元朗 - 名門讌客

第一次來這裡飲早茶，老實講句本身無乜期望，睇下張特價點心紙，確係幾平喎。留意孖寶點心紙，叫孖寶最平，三寶竟然更貴，叫四樣更貴，奇怪奇怪，咁樣係人都叫兩份孖寶而唔叫四喜啦。

貴妃雞飯味道麻麻地，勝在平。炒米粉雖然唔係好大碟，都幾多料味道也可以。  
炸雲吞幾脆，素魚翅餃有好大隻蝦喎，潮州粉果沙葛幾多幾好味，其餘的點心亦可以。
整體都幾好食，只是鹹了點，以咁嘅價錢，質數唔錯。希望下次再來也能有這水準但不要這麼鹹。

小西灣 - Valerie's Restaurant Cafe Bar

小西灣特別是藍灣一帶的新發展區環境都幾好，大商場入面的食店也不少。這次不去飲下午茶改食 pub food 睇吓點。

選了這間食店與其說是餐廳酒吧，不如直接說是酒吧，只是現今很多這類吧都喜歡用這種形式來經營，日間比傳統提供 pub food 的酒吧更似一間餐廳。這裡待應都講英文唔識廣東話，要有些心理準備。

一開始講是 pub food 當然就預期食物唔會好似餐廳咁，但部份又真的太似送酒小食了，特別是雞翼及煙肉卷。煙肉卷其實都好食的，而雞翼就很細隻太乾及唔夠味，旁邊的沙律分量比想像中少很多，沙律汁亦少味味幾麻麻。

另一個餐的沙律就大點，味道麻麻地，而意大利飯又用咗自己最唔鐘意的鮮冬菇去煮，唔駛講我一定會話唔好食，撇開冬菇的問題味道亦只是一般般，飯過熟及略略唔夠濕。湯味道可以的。

最後的薄餅味道一般般，奇怪的不是餅底完全唔脆，而是餅底同用沒發酵的麵團做的沒分別，當然我相信是有經發酵程序，只是一點發酵過的跡像都沒有，雖對薄批影響不太大，但確是還是有一點。餐茶就唔好有期望啦。

以 pub food 來講其實都可以，價錢亦可接受。食完飯往外邊走走感覺非常好，外面風景確實美。

沙田 - 富臨魚港

如果有最差食店推選，一定推薦這間富臨，多間的富臨服務差已不在話下，這間更是在表表之列。當然也有服務好的分店，例如之前講的新蒲崗店就幾好，太子店亦唔錯。  
食物本身都可以的，唔算話好好食但就差極有個譜，下午茶點了幾個點心只有蘿蔔絲蝦餅較差比較硬無乜味唔多好食，蘿蔔糕就無料較得舊粉，除此之外都可以反正特價之下都底食。  
講返服務基本上開完茶收完order紙後係唔會有人理你，反正無論有幾多個待應見到你想叫佢地沖水或收食完的空碟佢地都會當見唔到，兜口兜鼻叫佢地佢地應完都係唔會做，沖一壺水就用了二十分鐘以上，最後終於有待應沖水但極慢動作同黑面，當然唔會沖第二次水。食完的碗碟絕大部份枱都是下午茶臨完要清場時才推車仔一次過所有東西收，咁既服務真係難得。

還有碟煎釀茄子本身應好樣點的，但放在枱後馬上拿回換過碟較差的，好樣點的留返俾人。之後重話唔準自己出櫃面埋單，超，唔駛旨意會俾貼士。其實幾日前才去這裡食過火鍋，感覺上服務都無咁離譜，真係唔知搞乜鬼。

耀安 - 富東閣海鮮酒家

估唔到之前的東城咁快玩完變了現在的富東閣，看門面及裡面的裝修都有些格調，價錢都是差不得幾多。由於早茶的特價點心不多及在同區裡不算便宜，所以以早茶來講是有一點貴。  
看看食物質素，先來特價的鳳爪排骨飯及金針雲耳雞飯，餸比想像中少一點，味道幾好，飯幾香。  
不過蛋黃蓮蓉包就很過份，蓮蓉正常的，只是蛋黃少到......這不是個別情況，三個包都是這樣，蛋黃約只有一粉飯咁上下大。老細，叫蓮蓉包算把啦。  
叉燒包味道麻麻地都可以，綿花蝦丸亦都只是麻麻地講真唔係幾好味唔係幾夠鮮味，蝦膠幾鬆散。最後的生煎包本來好有期望，因送點心的呀姐在你面前將一點酒倒入去才開蓋，包下面亦有洋蔥。可惜真的可惜，首先呀姐因不熟手酒倒了在煲蓋上便馬上開蓋，根本沒有在鍋內焗一焗，何來酒香，二來包本身唔好食，饀少肉更少，調味亦唔好，整體說是唔好食。  
留意這酒樓剛新開很多東西例如食物質數也不能完全作準，除時師父也未必已全上班，只是這次的水準真係唔見得人，希望幾星期後能多多改善。

Godiva Messages Tout Chocolat Limited Edition

這朱古力是別人從外國買來送給我的，是專為旅行人事而設的特別版。紅色的盒子入面裝有四款不同的朱古力，樣子都幾"潮"(其實有點祖國feel)。先試綠茶味，只有入面一層薄薄的朱古力夾心醬料有綠茶味，所以茶味著實幾淡，濃返點會更好，其實另外三款請況亦差不多只是沒綠茶饀薄及淡得咁誇張，朱古就相當幼滑。  
雖然有頗多女士都好喜歡這品牌，自己對這品牌卻沒有特別偏好，特別是香港的朱古力賣得這麼貴，同一價錢選擇著實唔少，這款未必是自己的首選，但無論如何收到後仍是很喜歡。

海怡半島 - 淘園宴會廳

這次是去這裡喝下午茶，老實講句，水準是有點失望，食物只有炸馬蹄糕做得較有特色及較好(照片少了一塊因吃了才記得拍照)，其它的味道都較普通較一般，部份更加唔算係好食那類，除此之外亦沒什麼好講。  
價錢是有一點點，雖然餐後按總價格送晚飯現金卷，但由於不打算在這裡晚飯，真的得物無所用。