日向夏

今年在香港都幾多日向夏賣，連稍大間點的超市也有，睇落去幾似一個黃黃地色的橙，切開來睇橙肉樣子同西柚好似，其實都唔知係原種定係雜交的。味道有少少酸酸地，有點似橙又有點似西柚或碌柚味，果肉味道麻麻地，只是果皮沒太多苦澀味所以可以連皮一齊食唔駛搣皮咁麻煩，連皮食也有一種特別的香味吃起來更好食。

手信坊 - 鳳梨酥

見包裝上有馬總統個簽名，盒上又話2011年台北鳳梨酥文化節得金牌將，咪又買來試試。  
打開包裝，相對沒有另外一些人氣皇鳳梨酥咁浮誇。唔理咁多馬上食，唔......感覺上無預期中咁特別喎，中間的菠蘿是較濕潤，但就沒其它一些用特別品種菠蘿所做的鳳梨酥咁重菠蘿味，不知是否因溝了冬瓜的原因，酥皮都香，但就不算特別香。整體是比十幾蚊一包的鳳梨酥好些，但就明顯給幾個同樣出名的牌子比了下去。  
不知是否包裝貨放久了的關係，感覺上它太似十幾蚊一包的鳳梨酥，起碼唔知合埋眼食完隨時可能以為是十幾蚊一包的貨色，只是鳳梨醬比較濕及酥皮比較鬆，或者真係唔係自己杯茶吧，還是較喜歡較濃菠蘿味的鳳梨酥。

觀塘 - 一杯鐵板燒居酒屋

本來是想去AMP御泰坊食飯，結果在門口已一肚氣，帶位那個就係唔埋我地，連遲來的幾枱客入晒去佢都重係唔埋唔彩我地，問了佢幾次都無乜反應，都唔知做乜，谷鬼氣行去旁邊另一間日式食店食飯唔幫襯佢。這次去的一杯在商場內頗有人氣，食飯時間等位都有些難度。入到去地方比想像中大，裝修都算有點特色。  
點了一份壽司定食，用的魚比一般連鎖壽司店好一點點，亦只是一點點，其餘就是魚切得比較大件吧。反而跟壽司一同上的糖薑較甜口且很好味，不會得個辣字，好食到要問侍應拿多一碟。而烏冬亦是有咬口彈牙的一類。  
另一份炸雞飯亦都算可以，飯都幾多珍珠米，炸雞幾好食但又唔算好好食，反正炸雞要做得好幾難，但要做得差一樣咁難。題外話，有時幾配服大X幾，早幾日去食了個燒雞肶加紅豆冰茶餐，雞肶乾到有點似肉乾，紅豆冰無豆味又無奶味，重要排了兩次隊等了超過5分鐘但都一樣都咁多人幫襯，傻的嗎?  
最後的茶泡飯，估佢唔到飯入面己經有茶湯但都跟多一壺茶湯，飯面的魚肉本身是生的，淋了熱湯後送到食客面前表面是熟了而裡面仍是生的，攪攪再浸入湯中就啱啱好，茶湯茶味很淡反而有點似湯飯，好彩都算好味，反正比之前那兩個餐好吃，前菜其中一碟似是魚絲，味幾淡，加上湯飯中會好味一點但影響又不太大。  
以價錢論是稍稍有點貴，起碼點的幾個套餐在外面平一點也不難食到同樣的質素，而前題下所要改善的也未必是味道，反而是食材擺放及用具不夠好不夠靚，說實在話單看相片食物樣子和任何一問平價日式食店有大分別嗎?

香港仔 - 新昌發

入到去香港仔只想食點較簡單的東西，便去了這裡食碗粉。今時今日香港仔都唔多算係旅遊區，反正自由行唔去就唔似旅遊區，這些較老的食店人情味亦比較濃，部份食客門都有各自打招呼，隨了酒樓外算是比較少見了。  
先來一杯茶，都有茶餐廳應有的水準，再來的牛腩麵，估唔到會俾咁多湯，湯的味道算可以，只是頗味精，牛腩味道不過不失，牛腩不只照片中影到咁少的，只是湯多有一半牛腩沉了在湯入面見唔到，麵本身的質數一般而煮的時間幾好沒有過淋。 另外一碗魚蛋粉魚蛋都幾好食幾爽口，唔知係唔係買回來的，除些之外味道亦正正常常沒什特別。  
不知從何開始香港人便鐘情於食清湯腩，清湯腩除了油少之外自己覺得味道總不及柱侯牛腩，只是好的濃湯柱侯牛腩真的買少見少，莫非吓吓都要自己落手做。

觀塘 - 廣東海鮮酒家

算是一間無乜人知的酒樓吧，其實自己都係搵食所以試試。是上樓的酒樓，酒樓來講裝修得算簡單，反而樓下地舖同名的茶餐廳重靚點，人亦較多，酒樓的茶客當日大部份都是公公婆婆。  
酒樓的點心價格一般般，由於早茶沒有特價所以其實還是有點貴。點心是在門口有個檔口仔自已出去拿的，由於整個格局都幾平民所以期望都唔係好高，但世事往往就係咁，沒有期望之下反而有點驚喜。

雞扎真常好味的，鳳爪皮很鬆，若不是買返來就咁鬆就應是先返炸了才煮，幾好味，蝦餃正正常常舊式做法，雞包仔包皮幾好且夠薄味亦唔錯，重有好大隻爽口蝦仁起入面。整體幾滿意，味道雖唔算非常好但肯定對得往個價錢，難怪咁多公公婆婆幫襯。

大埔 - 一樂燒臘飯店

這家店真係幾奇怪，點樣奇怪?最近幫襯了兩次，第一次非常好食，第二次就只是一般，單看食物風格及水準的分別真的不敢相信是來自同一食店。  
先看看第一次，店家燒了頗多燒鵝在店內放涼，單看樣子相當吸引。點了半隻燒鵝，肉質很嫩滑多汁，肉亦醃得有味道，明顯比中環的一樂好食很多，若要彈的應是醃肉味道仍可再好一點。一起點的齋瀨亦可以，湯底都算可以。  
同場加影燒肉飯，燒肉又是做得相當好，用的肉雖然唔係好的腩肉，做出來的燒肉卻很淋滑好味唔"鞋口"，只是皮比較厚及只有一點點脆，唯已比大部份燒肉做得好。  
講完天便講吓地，由於覺得好食所以很快又再去幫襯，點知這次希望大失望卻更大。一開始想點的燒肉及燒排骨沒供應，於是點了燒鵝胸飯，這次的燒鵝燒得比較燶，而肉質是死死實實的，像一般街市燒臘檔死死實實的那些，味道跟上次本應差唔多但因幾乾無肉汁所以便差了，只能算是一般般。  
再來叉燒飯，更加失望，又係死死實實的，而且不但唔夠味重乾曾曾，外面上糖亦上得唔夠，如果講唔好食又過份咗一點，或者用只是一般貨色來形容更好。  
最後的多寶飯以滷水為主，有兩件雞幾片紅腸，半隻鹹蛋加幾多的鵝翼。紅腸就唔多好食，鼓油雞幾好味不過太少了，鵝翼比想像中淋好易咬，滷水味像唔錯做得幾好。  
最後又係那句唔知佢想點，兩次的燒臘明顯是出自不同師父，是原有師父放假嗎?還是第二次的學師仔未滿師?

紅磡 - 一品螞蟻

去到紅磡一時之間都唔知食乜好，又試吓這間的下午茶餐。(做乜有個垃圾筒放正門口咁大整蠱)。  
先來一個甜品拼盤，放得都算精美，入面的香蕉班戟做得唔錯。比較奇怪三款甜品入面有兩款燉蛋，法式燉蛋芝士餅唔係好覺蛋入面有芝士味，唔知係咪只是餅底有，不過又唔係好覺。綠茶焦糖燉蛋都幾好味，綠茶唔算好濃蛋亦幾滑，只是略嫌焦糖太薄，另外估唔到咁大碗。  
吉列龍脷柳伴粟米忌廉蛋包飯比較行貨，龍脷柳正常的，不過個汁無乜粟米無乜味而且太杰，蛋由於要包著飯所以好熟，其實好像日式包飯那樣做滑蛋皮蓋著飯面便算肯定更好。  
最後的那個好像是台式素扎肉麵，看樣子不是太好，由於自己無食過所以沒東西可以再講。餐茶就很行貨唔算做得好的那類。

越南金枕頭榴槤

去街市賣榴槤，檔主話今年從泰國來的品質唔係咁好，好多開了後入面都爛，介紹試試來自越南的金枕頭，佢話第一年試賣感覺幾好食，包開包食，見$15一磅，價錢同泰國的差唔多，咪又買來試吓。買了一個不太大的"馬騮頭"80幾蚊，榴槤的重量似乎比泰國的輕身。  
檔主介開後拿回家先放在一邊，打算食時才打開，這種榴槤的氣味很濃，不知是否較熟的關係比泰國的略要勁的一點，唔駛一陣成房都係榴槤味。

打開後肉色較深黃，可能較熟所以肉較爛身似很熟的感覺，看落去幾似泰國大丁榴槤的肉，肉算厚但大核(不知有否細核的)，比泰國金枕頭香但略無咁甜，與其說它是金枕頭不如說是另外一個品種的榴槤，肉跟一般榴槤一樣咁多水份，而由於個殼較乾身所以輕頗多計起上來又平返點，整體沒泰國金枕頭咁啖啖肉不過較香，都幾好食。

荃灣 - 陳記燒鵝粉麵茶餐廳

一向都自稱自己的燒鵝好味的陳記，在香港都有幾間分店，這次去荃灣店試試。  
睇吓餐牌，下午茶價錢同區都唔算平，一踠鵝瀨加杯熱茶都要40蚊。奶茶是標準茶餐廳出品，不過茶味唔夠濃同唔多熱，除此之外其實算幾好飲。  
主角燒鵝瀨出場，沒想像中好樣，鵝肉幾乾同硬，味道只比一般燒臘店好一點點，講真個句唔講以為食緊鴨肉，瀨粉幾爛唔彈牙，而且唔知點解剪到"碎濕濕"，用筷子跟本夾唔起要用匙，感覺及食味幾似銀針粉唔多良好，成碗粉整體其實唔算好食，最多算緊緊合格。  
另一碗燒肉瀨更不似樣，皮不但唔脆，燒肉又乾又硬，直程同街市十幾蚊碟的燒肉沒分別，相當失望。

微熱山丘 - 鳳梨酥

自己不是特別鐘情這些貴價鳳梨酥，不過有人送就當然食，看看這個微熱山丘的鳳梨酥怎麼樣。  
包裝真的幾靚，可能由於是台灣買所以有個布袋裝著，紙盒又有條蝴蝶形橡筋，打開來看亦很精美，鳳梨酥這家東西的包裝在台灣真的越來越誇張，可直迫日本。微熱山丘的鳳梨酥似乎比其它牌子稍稍大件一點，酥皮幾薄且由於形狀較四方所以鳳梨與酥皮的比例會較高，食落口會食到更多鳳梨肉，愛吃鳳梨的人更易覺得它比其它牌子好吃。  
味道方面都幾好，比很多牌子好，不過由於是放得較久接近食用期限才食所以不作多評。鳳梨酥這家東西跟一般中式酥餅一樣，剛出爐不久時最好吃，頭幾天還很好，之後味道會越來越差，所以很難比較那種牌子較好食，即使同一日出爐，每一天都可能有點分別，亦因為這樣在香港買到或食到的很多時候都沒台灣專門店買到的好吃。