美版合味道杯麵

家興超市又在做合味道杯麵特價，不過今次唔係港版而係美版，印像中美版同港版係有分別的但近期很少食杯麵所以沒有買，若只是隨便搵點東西吃10蚊三杯始終都係平。

薑蔥浸生蠔

上次講過醃子薑時揸出的薑汁水唔好倒可以用來做餸，這次就做了一碟薑蔥浸生蠔。其實做法同一般的分別不大，只是由於薑汁有很多，可以用大量來浸。  
急凍生蠔洗淨，若用生鮮生蠔要用豆粉或生粉等來刷洗。鍋內倒入適量薑汁煮滾，由於之前醃子薑時加了鹽所以要試下鹹味，正常醎度便可，若太鹹要加水。加蔥段，放入生蠔大火煮熟即可，視乎蠔的大細由放入起計約煮分半至兩分鐘便可，煮好後將多餘的薑汁倒咁點便成，連平底鍋一同上枱都唔錯起碼洗少隻碟。  
由於薑汁多不用下油爆薑片，食得更清淡健康之餘且更無太多腥味，唔放酒或辣椒都沒問題。

醃子薑

今年是第二次醃子薑，無錯現在做是有點遲，子薑都有點老開始起筋，不過趕尾班車還算可以。這次做來送給人所以分量很多，若不要那麼多自己按比例減吧。材料5斤子薑、兩包一斤裝(600克)冰糖及一支中國白醋、幾茶匙鹽。不用冰糖用白糖都可只是冰糖較好味但做出來薑塊較黃。 兩斤冰糖用三大碗白醋煲煮至飽和(即糖不能再溶)，若仍有太多糖在煲底可再加些少白醋，反過來糖全溶可加點冰糖或白糖。放涼備用。  
子薑刮去皮，盡量不要搣得太細唔係切薄片時比較難切。用水洗淨後過凍滾水。切薄片，若要做得較甜口就要有咁薄切咁薄，否則可切厚點至約一毫米，用陶瓷刀會易切好多同切出來無乜起筋。這個工序很花時間，由於薑是圓的較難捉實要切薄片較難，但如一般切片方法先切平底部那每一片薑的切面就會少了一"忽"睇落無咁靚。  
由於太多所以分了兩兜，每兜放兩、三茶匙鹽醃半個鐘等薑片出水，然後用手有咁大力得咁大力將薑汁揸出，可重復再揸一次。若薑片切得薄揸出的薑汁較多做好後就無咁辣。留意揸出的薑汁不要倒掉可用來做餸，下次再講。  
將薑片放入玻璃樽，不要弄得太實要有一點點鬆，要甜點可再鬆點。倒入飽和的糖水，將薑片用筷子弄鬆點，有需要再補些糖水，煲入面少少未溶的糖可放埋入樽內。放雪櫃，若之前切得極薄三、四天後便可食用，若有一毫米左右建議起碼要一、兩個星期才可。

大埔 - 余曉記上海包

這店之前曾經講過生煎牛肉包幾好食，只是有一樣自己唔知道的事情，原來下午臨近放學時候，它會做定多多蔥油餅準備賣。  
這店的蔥油餅是比較似以前細個時上海舖外賣小店那種，即比較多粉及厚身。由於剛煎好非常香口無可能會唔好食，唔貴又大塊，若遇啱定要試試。

椰子蒸雞

上次講到打完椰汁剩了些椰子渣(椰絲)出來，其實仍是非常有用，這次用來蒸雞。在超市買一隻細的冰鮮雞，不要在黃色超市買，不知是否運送處理得唔好出了問題還是什麼原因，近來賣到的多款雞都非常臊唔出水跟本唔食得，雞洗淨在背脊剪開。  
用少少鹽先將雞醃一小時或以上，然後將雞底及面用椰絲包著，可再醃一下或直接放鍋中隔水大火蒸半小時(由於雞給椰絲包著所以是要蒸耐一點)。  
略放涼把椰絲刮出放另一碟底，雞剪好後放面，食得。  
這碟餸最好食的不是雞而是吸了雞汁的椰絲，由於椰絲曾打汁所以只有很淡的椰子味不會搶了雞味。

自製椰汁

天氣咁熱又剛打完風，想飲杯椰汁但係街邊檔賣到咁貴點飲得起。就算近年椰子漲價了兩三倍但椰汁本身仍然是一樣非常唔值錢的東西，為何不自己做，做完你就知有幾唔值錢。

首先不要買大陸椰子，不是品質不好而是一般買到的都較嫩唔夠椰子味，買泰國的較好，雖然自己開唔太難但開時會跌到成屋椰衣碎所以叫生果檔開埋更好，椰心水記得留返。回家後略洗淨、刨皮，刨皮時要小心，若自己開椰子要保持椰肉大塊點較容易刨皮，之後用凍滾水洗淨。  
大塊的椰肉略切細一點，將數片放入攪拌機，加糖，糖份量按自己口味及攪拌壺大小而定，第一次不用擔心太多或太少因可再調，若如街邊的只打一壺可在這時放花奶但因為會做很多可在均質處理時才放，加水，由於奶較易壞所以用冰水較好，放冰塊亦可，而由於暫時不放奶所以只用室溫水。  
慢或中速打一分鐘，椰汁倒入大煲中作均質處理，期間隔渣，用大匙壓下椰渣將渣內椰汁壓出，這些渣其實就是椰絲，做糕餅可直接拿來用，若用來煲雞之前就不要放糖。由於不做糕餅所以將渣倒回攪拌器，加幾片椰子後重覆之前步驟返打。但記住先試試之前的椰汁會否太甜或太淡來決定這次用多少糖。  
如事者重覆幾次後才用了約半個椰子，最後一次返渣不用加椰肉直接打兩分鐘，剩低的椰肉放冰箱留下次用。  
如不直接飲椰心水也可在這時倒入煲內，加一大罐花奶(不喜歡太奶味的就不要成罐倒晒)，由於之前無用冰水所以同時加入大堆冰。這時是最後的均質處理，試下味太甜可加水，太淡可加糖。  
唔覺唔覺做了約三公升半，你話幾唔值錢。若如一般街賣咁不用咁椰子味只需用1/3個椰子打耐少少已可做出同樣份量。  
留意椰汁有奶，做時要注意清潔及溫度，不要留太耐放雪櫃幾天內要飲完。若雪櫃無位放打椰汁時不要放那麼多水但做甜一些，飲時加點冰水可開回正常味道。最後，椰渣不要倒掉還有用的，下次再講。

馬鞍山 - 759阿信屋超級市場

還記得個多月前曾去過阿信屋長沙灣的超市，當時行了唔夠三分鐘便行返出來，因為賣的東西跟其它分店是原全一樣。到今次馬鞍山超市開業，又看看有何不同。  
首先是多了肉類同新鮮蔬果，再看看價錢果然非常震撼，唔係因為平而係原價再創天價新高，除極少量皇牌平價貨品外，俾你打個九折什至八折都未必會比兩間大超市平，更不用講外面街市價錢，真不明白到底打著什麼算盤。超市賣的東西暫時絕大部份都在其它分店可以買到，講真只是一間放大版的分店而完全未算是超市。店內亦加入賣化裝品的Kawaiiland及少量玩具同電器。  
現時阿信屋給我的印象已與平價脫鈎，因為好多東西已不是它最平，就舉幾個之前在討論區見到的東西作例子吧。例如之前有賣的合味道杯麵有人話佢賣六個幾好平，但你又知唔知家興超市同北區一些賣貨給自由行的小商店才剛剛結速賣十蚊三杯，同樣的貨品同樣是香港出產，明顯是生產商在清貨而有人食水較深。又例如品客芝士味薯片，兩大超市的是寫明美國生產但阿信屋的沒寫產地，印象中是有一個國家出品的東西是不敢俾人知是在那裡生的。再多一個例子吧，現時賣緊公價十蚊的日本杯裝啫喱多興屋紅磡國際都會分店特價只賣7.5(其它分店49蚊6杯)，咁就算俾個九折你又算唔算好平。

當然純話現在阿信屋的皇牌東西已唔算好平是很不公道，因為大家都知道佢個價是多少而用佢個價再減一點來打佢，整體上還是要多謝佢將物價拉底。不過單看這分店可以話佢完全唔知自己在做緊什麼，似乎佢要開始做多點市場調查及職員不要經常坐在寫字樓，了解賣什麼不是問供應商可給你什麼而是去先問你自己應賣什麼。舉個簡單例子，在馬鞍山區有什麼食品是賣得貴而又沒給兩大超市壟斷的，隨便已可答你其中一樣是雞蛋，馬鞍山區的雞蛋(包括街市)比平價地區如新蒲崗貴成半至三成，若做吓市場調查便不難找到，再看看阿信屋超市在賣什麼......日本雞蛋，無言了。

(2014-09-19 更新: 阿信屋果然有回應市場，文中所提馬鞍山超市的日本啫喱已特價每杯$7.8。另之前的水果唔夠平，現加了幾樣超低價水果，橙$1.3，柑$1.4，華盛頓蘋果$1.7(不過很多壓傷)，中國富士蘋果$2，還有壓沙西瓜每公斤$4(即每磅$1.8)，果真非常平。)

億長御坊 - 糉

這些台灣糭子是之前美食博覽買的，當時見寫著拿了很多奬滿有期望的。如果唔係當然唔會在這個時候才買台灣食物，無論如何，暫時唔買。  
盒子入面有三款糉，分別是潮州火腿鮮肉、台灣南部糭及潮州香菇蛋黃肉糉，分開三包。  
用了最簡單的方法滾水煮，打開糉葉，Oh My God，成隻火腿鮮肉糉散開晒，無它，糯米太少又沒有扎實，估唔到會犯這低級錯誤，這並非個別問題，三隻有兩隻是這樣，最差一隻散到全沾在葉上要用匙刮下來。除了這問題外三款糉確係幾多饀料，相片或看不出來，而香菇稍稍質數差點唔太香，肥肉唔算太肥幾淋幾香。  
可能真的比較喜歡廣東糉，這些台灣糉沒綠豆感覺沒那麼香，另外不太喜愛撈了醬油的糯米，當然這些都不是這些台灣糉的問題而是個人口味問題。

太古城 - 札幌拉麵

這附近可能比較多寫字樓，一到食飯時間人多到不得了，店舖是在大食代入面，走的是較貴價food court路線，白領較願意駛錢，幫襯的人自然非常多人。去得food court都唔會對食物有太大期望，點了一碗牛油拉麵，湯底加了牛油後只覺得很油而唔覺得香，是用的牛油不好嗎?湯底唔係特別鮮味那類，其餘是正正常常無乜特別，就好似三四十蚊買包雪藏日本拉麵返屋企煮咁，你重想點。

大圍 - 粵軒

食點心的舖頭近期越開越多，而這間價錢算是比較貴的一間，或者比較特別就是佢賣埋炒粉麵同小菜。  
以點心來講都叫做可以，唔算特別好食，水準同一般此類點心店分別不多，價格就明顯比較貴。店舖位處大圍區，今時今日大圍真係唔講個笑，附近多個大形屋苑相繼落成，當然近期大圍的租金都是以倍作上升導致很多舊商店紛紛撤離該區。  
這裡的炒粉麵又唔算特別貴，和一般酒樓唔多。點了個較便宜的雙黃肉絲炒麵，味道只一般般，用的麵唔係咁啱用來作煎麵，麵亦煎得唔夠沒想像中脆，比較聰明的是茨汁另外上，汁夠多而味道亦正常。不過係咁點解唔去酒樓食，或者只係唔駛等咁耐位同附近的明星唔多好食。

馬鞍山 - 富臨皇宮

不知是否最新開的一間富臨，只開了幾日趕得切在中秋前開業。其實早茶都係那些東西，相信很多都是中央廚房出品所以唔會期望有驚喜。一如很多酒樓開業時的情況一樣，碗碟一樣係洗得勁唔乾淨，稍稍多人就馬上"冧檔""踢晒腳"，希望能在短時間內改善。服務方面富臨是數一數二的差，早前去過沙田娛樂城的富臨差點反枱，這間已是不過不失算唔錯，只是開業時間唔長初期實有錯漏，要過多幾個星期穩定了才可作準。  
早茶點心不是同區最平，附近的海港肯定比它平。鳳爪排骨飯是自已出去大排檔拿，豉油要自己倒一時重手加多了好鹹不過唔關人事是自己問題，整個飯味道唔錯幾好。  
之後就是等了又等，期間很多人投訴無人開茶，伙記做到無停手但係真係人手唔夠無法，很多酒樓初期都係咁，不過伙記明顯越來越黑面。等了35分鐘至來了碟牛肉，牛肉有點實及唔夠鮮味。  
再等再等潮州粉果都係唔來，超過45分鐘正想取消時佢就來了。估唔得做得幾好味，起碼入面的花生還脆，可能是這店自己做。  
新酒樓真好竹蒸籠很乾淨，最討厭高級版稻香的塑膠蒸籠。

九龍灣 - 赤丸製麵所

來到德褔，普遍都係大形的連鎖食店，其餘細舖舖想在這類大場經營是極困難，結果又是另一個"me too"樣的商場，很悶。選了這間日式食店睇睇點，入去估唔到有撘枱，另外見到一箱箱一間香港麵廠製的麵放晒起門口。  
價錢同同類的食店差不多都是有點貴，這裡可選的東西話多唔多話少唔少但偏偏睇落無乜特別吸引的東西，結果選了下圖的套餐。  
第一個套餐咖哩海鮮烏冬咖啡明顯是一般日式咖哩磚開出來的，而且亦開得唔夠濃味，幾失敗，而烏冬較似阿信屋賣那種韓國烏冬，比較硬身無日本出的咁淋身咁彈牙但都叫可以。小食選的炸吉列蝦好細隻，比麵中浸著的細很多，應該真係咁啱吧，味道就是標準急凍那種無話好唔好。  
另一個餐炸軟殼蟹冷烏冬，烏冬除了淋就是好淋無咬口唔好食，提供的醬汁很少應該是給你作撈麵用味道尚算可以，軟殼蟹好樣衰但又估佢唔都幾好食，係油咗點。另外的小食章魚燒只算一般一定無街邊那些咁好食，章魚粒亦較少。  
至於飲品巨峰特飲只麻麻地，味道都是開出來那種巨峰提子味。而柚子茶亦是咁上下一般的味道，只是開得比較淡當係少甜吧，如果自己沖一定加多一大匙羹。  
整體質數是不滿意，有太過返熱急凍或預製食品的感覺。食完後才知這分店將在九月中結束現時經營模式並改成日本餐廳，若果佢仍然依照現時製作方針就真係祝佢好運。