九龍城 - 台灣皇上皇黑椒豬排

起九龍城佢間舖見到台灣製的急凍黑椒豬排做緊特價$15兩塊，又買來試試。  
先放室溫解凍，拿出來煎香，加上碗頭飯最佳配撘半生熟煎蛋，加埋日本珍珠飯。  
肉質幾鬆軟唔知有無用過鬆肉粉。豬扒只有很淡很淡的黑椒味，亦沒有香港慣常醃肉的豉油、老薑或酒味，有少少甜味又有少少幾得意的講唔出味道，另外有很少的雪味，起鑊時爆點薑片應較好。唔難食但又唔係好好食，只可以話口味道有點不似預期，和食開港式的頗不同。

灣仔 - 新仙清湯腩

來這裡食野純粹衝著佢門口寫住連續4年獲米芝蓮指南推介，由於無睇過本指南唔知佢寫乜，所以點了碗招牌清湯牛腩河同熱檸茶。先來的熱檸茶要求佢地沖濃點，所以和正常是有點分別，飲落茶味一般和一般茶餐廳無乜分別。  
主角清湯牛腩河出場，個碗幾大但睇落無乜野野咁，原因是得好少河粉，好多野浸咗落湯入面，牛腩實際上無照片睇到咁少。河粉都幾滑，湯都幾好飲，牛腩無想像中咁好食，淋得來都仍有些咬口但不是很鬆化那種，味道隨牛肉味之外都幾清淡吓，蘿蔔就是白烚蘿蔔，整體唔覺得好特別，未至於係最好食那類。做得最好的牛腩應是肉質纖維部份淋得個有些咬口且有很多肉汁，而纖維中間的筋膜脂肪有點化開，當然要做到咁談何容易，特別是多肉汁這點十間牛腩店差唔多十間都死，因為要用香港或大陸的新鮮牛腩，進口或雪藏牛肉都很難做得出，功夫亦絕對唔野少，成百蚊斤牛腩煮完縮剩一半都無，到時收你二百蚊碗又有幾多人會幫襯。  
唔知係咪呢碗特別少河粉，食完都重覺得幾肚餓。

尖東 - 千禧新世界香港酒店 Café East

曾幾何時很喜歡在這裡吃自助餐，因為價錢相對來講無其它酒店咁貴而食物質數亦唔差，不過後來酒店賣盆放了做千禧新世界香港酒店，餐廳亦裝修暫停營業好一排，重開後改成Café East，一直都沒有機會幫襯，這次去看看平日的自助午餐如何。  
一入到餐廳，如何唔留意可能都唔會留意轉咗名，無論裝修同食物擺設格局或食物款式同之前沒多大分別，之不過熱葷味道有點兒跌Watt，比以前差了少少，但一般來講整體仍幾好。焗生蠔也做得幾好味，話晒這些高危食物煮過始終食得更安心。而這裡的印度咖哩在自助餐中其實是做得較好味的，但就唔知點解唔太受歡迎。  
這裡的魚生有點解凍問題，特別是吞拿魚魚肉有點散開，雖唔係好嚴重但都係少吃為妙，蟹腳肉亦有點霉但唔肯定是解凍還是本身烚過龍問題。另外龍蝦鉗同青口等就正常，只是自己唔太偏好白烚的口味。  
海南雞做得唔錯雞肉幾滑，亦食唔到有雪味。  
除了中西湯外還提供了肉骨茶，之不過就唔多好飲，無乜藥材味之餘亦有些雪味，相信是雪排骨沒有汆水之過。  
甜品選擇幾多，有心太軟喎，不過味過只是麻麻而且唔係好流口。其它甜品就一款款，有些都唔錯而有些就麻麻地，整體是好過好多酒店自助餐甜品但又唔係最好那類。

旺角 - 小肥羊

中國人在香港開的火煱店很多時給人一種頗奇怪的感覺，常常都將自己定位在頗高水平，但又偏偏提供唔到自己在國內的特色食物。見小肥羊全包任食都算平，又睇睇點。

由於無乜人會在下午茶時間走去食火鍋，所以得自己一枱真係食火煱，其餘初時還有另外幾枱客在飲茶，之後就變了包廳。因為佢個價午市每位$138同人地差唔多，豪華版亦只是$178，真係幾平(星期五、六及假期前夕多$10)，所以問咗好多次係唔係真係全包，待應都答咗好多次係，真係幾"港燦"feel，好在待應服務大陸得來(無野做時行行企企打吓牙骹睇吓電視好似大陸待應咁)對往人客時態度個個都幾好，絕無話特登招呼你一枱客黑面，重幾個人專登提早開返個醬油枱(很少選擇)同氣水啤酒位，底讚，不過在這裡做待應其實幾慘，因為中間無得落場午市要一直做到晚市無得休息。至於天氣開始凍會唔會好快加返做原價就真係唔知了。  
由於自助美食區要晚上六點至開，所以所有野都係入紙剔單。由於選了豪華任飲任食，可以任選湯底，配料紙下面的深黃色區域食品同藍色飲品區都包，出於貪心當然主要深黃色區。講真海產類都係比較腥，鐘唔鐘意就幾見仁見智，而招牌AAA羊肉，感覺上沒有大陸佢自己分店續碟計那些咁嫩滑，這裡的油脂比較多同分份得無咁好，之不過精品肋腹羊肉(即同竹笙放在一齊的照片中較淺色那種)就頗好食。  
至於凍豆腐始終唔似普遍大陸食到那種起咁多孔，吸湯量少很多，之不過你又知唔知大陸的豆腐點烚都唔會老，唔知用乜來點滷(凝固豆腐)。羊鞍即羊架樣子麻麻地食落味道可以的，羊肉餃OK但唔係好特別，啤酒有細樽裝青島純生確係正，起碼好過鎖匙啤，其它配料同其它酒樓任食的水準差唔多。而至愛羊粉(粉條)唔好意思無得供應。

講真果句，來這裡就唔好主攻肥牛，主攻羊肉食多佢幾碟精品肋腹羊肉乜本都回返晒。最後，佢個滋補清湯鍋底雖幾好味但真係鹹了點，根本唔駛點豉油。

灣仔 - Have a Date

似乎是開了不太久的餐廳，以價錢來講是有點貴，只是同區食野稍為無咁街坊的都係咁貴所以價錢算可以接受。餐廳內放咗好多可愛公仔及擺設，唔知係唔係老闆們的珍藏。點了個當日的特餐，羅宋湯加磨菇黑椒T骨牛扒加咖啡或茶。

羅宋湯入面幾多菜有些少肉，是加了茄汁那種，本身應幾好味耐何非常之鹹，起碼落多了一至兩倍鹽，根本鹹到放唔入口，奇怪無人向舖頭投訴，重要有好多人飲得晒。希望只是一時錯手。  
之後的T骨扒可配飯或薯菜，飯或薯條的份量都幾多，當時的薯條是即炸的所以特別好食。塊T骨扒大塊得來切得算幾薄，價錢問題無辦法，煎得可以的，只是塊扒本身太多筋同肥油，若煎前去咁部份筋會好很多。個汁由於用罐頭磨菇煮，黑椒亦唔算好多，味道比較似一般的紅汁，雖然唔算特別但起碼是加強版，味道亦較好，而配菜只得一些白烚西蘭花連梗及紅蘿蔔，以價錢論就有點寒酸。  
之後的奶茶都可以啦。餐飲是可加錢改特飲，例如這杯荔枝紅茶咁，杯茶是正常的台式果味紅茶，有少少偏甜，之不過用的不是一般的珍珠或果凍，而一粒粒的是一層薄膜包著糖漿，咬落去有點似咬三文魚子那種爆漿感覺，加理本身果味紅茶陣果味都幾正。講起上來有點失禮，原來並唔知道這種糖漿粒粒的正確名稱，有人能告知嗎?

尖沙咀 - AVA Restaurant Slash Bar 半自助午餐

這次幫襯的半自助午餐是住於尖沙咀隆堡麗景酒店內的高層餐廳，和下面大堂的自助午餐是不一樣的。平日價錢每位$298另加一，假日多一百。但由於有"開飯"優惠卷平日二人同行連加一共約四百蚊，都幾底，不過餐廳侍應話在推廣期如果下載佢地個儲分app可以一百八十幾蚊一位再平多少少，而有Infinite Visa信用卡就更平。  
餐廳想走較高檔路線，但給人的感覺又有少少怪怪地，位處高層景觀非常好，裝修都幾靚但唔算優雅，而女職員的製服自己覺得相當"leung"("土包子")，同成個氣氛唔多襯。  
以半自助午餐來講無論是自助的沙律甜品、或自選的頭盆主菜選擇都算多。沙律以買回來的凍肉居多，味道都唔錯，兩種煙三文魚、幾種芝士及葡撻仔都幾好味，唯用的風乾火腿風乾時間較短較淡口，且切出來之後真的又再次風乾了。食完個沙律飽咗一大半。  
餐湯只得西蘭花湯一種，這個湯就真的做得不好，只得一陳草青味一點也不好飲。好在自己很喜歡芝士西蘭花湯而這裡剛好有好的芝士，加一大塊溶入湯裡能蓋過那草青味。這裡的長法包亦唔錯。  
自選的頭盆選了歐陸海鮮拼盆，頭盆為兩人共用，松葉蟹腳稍幼身，生蠔都幾好味只帶很少的腥味，但蠔開得很差每隻的肉內勻留有很多碎蠔殼，如果同客食飯真係死得。青口無乜特別。  
主菜到，首先是烤澳洲神戶M4西冷牛扒，賣相認真麻麻，個汁明顯有向下流的情況很似倒汗水，擺位亦頗差，塊扒幾細塊。點的是半熟扒，一切開明顯過熟，再食落原來燒得不均勻一邊過熟而另一邊就過生。講了咁多你實以為唔多好食，錯晒，塊扒好好食，軟得來無乜筋味道亦好，沙律同BB薯亦幾好食。  
另一道主菜香煎檸檬龍脷柳賣相亦唔多好，亦應驗了西廚煮魚一般唔多得呢句話，重要係很差那種。魚肉本身溶雪都以經做得唔好肉有點散，煮得又過熟，檸檬味淡得來唔清香，而且魚柳近頭那邊滿佈魚骨，如果同客食飯又死多次，真係唔知搞乜。  
到自助甜品，相信全部都係自家製，雖有幾多小問題唯味道算唔差幾有誠意，用料算幾好，好多都夠濃味，例如牛奶布丁幾濃牛奶味但有點過實，果仁朱古力好食但可加多少少忌廉等食落口溶得快少少。而朱古力噴泉朱古力開得無其它食店咁稀比較好，做得最好的是馬卡龍，每款都做得很濃味很鬆化，拿出街賣無難度。  
雪糕相信亦是自家出品，裡面都有些少冰粒，是自家做急凍得不夠快的結果。三款味道都頗濃味好食，溫尼拿明顯是用真的溫尼拿來做，入面亦有比較多的溫尼拿子，唔錯唔錯。  
最後的咖啡茶，咖啡好好飲，用的豆炒得很香沖出來的咖啡有很濃的蕉香味而不太苦。茶唔太清楚是什麼茶，茶味頗淡自己唔多鐘意。  
整體相當滿意，只要主菜唔選魚就可以，就算以原價計其實都可以，減價後就更超值，相同價錢食得比很多自助餐要好。另外有一些題外話，這裡的男廁尿兜位有落地玻璃，可以對往維港小解，之不過對面兩座大廈就快入伙，將來會唔會有點尷尬，而且廁所很細，男廁只有一格，女廁得三格，急起上來更加尷尬。