灣仔 - 麵屋武藏

在銅鑼灣一帶有很多日式拉麵，食過好幾間出名嘅都確實唔錯，只是要搵個位肯定排隊排餐死。咁啱去到附近行去灣仔都唔遠，諗起這間未去過便去試試。睇吓餐牌都唔平，同其它出名拉麵基本上差不多價或是平一點點吧，而食品選擇就多些。點了叉燒白武骨同豚肉片黑武骨味道都幾好，湯很濃但味道比較雜，相對地確係比唔上其它有名的拉麵店，差咁啲嗰種好鮮嘅感覺。  
再點了份厚揚土佐豆腐，真係無乜特別，同一般上粉炸豆腐無大分別，點了醬油汁亦唔覺有幾好食，比較失敗。  
這裡位置較偏除飯市外人比較少，無"食完就好走啦"那種感覺，坐得較舒服，但卻缺少了那種想返去再食的感覺，或者試過就算了。

新蒲崗 - 日牛

反正就是一般的日式涮涮鍋，牛肉豬肉算OK啦，其它配料特別是丸類一如其它同類店舖都比較次一級，疏菜都新鮮洗得乾淨，整體只是不過不失。服務算可以，曾幫襯過其它分店是有比較差的。雖然唔係自己嘅首選但由於很多分店都開在人流多的商場所以假日都幾多人等位。這食肆最其怪之處是一人一電鍋，但鍋相對地小及淺，如果加水稍多且開大個火馬上便滾晒出來，隨時一枱一地都係，真係唔講得笑。

紅莓味 KitKat

好好味的日版紅莓味KitKat，打開包裝馬上可以聞到很香的紅莓味，在白朱古力入面混入了紅莓果肉呈紛紅色，帶點微酸，女孩見到一定"lum"死。暫時只見到在兩間一田(新蒲崗)及Aeon(荃灣)有售，其它絶大部份分店未有。

馬鞍山 - 莆田

這店近來在香港都開了幾間分店，幾標榜在新加坡米芝蓮拿了一星，心諗香港米芝蓮以經好伏(中伏)，而家重要係新加坡，會唔會更加伏，但眼見馬鞍山分店開業不久便即管試試，而且下午茶餐唔算太貴。  
先來的芥菜粥簡直認唔出同佢張相係同一樣野，都有海鮮味但唔知點解除了幾粒蝦米外近乎無海鮮嘅囉，入面得些冬菇粒同好多介菜粒。唔計入面無海鮮味道免免強強OK啦。  
再來興化炒米粉，麻麻地啦，米粉有些起一舊舊炒唔開，味道免強合格但唔好有衹望。  
之後上的前菜如果話難食就唔洽當，因為明顯漏了"極之"或"非常"這類形容詞。已好耐好耐未試過咁難食嘅野。冰浸苦瓜真係幾片切出來很苦的苦瓜。水晶豬蹄凍竟然只是半擎狀態，無乜味亦無乜料。蝦苗拌頭水紫菜真係得啖笑，無蝦味得返些甜甜地味嘅紫菜，難食。連滷水豆腐咁易整都可以整到咁差，乜野味?若食過台灣罐頭花生豆乾的話，倒出來唔要那些水就係咁味，當然人地豆乾做得好吃而這裡的豆腐就...還有更垃圾的糖水(盒子中間那蜿)，有少少雪耳同一粒紅棗，除了少少甜味之外是無乜其它味。  
這裡除了食物差之外服務亦較差，整體極之有中伏感覺。

尖沙咀 - 頂好海鮮酒家

細個嘅時候去街間中都會經過佢門口，無錯只係經過，嗰時要出街食飯都唔容易更何況去尖沙咀。當然今時今日出尖沙咀食野以經好平常，這間落地牢的酒家價錢仍算有點貴，不過和美心集團那些也只是差不多價。

講真點心唔算好特別，流沙包係好流心味道都可以，但咬開個包明顯見到饀料規側埋一邊，包功唔多掂。其它點心味道屬預期之內，合格但無乜特別。反而想介紹吓佢嘅炸魷魚鬚較為特別(但近排無賣可能有季節性)，外面的不是炸粉而是芋泥，食落好似芋角咁好重芋頭味，喜唔喜歡就要看你喜唔喜歡吃芋頭。  
最後當然點了蟹粉小籠包，一個一籠，個包同灌湯餃差唔多大，噢其中一個未夾頂部已穿了個小孔，好在小心點都夾得起。皮好薄放起道都有點透光，非常之多湯汁，只是蟹粉多得來無太多蟹鮮味而只得高湯味有點可惜，不過講真香港已很難食到好有蟹味的小籠包，重有幾多間食店會自己拆蟹肉，大部份都係用拆好嘅急凍貨，咁人地又會唔會用靚蟹來拆肉急凍呢。

深水埗 - 蘇媽蘇媽馬來西亞食品專門店

近排好懶雖然食食食但都沒有太多出文，當然好多都沒什麼好談亦是原因，睇返手機影落都唔少相，這間位於深水埗行細的店就是其中一間，與其話店其實更似街頭少食。咖喱嘅野好難話一款咖哩個個都話好食，自己覺得這裡的麵咖喱湯以價錢論確實唔差，是相當濃味的一類，比較帶辣，價錢唔貴，反而小食會差些少，有機會可以試試。而近幾個月賣埋串燒，價機相對地貴，拍得住一般舖頭，由於是即燒要有相當多時間坐係道等至得，下次再有無限時間等才有機會試(眼見真係等好耐)。

曾拌麵 vs 双人徐獨居乾麵

這次比較一吓這兩款香港有得賣的台灣人氣乾麵，看看那款較好吃。

先看看價錢較貴的麻辣味獨居乾麵，入面有4個沒印刷的透明膠袋裝著的乾麵，各自附上一包混了辣油的醬料。香港賣的並沒有附上滷蛋及豆乾，比較可惜欠了這些特色。

曾拌麵外面的包裝就沒有咁討好。同樣是4個麵但入面每個袋都印上品牌資料，感覺反而較高級。辣油同醬料分開包裝，唔食辣的直接唔落辣油就得，比較簡單。

兩款的醬料味道差唔多，都是煮過帶點蔥味的甜口淡鼓油。曾拌麵的辣油就明顯帶川椒的麻味，但感覺上仍是獨居乾麵的醬油鮮味稍為討好。

再試麵質(所有配料都是自己加進去的)，反正這點高重要。其實麵質同阿信屋賣的台灣刀削麵唔差好遠，特別是獨居乾麵(上面有滷蛋那張相)唔事前講明可能食完都唔知，講明的話食時亦好可能分唔到。而曾拌麵麵質Q(彈牙)得來就比較淋沒有咁死實，當然亦只是比較起上來好一點點。麵質是曾拌麵較優。

整體上是曾伴麵較優，特別是加上價錢因素。當時買時曾拌麵要差不多60蚊一包，這幾天一田超市減價賣40蚊，有興趣可以買包來試試，試完就算了，而獨居乾麵要差不多80蚊，HKTV個網上價會較平，但講真這個價錢不試也擺。之後都係去返阿信屋買刀削麵，加塊豬扒同煎蛋，爆香紅蔥加淡口甜鼓油，整個港式豬扒蛋撈刀削麵，反正還有誰能做出比淋在豬扒煎蛋飯上面更好味的蔥味醬油。

馬鞍山 - 盈福28

路過見到這店剛剛在試業，門口又有優惠券，咪又入去試吓。睇餐牌應該想做些比較新派的菜色，特別是包點，價錢是比想像中貴。

先來的沙薑豬手，碟頭比想像中大，豬手雖已不錯但沒想像中彈牙，起碼比附近的上海姥姥差點。味道方面有點不似預期，雖然新鮮沙薑落得已唔少，但蒜蓉著實多，有點變了蒜蓉豬手。  
奶黃蜜語其實是流心奶黃包，但味道又係有點不似預期，奶黃味道比較似吉士味多過奶黃味，由於賣得算貴以價錢論包有點發得唔夠鬆，吉士流心濃味得來始終無傳統奶黃咁香口，味道雖合格但唔算好出色。  
雲吞擔擔麵味道又係有點不似預期，味道與其說是擔擔麵不如說是四川麻辣麵與擔擔麵的混合體。Oh No，當日的雲吞入面的蝦未煮熟。唔計蝦只得一半熟，整體味道不過不失。  
蟹粉鍋粑是用優惠券送的，鍋粑是有一點點唔夠鬆化，可能是米粒本身較細的問題或炸得唔太平均。蟹粉入面都幾多蟹肉，不過個汁用了南瓜蓉來開，南瓜味太重差不多完全把蟹肉味蓋過，而且南瓜蓉有另一個問題，就係放涼了後會"擎"到變成膏狀。這道菜味道算可以但整體改做其實失敗。  
最後的脆皮牛魔點醬其實是炸牛腩點黃咖哩，牛腩幾淋但再淋多一點點更好，肉較"鞋"，上的脆粉是正想的酥炸脆漿，咖哩汁亦是正常的餐廳咖哩汁。這碟菜其實是將咖喱牛腩分開來上枱，創意唔錯效果亦幾好。  
見到別人點的包點只是在包上蓋些得意公仔，亦唔係想像中咁出色。可能是新派菜關係好多味道都不似預期，但當然唔係話佢唔好食。可能是試業關係味道平衡暫做得唔太好，這亦是一般廚師在剛轉了用慣的醬料牌子後有機會遇到的問題，希望在正式開業時可以正常返。雖然價錢有點貴，但由於碟頭比較大(不計包點)，計返上來其實都差唔多唔算貴。味道唔算偏鹹但偏向濃及杰，食完會幾飽同幾"濟"。當日待應服務態度相當好。