銅鑼灣 - 盛八食堂

之前曾經去過屯門的盛八食堂感覺都唔錯，這次去開銅鑼灣唔知食乜好，見這店都幾有人氣便又入去試試。一坐底馬上感覺到張枱好細，枱面又放滿食具，要叫多點野食都會有難度，想叫待應可唔可以換張大少少枱不過真係想想好啦，一來當時無枱，二來待應好似一路講住"我睇你唔到，我睇你唔到..."咁。

終於落到單，點了吉列極上蟹餅滑蛋包飯連沙律餐湯及甜品，同山葵燒汁極上牛肉焗飯。先來個餐湯，得大半碗都好細吓喎，味道係茶餐廳水準重要係美而廉果隻，似開出來無乜味的粉芡，入面叫做多了三四片罐頭磨菇，相當失望。  
沙律就不過不失，沙律汁味道都可以但落得稍為太少。  
山葵燒汁極上牛肉焗飯比想像中乾，味道普通山葵味唔太重，炒飯底都算可以，問題係個汁好鹹，撈飯一齊食仍然好鹹，但唔撈又變咗齋雞蛋炒飯，若唔計好鹹整體亦只是很一般。  
之後的吉列極上蟹餅滑蛋包飯就做得比較好，雖然個汁的味道較預期差點點唔太鮮味比較行貨，不過這碟飯汁多總是要加點分，滑蛋整得唔係好靚但確係好滑同好食，蟹餅都可以的不過有無其實對碟飯唔係好大影響，剩個滑蛋皮同汁都可以食晒碟飯，只是無佢賣唔到錢，整體算做得幾好食。  
之後的雪糕又係幾行貨，唔知係咪想你回味吓舊式茶餐廳。味道不過不失雪糕都算中價貨式。  
食物明顯比屯門分店做得差，服務...咪話咗想你回味吓舊式茶餐廳，食餐飯啫，咁多要求做乜。