深水埗 - 吉豚屋吉列豬扒專門店

碰啱這店試業第一天，見入面有幾個講日文的人，又有些供應商來祝賀，最重要是試業的幾天只提供了4款飯提供優惠均一價$50免加一，貪心一吓當然又是試試。  
之前都曾經講過同系的九龍灣分店，老實講句，當時的印象真係好麻麻，水準頂多叫做合格。這次又看看深水埗分店有否驚喜。這店店面較窄所以近外面背著廚房是一行的bar台位，點了吉列咖喱豬扒飯，另加$8(試業期間飲野仍要加一)點了杯巨蜂乳酸特飲。特飲的乳酸味無之前飲過的咁重而提子味比較出，飲起來比前正常了但仍只是一般唔算好好飲。  
到吉列咖喱豬扒飯出場，先試試塊豬扒，唔知係唔係開業唔衰得，塊豬扒勁好食喎，鬆軟得來很多肉汁，有些少肥膏但唔會油膩，肉的厚度都唔薄，反之炸粉及麵包糠只是薄薄一層，咬落去真係啖啖肉，做得非常非常之好。白飯食落去很有日本米的口感，雖不是珍珠米但仍頗彈牙香口，底讚。之不過有得必有失，個咖喱汁超鹹且杰了些，肯定是調較時出了錯或煮乾了水，食完成碟飯都撈唔到1/3的咖喱汁，味道亦是比較行貨似日式咖喱磚的味道。放旁邊的豬扒醬汁及芝麻醬汁就無改變，芝麻醬仍是比較行貨唔太香，豬扒醬汁濃得來梅子味其實又唔係咁能提高豬扒的鮮味(起碼與近似的日式炸豬扒店來作比較)。  
試業日期至8月30日，特價後真的超值，有興趣的快去試試。

馬鞍山 - 大阪王將

又是另一間在試業的日式食肆，雖然之前都幫襯過其它分店覺得水準很麻麻，但新屎坑當然又試試。

點了個豬骨湯底東坡肉拉麵，唔算大碗，麵條無乜特別，東坡肉比想像中肥及無咁入味，仍算不過不失，不過湯底就幾差，唔夠濃味之餘重幾味精感，之但係個醬蘿蔔就幾濃味，結果成碗湯就只得果種漬物的味道。老實講句價錢$72唔算平，係人食過相信都情願比多十幾廿蚊去那些有名的拉麵店食，只可惜馬鞍山區沒有那些拉麵店。  
蒜片牛肉定食同樣是$72，牛肉片算幾厚但不韌，但個汁相當甜而又估唔到落了咁多蒜片都無乜蒜頭味，應是用買回來已炸好的蒜片，個蘿蔔漬物又係頗甜，唔係好明點解近期很多不同的日式食肆的漬物都很甜，而個麵豉湯就真係得麵豉同鹹味，唔多覺有木魚味。  
最後加錢配的原味餃子，相片拍出來仍可以，只是實際樣子是煎得頗濃，除此之外其實幾好食，皮薄及算有汁，味道亦唔錯。不過見到有些人點的餃子賣相相當嚇人，燶到有點近乎黑色，燶到咁不是早應扔掉嗎?最奇怪是食客竟然唔投訴。  
老實講句，以這次的水準來講價格起碼要調低兩成才算是比較合理，希望這都只是試業的問題並能很快得到處理，否則都有點危。

美食博覽 2015

又到一年一度的美食博覽，可惜今年公眾展區真係無乜野可以講。首先真係很少新產品，大部份都是在過去曾參展又或是街上可買到的大路貨，其次是真係平的東西極少，唔係話無平，只是減價後的價錢不一定比外面特價時平，更遑論外面有推廣員在促銷時的情況，而少部份較平的貨其實也平不了多少，又或只是(起碼對我來說)送一些唔多等駛的東西給你，當然都有些東西是平的，只是唔多又或是一早已沽清，或者在這裡買東西的好處只是不用四處去找。第一天雖然見到很多人都能夠買到東西，但眼見買到攞唔到的情況是無出現，唔計拉行李箱的人叫做買得多些的一般的也只是一架手拉車，很多也只是一袋起兩袋止。  
家電家品博覽又係咁，只是唔明點解咁多不同展覽會都會畀那些所謂派禮物及試用品但其實很大機會是偏人的商家。話說之前有人中過招，話免費送呢樣送果樣給你試，講了半鐘都唔送，又話好多人拿了之後就走無誠意，為咗避免無誠意的人拿了返去又唔試，洗完一大論腦之後最後話求其收返些行政費，之後叫人即刻舉手收錢，但其實行政費重貴過件貨，例如街價百幾蚊的手機收你三百蚊行政費再搭些不值錢的較剪菜刀咁，咪意為咁就算，其實給你的手機是壞的完全用唔到，你夠薑之後就拿返去佢聲稱的寫字樓換，就算真係有間寫字樓係道又睇吓佢換唔換畀你，定換機又再收行政費，話晒人地無賣過野畀你。

反而業界人仕的區域就比較有睇頭，其中日本又係拉大隊來擺檔，新野及試食的東西很多，只是今年唔係好主動周街派，可能過去太多人走少試完又無幫襯，而且無乜禮貌試完攞完就走好似"老逢"咁。今年韓國參展商很少，不知與新沙士有無關係。比較特別是有一區有很多賣開心果的參展商，估計都有二三十檔，及有原隻澳洲生蠔試。  
業界人仕的茶葉的展區一如過往佔地頗大，由要是大陸參展商，但人流很少。今年可即場試飲兩位金茶王所沖的奶茶，兩位師父沖茶的手勢有非常大的分別，只是唔好意思排完一次隊之後又排多次，試勻兩位師父的手勢。老實講句，茶沒想像中滑，而所沖之茶茶葉調配得唔平衡錫蘭茶葉味太出，這也不能怪兩位師父，花奶有人讚助唔係正常的"黑白"，兩人用的茶葉一樣似乎是大會供應唔係佢地自己調配。  
今年做了件衰野，試食完雖無"彈"，但多口教人應用什麼材料及怎樣去調配試食的食材，下次都係唔好咁多口。

麥當勞 - 騎騎笑煙肉雞堡

雖然食完個餐沒有"騎騎笑"，都覺得這款包是麥記近期做得較為好食的一款包。煙肉、雞肉及芝士的配搭確係幾好，另外雞塊能夠食到一絲絲雞肉唔係用免治肉又係抵讚。 
 
個人覺得這個包是幾好味，唯仍有些少地方可改進，雞塊味道相當淡，鹹香味主要來自芝士及減鹽煙肉，三樣東西一起吃當然好味又夠味，不過一來芝士唔係特別大塊，一頭一尾食唔到，二來唔係啖啖都食到煙肉，偏偏個包醬汁很少，當只係食到雞塊時會覺得個包較淡及"鞋"，有少少可惜。若能多番些醬汁或雞塊底加多另外一種杰身醬如蛋黃醬或三文治醬等，咬落去時有些少醬汁"必"出來就會更加好。

台灣金煌芒果

最近幾喜歡吃這種芒果，網上說金煌兩字是從他的育種者的名字而者。若甜度高的芒果味道近似呂宋芒，香味淡少少但又清香少少，果肉入面很少筋，果核相對來講唔算厚所以切出來的果肉啖啖肉很好吃，還有雖然果肉有很多汁但去皮時只會有很少汁液流出，唔會好似很多其它芒果咁流到周圍都係汁。相片中切開那個未算熟透所以果肉未全變成橙紅色不過已經好甜，亦能見到果肉無乜筋。 
要選當然盡量要大個，因為無論大細粒核都係咁上下厚，大的有中形水仙芒咁大，選表皮全變黃身或剩些少青綠都可以，太青就要放米缸催熟，又係基本上個督督位越多蜜汁積就越甜。監白色超市賣得較平按大細約$16-$20一個，黃色超市約$21。注意不要賣錯大陸出產的金煌芒。

銅鑼灣 - 崇光 北海道皇帝蟹腳

星期日在崇光地庫超市見到有冷藏的原箱北海道皇帝蟹(帝王蟹)腳賣，當時旁邊有推廣員在主力賣仿蟹柳，無乜人理佢的這些蟹腳，真係要讚吓自己"眼利"，發覺為乜事賣得咁平，一箱約兩公斤裝的皇帝蟹腳只賣$618，蟹的尺寸近似於阿信屋每隻賣緊公價$599的那種。這種蟹的蟹身蟹肉不太好食，無乜味又較"鞋"，只有蟹腳及蟹鉗好食。由於蟹身已去掉，所以現價更為超價，問過推銷員每箱約有6隻至7隻的半邊蟹，即3隻到3隻半蟹，唔駛講咁多，馬上俾錢。所謂買開有人爭，好快有人見到後又跟住買，因為實在很平。  
回家打開盒子，蟹腳仍在結冰狀態，這箱約有3隻半蟹，由於有些腳及鉗在去掉身體部份時甩了出來所以好難確定實在有多少隻蟹，檢查一下，日本人的品質確是控制得很好，每隻蟹的尺寸近乎完全一樣，品質很一致且十分企理。分批放入微波爐各叮一分鐘，等蟹腳溫度提高至剛底於零度的結冰狀態，再在室溫放十五分鐘左右食得。  
這種北海道蟹腳的肉十分鮮甜，蟹味很濃郁，明顯比阿信屋賣的智利蟹要濃味及鮮甜，鹹味亦剛剛好略鹹而不會太鹹。唯煮的時間可能較長，蟹肉收縮得較利害，肉較黐殼。整體口味仍是北海道的勝出，難怪一般價錢都較貴。幾個人食完之後都話下次見到若無加價一定要再買。

潮流興減價

除了兩間大超市米價係咁加之外，這日(星期五)咁啱見到大昌八公斤金象米又減價。  
而另一間超市家興一隻無寫產地香港入袋包裝的八公斤水晶晶米苿莉香米亦減價，雖然本身都好平但減完後平勻每公斤都唔駛$5，確係十分平，不過都係果句:"自己好少煮飯所以無買來試，唔知好唔好食"。  
那邊廂雖是阿信屋一連三日八折的最後一日，但由於它本身標價高而之前週年慶平得多之固，所以都覺得無乜野吸引。反而經過OK便利店的"日本直送"全部七折就幾吸引，由於本身正價都只係標得比外面高少少，七折後好多貨都比阿信屋折後的價平，較可惜是貨品不算太多，比較大間的分店會多點選擇。