多炸芋絲啊。) 
最後的生磨杏仁茶及綠茶餅都幾好，杏仁茶無加香精底讚，若米味淡少少杏仁味濃少少更好。  
以團購套餐來講整體算幾好但會唔夠飽，若唔睇環境正價來講除了個泡飯之外只能說OK啦，可以啦，唔覺太特別。

馬鞍山 - 譽粵菜晚飯孖寶

在馬鞍山區內定位算是比較貴的一間中式酒樓，可能平日大家都只係想食吓家常飯唔想食咁貴，所以雖然佢推出了這個晚飯孖寶都有好一段時間但生意仍然麻麻，或者都睇吓質數怎樣。  
選了乳豬拌皮蛋，乳豬皮幾薄而仍有些脆，在酒樓中算是幾好食，但與做得出名出色的仍有大距離。伴皮蛋有點怪，兩者味道又唔係特別夾，只能說皮蛋便宜又不用多大功夫整吧，但換來是睇起來幾寒酸，用幾塊豉油雞代替不是更好嗎，成本除時重平只是功夫多了不少，但......現時生意很好燒味部很忙嗎?  
清蒸海星斑確係有點驚喜，首先條魚比想像中大條，斤半以上無走雞，第二是蒸得時間剛剛好，放在枱上淋下豉油肉是能離骨緊緊熟，魚應是生劏肉質味道如何也不用多問，是做得很出色的蒸魚，豉油口味如何就有點見仁見智。  
最後送的紅豆沙味道好行貨，待應能裝得滿一點及企理一點嗎?又或真的是曾經打瀉了一些?唔好誤會有乜陰謀論，雖然唔係點了好多野食但侍應其實無黑面仍保持應有態度。

 
<註:新孖寶剛改了做青斑，價錢亦平了>

嫩雞煨麵

天氣熱到死唔多想食飯，臨時做個速食嫩雞煨麵。先在冰箱拿塊雞胸肉放入微波爐至稍解凍(仍然結冰但用刀可輕易切得入)，切片，加薑絲、少少雞粉及酒醃一醃。  
用要煮三分鐘的幼身乾麵熱水加些少鹽煮二分鐘，過冷河最後沖水時加少少油在水裡防黏又唔油。  
水加些少雞粉及鹽，由於麵已有鹹味所以湯要略淡。煮滾後關至最細火，倒入雞塊浸熟，約兩分鐘，不用滾起。倒入麵條，維持最細火避免雞肉變老，數分鐘後湯微滾食得。用了廿幾分鐘，唔好睇樣以為好清淡，味道唔差得過外面一般食店做的好多。

馬鞍山 - 上海姥姥

這分店在馬鞍山剛開了不太久，價錢和類似的上海食店差不多但就勝在免茶免加一，這或是最優性的地方。點了幾樣東西，五香燻魚幾失望，燻魚中的煄唔同煙燻，其實說實了是炸完的魚塊拿去炆，這裡的醬汁唔算好鮮味且稍稍唔夠甜，傳統上由於無雪櫃這類冷涼菜都是炸完再用偏鹹或偏甜的濃醬汁保鮮，所以覺得應是稍稍偏甜口味較佳，當然汁醬在這裡還是小問題，最大問題是入面的魚肉完全淡口，即係好可能炸完後完全沒有炆過或炆夠，這點確很失敗。說實的，現在很少地方能吃到好味的燻魚，更不用說要吃鳳尾魚了。  
小籠包樣子麻麻地，食落其實幾好食，皮薄亦算多湯汁，頂部唔會有一舊實厚粉皮的感覺，只是鮮味還是稍稍差點。  
四川擔擔麵正正常常都可以，唔太辣亦無花椒的麻(個人唔太喜好花椒)，肉碎略少及湯底略唔夠濃，麵條本身無乜特別，奇怪的是咁幼身的麵條都唔太吸湯汁，這或就是令人覺得湯底唔夠濃的原因，不知問題出了在那裡。追加的炸排骨味道很一般，炸得算可以但味道就只有少少鹹味無其它，不吃也罷。  
最後的生煎包本來無乜期望但又估唔到幾好食，無錯個包幾細包皮稍厚肉饀亦略少，但煎得好香口味道亦好，是幾樣野入面最好食的。  
由於新開不久，出菜仍有點亂，有時出了菜但唔知是邊張枱叫，類似問題差不多間間新食店都會發生，之後就要看如何改善。另外較特別的是這裡有bar枱位，一個人去幫襯就唔駛唔好意思霸住成張枱。

尖沙咀 - 喜來登 The Cafe 下午茶自助餐

在這裡食下午茶自助餐都唔算難搵位，加裡信用咭優惠都唔算好貴，比尖東那邊的酒店平很多，行入去打個圈好似都幾多野食咪又試試。

人有我有的魚生都幾好，食的熱葷唔係乜野貴價貨，味道只是中規中矩食了一碟已無太大意欲食多一碟。中西兩款湯算幾好，特別是磨菇湯幾濃味好飲，只是麵粉落得多太了點。  
朱古力唔太好食唔係預期中的酒店水準。甜品款式亦算係咁，都是現時酒店自助餐的一般貨式。其實真係間間酒店都係咁相同貨式同水準，有時真係懷疑部份酒店所用的糕點是相同大工場的出品，在外國食店使用大工場做的解凍蛋糕不是什麼祕密事，當然如果在香港就可省去急凍的步驟。
用的雪糕是Haagen Daz。最'運吉'的是當日中後期竟然出現雪糕解唔設凍大部份停止供應，而初期就出現三文魚解唔設凍停止供應的情況。

由於唔算好貴，論價算水準其實合格有餘，話晒尖沙咀食野都唔平，這裡服務都可以，只是附近選擇亦多，例如行過少少的假日酒店就幾接近，食物沒這裡好味但服務就稍勝。