旺角 - 牛一

去完屯門，又睇吓旺角分店如何。午市人氣明顯比較弱只得很少食客，但晚市就相當多人，這裡服務亦明顯比較差，但咁講又好係唔係好公道，因為當日香港的侍應才比較晦氣，另一新移呢民侍應態度很好，真估唔到。還有唔知點解似乎經常漏單，幾次向唔同侍應加牛肉每次(係每一次)等了十幾分鐘後都話漏單，食吓停吓非常唔過癮。  
牛肉同配菜質素同屯門分店差唔多，又係平價牛肉較一般同類火鍋店好但配料就差一級，配料無屯門分店咁多。見隔離枱點澳洲和牛，咁無理由拿架相機去影相所以無相架，只是澳洲和牛水準就明顯較一般未必及得上其它同類店舖。

屯門 - 牛一

一間市中心相當有人氣的日式火鍋店，價錢相對比其它類似的牛肉火鍋店是平點，當日只幫襯最基本最平的牛肉，不過佢的牛肉質素又真係比其它類似火鍋店好，所以亦難怪有咁多人幫襯。  
之不過湯底及其餘配料就真係再次一級，唔算得好但種類相對地多很多，菜疏種類亦經常轉但亦係次一級的質數，部份較老及重泥味。  
軟雪糕都唔錯幾好食不過幾甜，怕肥唔好食咁多。  
鐘意食牛肉的去這裡多食幾碟牛肉會覺得唔錯，否則唔必是最佳選擇。這裡的侍應相信很多都是新移民，但唔好以為服務會好差，其實佢地都好勤力為你服務的，只是員工少非常忙碌同習慣上有時做得比較似家庭式經營咁無咁客氣。 有時做得比較似家庭式經營咁無咁客氣。

耀安 - 韓台站

一間開了不是太久的食肆，提供韓式或台式食物，見價錢一般般便又試吓。入到去都唔知食乜好，周圍望望睇吓D人食乜，見到食物賣相同碟頭大細都幾飄忽，有好有唔好，價錢上落亦比較大。最後平平地點了韓式芝士炸雞加個白飯，算是比較平的食物。  
雖然炸雞塊是用薄鐵鍋上但其實只是當碟用並沒有燒熱，雞塊幾大塊的，以價錢論是相當多，粉唔算厚，雞炸得乾身得來仍幾有肉汁，好食。咪住，芝士呢?咪上面那些白白的汁，真的太浠了，無乜芝士味而且唔好食，唔落好過落，正正經經灑些芝士碎，或平點灑芝士粉效果相信更好。  
白飯都好大碗，用的是較一般的珍珠米，都OK架。

西貢 - Okapi

想起來這間舖在西貢都已開了一段日子但原來自己未幫襯過，雖然自己覺得西貢無幾多間食肆味道係對得起佢個定價，但見開咗咁耐都仍有一定食客本身都有期望。

當日只是幫襯午餐。餐湯簡單得來只能夠講無乜味唔好飲，等同少少南瓜煮淋打碎再加個麵粉茨。麵包一樣無乜特別，唔難食嘅，只是未必好得過茶餐廳的餐包。  
西冷扒切得唔算太薄，煎嘅時間掌握得唔錯，只是唔夠焦香且又係無乜味，牛扒要表面有一定焦糖化後才好味但當然而家個價位唔可以要求太高，個汁亦太淡口，如果塊扒好靚或者個汁咁淡口無防，只是而家唔係囉。拌菜基本上同白烚無太大分別，加一丁點牛油或鹽唔係好點嗎?薯蓉當然亦沒有加忌廉或奶。以價錢論味道算是唔合格。  
天使麵更慘情，又係太淡無乜味得來得少少菇味，雜菇入面加了鮮冬菇當然亦係唔鐘意原因之一，講過好多次唔鐘意西菜入面加冬菇，唔係因為唔鐘意食冬菇而係冬菇味太"搶"太"出"，大部份西廚都係掌握唔到成碟野變到剩返冬菇味。這碟麵真係覺得幾難食。  
餐茶是茶包茶，咖啡本身可能未必係咁差但味太淡。  
當然這埋又唔係一無是處，起碼賣相相當唔錯，牛扒無血水亦無乜雪味，所有野清淡得來其實少油比較健康。講起健康又講吓很多人都以為少鹽就等於淡了無咁鹹無咁好食但其實是錯，少鹽食落一樣可以覺得差唔多鹹，要知道食物放入口咬了幾吓味道差唔多已決定了，能接觸到你味覺或嗅覺的食物只佔放入口食物的一少部份，其它可能未咬碎或未接觸到味覺便已給吞落肚。所以有人煎扒會在表面灑幾粒粗海鹽，食時由於有鹽份第一時間直接接觸舌頭，之後舌上又有殘留的鹽份所以就算肉入面無鹽都唔會覺得淡，但當然還由於有其它味道同時刺激。另一類似情況就是近年的泡沬醬汁，明明只有很一丁點醬汁但由於氣味氣化後被氣泡包住，入口後氣泡才爆開氣味馬上湧進鼻腔才嘗到濃濃味道，但有些人唔明白係又泡沬唔係又泡沬，有些香味打泡作用不大或效果不好，有些泡沬放入口後又唔馬上爆開失了最大作用。

馬鞍山 Cha & Cha

這次只是去幫襯下午茶，睇餐牌選擇都幾多但價錢有點貴。最估唔到吉列豬扒沙律碟頭會細成咁，豬扒都唔叫大件，沙律重要係放起個裝醬汁嘅細兜入面可想而知有幾少。味道方面沙律是熱帶什果罐頭做，而豬扒雖然塊肉唔太厚但粉都唔算厚，算幾好食。  
另一碟豬扒飯就一舨茶餐廳水準，反而幾大碟。  
茶無乜特別，較一般貨式。  
整體味道都可以，但眼見下午茶碟頭普偏相當細，價錢明顯稍稍偏貴唔太值。

荃灣 - 三昌肥牛

要打邊爐緊係最好要有肥牛至完滿，這次睇睇非常出名的三昌。除非天氣唔係咁凍無乜人打邊爐，否則一早好去，唔係排隊要排個半鐘以上係預咗，但牛肉係唔係咁好食呢?無錯，牛肩脊肥牛肉真係好好食，食落無乜渣同肉味好濃，係好好食，不過要早點去否則可能會賣晒。  
次一級的牛脊肉價錢其實只差很少很少，但食落真係差D，雖然都好食但會有些少肉渣。  
不過神話歸神話，留意佢自己無話過那些係本地手切肥牛，如果你以為係手切本地屠宰牛隻咁係你自己問題，因為咁好生意點可能全部手切，無錯係有手切，只是切都切到手軟，特別是近晚間係明顯見到佢地個個切到手都軟，所以其實絶絶大部份的肥牛都係機切而唔係手切，在旁邊的店舖用切肉機切完才搬回店中和手切肉混在一起包裝。另外一個幻滅的神話係這些肥牛是美國急凍牛肉而唔係本地屠宰牛隻的肉。所以排餐死其實可能只係買咗一般牛肉檔或凍肉舖都可以賣的機切美國牛，但當然佢賣的都係頂級的肥牛，只是要排餐死。  
再去另一間同樣出名的九龍城新興文記睇吓，Oh No，雖然佢地無咁明目張膽擺晒D盒出來，但見到佢地切緊那些脊肉完完全全一樣樣，咁唔知貨源又係邊呢?你自己估好了。

神戶物產 - 今川燒き

阿信屋近期都入都唔少日本品牌急凍食物，之前試過幾款都係麻麻地。今次見到這款今川燒，香港好似就咁叫佢做紅豆餅，雖然產地是中國，但這類東西在香港日式百貨公司或店舖都賣得幾貴，見阿信屋賣60蚊屬公價貨，即很多時做7折嗰隻，當然要支持下。  
見佢包裝背面建議用微波爐叮分半至兩分鐘，但都想先試試用焗爐返焗看看如何，結果外皮是有點點兒乾，都幾香口，皮很薄而餡料很多，紅豆餡已經減了糖份所以一般香港人食應該唔會覺得好甜。唔錯。


再試試用微波爐4個一同放在一個碟上先叮分半鐘，反轉叮多半分鐘。可能無咁乾及入面夠晒熱辣辣，估唔到重好食，但個皮叮完真係幾軟。

再改良一下，照上面這樣叮完放鑊上中細火輕輕烘一下，真係要幾快手同唔好咁大火因為好易燶，由於皮幾薄所以估唔到效果很好，烘完外皮較硬身，雖然入面餡料稍涼了少少，但味道同效果幾接近外面即做的那些紅豆餅。  
留意這款紅豆餅尺寸比一般香港見到的都大幾多，今日阿信屋重要公價做6折，計返每個才$3.6，唔駛講即刻買多兩包。同期還有魚形燒，不過考慮到用鑊返烘很難所以都係買返紅豆餅。

自製迷你牛角包

天氣凍除了食火鍋，時間夠多的話亦可試試自己做牛角包。如能成功做到手做麵包的話，天氣涼要做牛角包也不難，只是做酥皮要花時間。未用手做過麵包的最好先試做麵包掌握了麵團所需濕度及發酵過程後才做牛角包會比較容易。

 材料
 一磅高筋粉及適量的粉用於灑在枱面及麵團之用(約略咁上下就得，做嗰時都係倒了小半袋1Kg粉完全無磅過)
一包快速酵母(7克裝)
20克及180克(共200克)室溫放軟了的無鹽牛油，不可太熱有油流出
糖約4茶匙(平匙不要凸起)，不喜糖可自行減少份量
牛奶適量(約半杯奶加半杯水開稀，不喜奶味可再稀點)
雞蛋一隻
鹽約1/4茶匙(純粹調味用，唔想鹹的可以落少點或不用)

 
一磅麵粉加20克牛油、酵母、糖用手略搓勻，用奶水一路倒一路搓至剛成粉團便可，每個牌子的粉或每批粉的吸水量唔同，可以有極大分別，所以唔一定要用晒所有奶水，反過來唔夠水可再加，如做甜麵包一樣由於糖份較高比較黐手是正常，但太黐手就可能太爛，所以話做過麵包知道要去到什麼程度較易，否則見先爛些少後慢慢再一湯匙一湯匙咁加粉到剛可搓成團狀而沒太黐手便可。粉團略搓滑就得不要過份地搓因不想起麵筋。用保鮮紙包著放一旁約半小時讓粉團內的筋鬆開。  
舖保鮮紙，180克牛油切片放保鮮紙上成四方形，用括刀刮平中間的空隙，面舖保鮮紙再碌一下使厚度平均。相信很多人都知道這個偷雞方法，因為師父輩用粉皮包牛油球的方式係少點功夫但要較有技巧才做得好。  
之前的粉團碌成面積比牛油塊大一倍的四方形，打斜放牛油塊，四個角摺起包好。再碌成長條，薄點便成，儘可能四個角直角一點，在粉團1/3及2/3位置用棍壓一下，否則對摺後這個位厚了再碌時粉團容易擠出來之後較難做成方角，在表面灑些少粉防止黐埋，兩面向中間對摺，放雪櫃。留意做時用了矽膠墊，所以只需卷起成卷放雪櫃之後打開便可直接再加工，懶人方法。雪是為了讓牛油硬點唔好溶，及讓粉團的粉筋鬆開，否則之後由於筋性再碌平粉團時會收縮回彈得較厲害，較難碌出較四正的酥皮及四個角很難做出方角，特別是最後一次粉皮已很薄，若碌得唔夠方想用手拉一拉就很易穿。第一次及第二次由於粉皮較厚雪20分鐘左右便可(時間夠的半小時或更長亦可)。若中間困了氣泡用叉刺穿便可。  
拿出粉團，這次向另一方向(即轉了90度)重復碌粉皮成長條，粉團1/3及2/3位置壓一下，灑粉，對摺，放雪櫃。再重復一次。此時己成2x3x3=18層酥皮。最後一次因要儘量壓粉皮到最薄程度所以起碼要雪半個鐘讓粉團的筋儘可能鬆開。拿出後儘量碌到最薄及維持酥皮四正有方角，因太圓或斜角有可能之後要切走做成浪費。若好像所用的矽膠墊唔夠大便把酥皮碌大後介開兩份才各自再碌大。最後成了54層酥皮。

切成等邊三角形尾段中間初開，"mark"開開口後卷起，收口位向下放焗盆。由於自己食賣相無咁重要，兩邊切出來的三角邊可以兩塊合成成另一個牛角包。放焗爐內發酵，爐內放一杯熱水(不要掂到焗盆)稍加溫加濕幫助發酵。發酵一小時後取出，包會厚了約一倍(但只會大了少少)。雞蛋全個打勻後在牛角包表面掃上蛋漿。  
焗爐預熱至250C，見到表面開始變少少金黃後多一兩分鐘便可(不要打開焗爐門來看)，像這次放焗爐中層焗了7分鐘，可自行加減時間。之後調低爐熅至200度再焗13-15分鐘便成。