2014年8月18日 星期一

郭元益 - 100%純鳳梨酥

一向都對郭元益這個品牌有唔錯的感覺,在美食博覽會買見到首次帶來了100%全鳳梨酥,看看它和平時70%鳳梨的有多大分別。  photo KuoYuanYePurePineappleShortcake-01.jpg 
首先包裝確是靚了頗多,不過代價就是由一百蚊10個變成百二蚊九個,計返貴了1/3。打開紙盒包裝,裡面的鳳梨酥只是正常大小,酥皮的皮是一樣的,都是咁鬆化。至於主角鳳梨饀是否好食咗,就真係幾見仁見智,可能改成全鳳梨關係而每批鳳梨都可能有所不同,且鳳梨不是攪很爛那種,入面的饀料控制可能來得更困難,第一口吃落是有點太乾,單看相片可能都會發現,再開另一塊來食亦有同樣問題。  photo KuoYuanYePurePineappleShortcake-02.jpg  photo KuoYuanYePurePineappleShortcake-03.jpg  photo KuoYuanYePurePineappleShortcake-04.jpg  photo KuoYuanYePurePineappleShortcake-05.jpg 
由於和原來的梨酥不是作AB式直接比較,很難說鳳梨饀分別有多大,整體唔覺得特別香或酸,雖仍是相當好食,但還是情願省點錢買原來較平的那種。

2014年8月15日 星期五

美食博覽 2014

今年的美食博覽會面積非常之大,第一日人流已經算是較少但仍用了超過4小時才可沖沖行勻全場,當然人多行得較慢亦是原因。比較特別算是同期舉行了家電家品博覽,將普通的家品電器同無乜吸引力的晚市特賣場搬了過去舊翼三樓,新翼一、三樓仍是正常的美食博覽會展區同專貴美食區域,新舊翼的五樓就同為貿易區只招待業內人事。  photo FoodExpo2014-01.jpg  photo FoodExpo2014-02.jpg 
今年有得試食的地方都算多,而有些東西都幾平,特別是B2的午餐肉減價頗厲害,但必須要看清楚想買的產品是否要有火腿,價錢差一些。而白豬仔亦比超市平很多。講開午餐肉,在國內B2有一款自己很喜歡的產品就是不知道為何不拿來香港賣,如果你吃過火腿午餐肉入面不是有一粒粒火腿粒嗎?這產品就是整罐都是這火腿粒,不過它是切得比五香肉丁還要大一點的火腿粒,煮麵當餸是一絕,以前經常買回香港。  photo FoodExpo2014-03.jpg  photo FoodExpo2014-04.jpg  photo FoodExpo2014-05.jpg  photo FoodExpo2014-06.jpg 
頗多店舖賣的產品與榴槤有關,只是真榴槤的價錢比果欄貴很多唔駛在場內買拿餐死。而賣日本水果的店亦唔少。  photo FoodExpo2014-07.jpg  photo FoodExpo2014-08.jpg 
另一邊廂惠康出手就無去年重,無錯褔袋內的東西仍不少及計埋唔平,但偏偏一百蚊五樣的東西唔吸引,今時今日頗多不用廿蚊都唔難買到,包括佢自己分店分分鐘都唔駛廿蚊,除非真係覺得褔袋內的東西啱用否則無謂在場內買拿餐死。  photo FoodExpo2014-09.jpg 
其中一個最愛的台灣鳳梨酥品牌郭元益亦有擺檔,較特別的是今年帶來了香港仍未有得賣的純鳳梨酥,原來平時賣開的那種入面饀料只有70%是鳳梨。自己喜歡在美食博覽買純粹因為新鮮,之前都講過鳳梨酥只有做好後頭幾日好食,之後雖然未過期但味道已經變差很多。  photo FoodExpo2014-10.jpg

2014年8月14日 星期四

樂富 - 天褔軒

其實本身唔係諗往去這裡飲茶,只是咁啱經過見到這酒樓見門面裝修都幾靚便又試試,以價錢來講在屋邨都算貴,鬼咩,這些老牌公屋有大把隱形超級富戶。重記得以前個包租婆住緊公屋但係有幾層樓收緊租,佢話千幾蚊租又方便風水又好(財運)邊到搵,就算幾倍的所謂市值租金都唔駛旨意趕佢走。又記得一次好似係年三十晚經過某舊屋邨當晚路邊泊滿的名車可能比半山區還要多,求其一輛都過五六十萬,過百萬的當然亦唔會少,真係奇景。

講咁多其它野無非因為這酒樓的東西無乜可以講,只需用"唔好食"就能形容,大部份野都有那種"差咁d"的感覺。服務方面見到招呼熟客都可以的,咁亦即係對生客差囉,重要係頗差那隻。  photo JoyLuckHouse-01.jpg  photo JoyLuckHouse-02.jpg  photo JoyLuckHouse-03.jpg  photo JoyLuckHouse-04.jpg  photo JoyLuckHouse-05.jpg  photo JoyLuckHouse-06.jpg

2014年8月12日 星期二

新薄崗 - 厚福火鍋海鮮專門店

厚褔都是近期比較喜歡的酒樓,之前幫襯過旺角的分店在較平價一點點的酒樓中服務真係唔差,這次去新薄崗分店雖然比較旺角分店差點但亦已比同級的服務好一點點。

至於食物都是一般酒樓應有水準,無話特別好又無話特別唔好,反正價錢平一點點以價論質數便是好一點點,當然唔好有大期望。鍋啫大澳通菜好大鍋,比一般正常的大碟近一半,好香蝦膏味。冬瓜盅正常的,而蒸魚的時間剛好魚好滑,乳豬就有點淋味道只一般。
 photo HauFookHotPotSeafood-A01.jpg  photo HauFookHotPotSeafood-A02.jpg  photo HauFookHotPotSeafood-A03.jpg  photo HauFookHotPotSeafood-A04.jpg 
整體是滿意的,或者最大問題是坐得幾迫,無法,樓上舖面積又唔算好大,幫襯較平的酒樓是要付出一點代價。

2014年8月9日 星期六

榴槤紙包蛋糕

焗爐預熱180C,牛油紙上點牛油放焗杯內。50克牛油室溫放軟(唔駛講我又係用微波爐)。4隻大雞蛋蛋黃及蛋白分開,蛋白用打蛋機高速打至起泡,加1/5茶匙 cream of tartar 及60克糖打至企身。相片中的cream of tartar 已是太多了點,另外做時一時傻咗將沙糖倒了入蛋黃中,好在問題唔大。打蛋白個兜一定要很乾淨及不可有水份,否則蛋白會打唔起,cream of tartar 使做出的蛋糕硬身點焗完冷卻時唔會收縮,但加得太多蛋糕會好似海綿咁唔好食。若無 cream of tartar 就唔駛加。  photo DurianCake-01.jpg  photo DurianCake-02.jpg 
牛油用打蛋機打爛不要有固塊,加兩湯匙奶粉,加之前的蛋黃及小小溫利拿香油打勻,加85克低筋粉底速再略打勻,不要過份打否則麵粉起筋就唔好食,如相片中個兜旁邊仍有小小麵粉也不太打緊。  photo DurianCake-03.jpg 
將一小半之前打好的蛋白加入蛋黃漿中,略攪勻後全部倒回蛋白中,再輕輕攪勻,所謂攪其實不是真的攪,而是將下面的粉漿用刮刀一層層摺上來,近全勻便可,攪太耐蛋白泡沬爆得太多做出的蛋就唔鬆軟。  photo DurianCake-04.jpg  photo DurianCake-05.jpg  photo DurianCake-06.jpg 
每杯加2/3粉漿,"凳凳"焗杯等底部填滿粉漿。榴槤肉插入粉漿內但不要到底,面再舖粉漿將榴槤全蓋著再"凳凳"。入焗爐中層焗半小時即成。有人會先將爐溫加高20C讓氣泡發得更大,固化後才調回正常溫度,使做出的蛋糕更鬆軟,這完全隨意。  photo DurianCake-07.jpg  photo DurianCake-08.jpg 
有得食了,正。榴槤是小數焗完都完全唔會走樣的生果,只要焗時不直接接觸到金屬便可。  photo DurianCake-09.jpg  photo DurianCake-10.jpg

2014年8月8日 星期五

榴槤酥

做桃批時剩底的酥皮粉團頭頭尾尾當然無可能掉入垃圾桶,一於做榴槤酥。焗爐預熱180C,雪櫃拿出來搓軟,包入較熟的榴槤肉後搓圓略壓扁,有些少穿也不打緊反正不會漏饀。放焗爐中層焗30分鐘即成。出面無得賣的,很好食呀。  photo DurianShortcake-01.jpg  photo DurianShortcake-02.jpg  photo DurianShortcake-03.jpg  photo DurianShortcake-04.jpg

2014年8月7日 星期四

蜜桃批

這次整蜜桃批,250克帶鹽牛油室溫放軟(由於唔想等所以雪櫃拿出後直接用微波爐高火叮廿秒等一陳再叮十秒),高筋粉350克、低筋粉100克、70克糖、50克糖霜溝勻後,加一個蛋黃及之前的牛油略搓勻便成,不要過份搓導致粉團起筋。用保鮮紙包著放雪櫃。  photo PeachPie-01.jpg  photo PeachPie-02.jpg 
焗爐預熱180C。罐頭桃一大罐倒掉水後切粗片,放煲內加杏果汁(用的那款加了提子汁)剛浸不過桃片便可,用杏果汁貪佢比較香,加一湯匙半糖(每種果汁不同要試味不要太甜)及二湯匙氈酒(可不加)將桃片略煮軟,用一半馬蹄粉一半生粉少少水開了倒入直至杰身。注意馬蹄粉要煮一陳才溶,可先開一湯匙倒入才再開生粉水倒入至杰身,若無馬蹄粉全用生粉也可,只是加點馬蹄粉無咁易出水。連煲浸水略降溫。  photo PeachPie-03.jpg  photo PeachPie-04.jpg 
取出之前的粉團,當然唔好同我講要雪幾耐雪實未,總知唔出油就得,唔想洗兩次手。批盤上一層牛油,粉團分成一大一細兩分,約3/5同2/5,大的放批盤,用手在盤內壓平,注意不要太厚特別是角位唔係唔好食,四邊多餘的粉壓向盤邊整走。倒入桃片。多出來的粉同另一粉團略搓勻,底放保鮮紙,放粉團,面再舖保鮮紙,用手壓薄大過批盤面,取走面的保鮮紙,連著底保鮮紙將粉皮反轉舖批面後才撕走保鮮紙,將粉皮壓下同樣地取走多餘的粉團,用叉在上面刺幾個散氣孔。之前剩下的蛋白打勻後用掃薄薄掃一層在表面,放焗爐中層30分鐘便成。  photo PeachPie-05.jpg  photo PeachPie-06.jpg  photo PeachPie-07.jpg  photo PeachPie-08.jpg  photo PeachPie-09.jpg 
由於之前剩了些酸忌廉,所以用紐約芝士蛋糕同樣方式在上面加了一圈。  photo PeachPie-10.jpg

2014年8月5日 星期二

紐約芝士蛋糕

只做了半份(薄了一半),下面份量除舖面的酸忌廉外分量都是半份計。兩塊忌廉芝士共500克及牛油50克先放軟,預熱焗爐至170C,忌廉及牛油用刮匙壓爛搓勻,加入80克糖攪勻,兩隻半大雞蛋略打勻,分兩三次加入及攪勻,之後倒入焗盤(旁邊可開那種唔係拿唔返出來),"凳凳"後用牙籤刺穿表面的大氣泡,入焗爐中層焗40分鐘(厚身要焗耐點)。  photo NewYorkCheesecake-01.jpg  photo NewYorkCheesecake-02.jpg  photo NewYorkCheesecake-03.jpg 
酸忌廉半盒(約100克)加20克糖攪勻,蛋糕焗好後可關焗爐,用酸忌廉舖表面,放回焗爐5分鐘便成。蛋糕放涼後從焗盤取出再放雪櫃,要雪凍後才會較實,喜歡較軟的可取出放暖些後再食。  photo NewYorkCheesecake-04.jpg  photo NewYorkCheesecake-05.jpg  photo NewYorkCheesecake-06.jpg