九龍城 - 湘囍

在九龍城沒什麼特別想食的東西，見到這店應開了不太久的店於是試試。下午只供應幾款石鍋飯及小食，若要不辣的就更少選擇。  
點了茶樹菇土雞及主席紅燒肉石鍋飯，另外點了一份麻辣牛腱。牛腱因為是幾片疊了起來所以分量其實沒照片中看到那樣少，牛腱厚薄算適中有咬口，這裡的辣椒醬幾好味亦幾辣，師父在每片牛腱上塗上一層辣醬後再舖上另一片，所以每片辣醬都很均勻夠味，做得幾好。記得自己在家中做牛腱有時做得唔好太淋或太韌，其實有一辦法補救，就是太韌時片薄點，太淋就切厚點咁就較易有咬口。  
來到主角石鍋飯，石鍋燒得很夠熱塗油又塗得夠，飯在上面能夠慢慢起飯焦而飯焦又可刮下來吃，茶樹菇土雞很好味茨汁亦好，幾好幾好。  
另一款主席紅燒肉都幾好味，有好多筍片只是可能是罐頭筍，紅燒肉都算幾好食只是份量略少，辣汁少辣都真係有點辣，味道就略為不是自己喜愛的，整體沒茶樹菇土雞咁好食。  
價錢是有點貴，亦沒有飲品跟只有基本的茶水。選擇是比較少最好可多加一些不辣的石鍋飯，始終香港人都好易熱氣怕食太多辣野，最後若果用鐵匙代替中式磁匙或更好，始終中式磁匙太厚太鈍很難把飯焦刮出來。晚飯水準不知如何?有機會定要試試。

銅鑼灣 - Hana 小料理屋

這是團講的四人套餐，優惠後要兩張金牛再加5%服務費，店方表示服務費是團講公司收的，若在它們那裡買則不用俾。  
先來一瓶清酒，味道都算唔錯。  
這個頭盆很正，美觀得來又幾好味，食材質素好之餘醬汁亦好味。  
之後的刺生亦很美味，三文魚的質素幾好，牡丹蝦(好像是)好大隻亦很新鮮，唯蝦腸清除得不夠乾淨要扣分。  
之後的牛肉涮涮鍋有幾多配菜跟，至於牛肉方面，由相片右至左分別是四片日本和牛，八片澳洲和牛及八片安格斯牛。在直接比較之下三種牛高下立見，日本和牛比澳洲的牛要好吃，安格斯則明顯比較差。當然這裡的日本和牛不是最好的，但已比任食那類好，較淋身，可能由於切得較厚所以亦較有牛味。只可惜和牛太少感覺上食完再食安格斯後有一點點遺憾。最後還有一大碗烏冬跟，質素亦算是唔錯的日本烏冬。  
食完後每人有兩款甜品，應該是買回來的所以和日式超市見到的差不多，當然又以牛奶布甸較好味。  
牛肉鍋雖然本身相當不錯，不過頭盆等做得更精緻美味，反而覺得主打的牛肉鍋有點失色。講真這餐真係相當貴，原價更是不得了。

深水埗 - 牛車水餐廳扒房

真係唔知到底有幾多間食店的名字叫做牛車水，這次去的是荔枝角道的一間。  
叫了一個午餐咖喱牛腩飯，三十幾蚊唔算貴。紅湯加得較多茄汁比較酸，幾多菜疏味道都可以。咖喱幾大碟，帶少少辣，以價錢論味道幾好且勝在很多汁，落多多汁來撈飯都唔會唔夠汁，牛腩淋得來仍有咬口，唔錯。餐茶亦是可以的茶餐廳品質。

許留山 - 芒果布丁甸

幾年前曾經很流行食生果甜品，這類生果甜品店開到周街都係，特別是芒果布甸，賣到連多間超市都在賣，不過這種現像好像都消失了，剩下的這類店舖也不多，最出名的要算是B仔同許留山。

買的芒果布甸食味水準依舊沒有變，仍然有頗多芒果在布甸裡面味道仍好。只是買回來的那個明顯曾連盒跌在地上，買時沒有留意否則必定更換。其實這些或曾連盒掉在地上的東西不應拿出來賣，很影響品牌形象。問題若是發生在出廠前，即整個過程至賣給客人也沒人看到，又或看到也不當成一回事，這些細菌較易生長的食物尤如全沒監管一樣，多少也令人擔心。

深水埗 - 上海萬家村菜館

深水埗的食店很多，起正電腦商場對面的也不少，而平到好像這裡的下午茶或者真係好少。這裡最平最好食的下午茶應該是燻魚加麵，就咁睇$27(其實已加了價農曆年前才$26)或者都感覺唔到有幾底食，看看照片就知。  
點了燻魚擔擔麵套餐，擔擔麵其實麻麻地，味道不算濃，有點肉碎咁啦，但就勝在大碗，就咁食個麵都有點飽。  
燻魚幾好味，魚在炆前炸得夠香脆，煮好後帶點醬油味的蜜汁配合得好亦好味，不過蜜汁相當甜，甜到有點像糖膠的甜度所以不喜歡甜的人或接受不到。  
套餐如果就咁結束就唔會叫得做底，原來還有兩個生煎包，雖然味道麻麻地但又係勝在飽肚，食埋兩個包真係晚飯都唔駛食。  
最後加杯味道麻麻地的茶便劃上句號。雖然幾樣野味道都是麻麻地，但在質數與價錢掛鉤之下實是相當唔錯，特別是燻魚由於自己不怕吃甜野所以不看價錢也覺得幾好味。  
同場加影一碗下午茶套餐的五香牛肉麵(代替了燻魚及擔擔麵)，味道無乜特別，感覺上亦無咁底食(雖然牛腱其實好貴)。

大角咀 - 越旺美食

經過見到這店似乎比其它左近的店舖旺，入去食了個下午茶，沒有叫它的招牌咖喱，只點了個香芧豬扒金邊粉。湯河其實都幾茶餐廳貨色，唔太似越南食肆提供那些，亦沒有咁好味，不過個價錢就差不多，算是有點貴，特別是以大角咀這區來講。湯底幾味精，隨此之外沒什麼其它味道，豬扒其實可以的，只是無乜香芧味及太茶餐廳口味，紅豆冰唔係幾夠紅豆所以甜得來唔夠豆味同奶味。  
老實講句這個粉就算下午茶來講有埋野飯都唔係好值這個價，不如正正經經去越式餐廳食，否則直頭去有粉麵賣的茶餐廳食算了。

九龍城 - 金雞去骨海南雞專門店

基本上同西貢店食物質數是同一個餅印，似乎是同一個師父做出來的。例湯一樣怪怪地，幾唔明點解放南瓜入去，會唔會語放清一點更好。是相同的飯，飯唔算好香不過唔油，醬料幾接近甜酸醬應不同了，雞都幾滑但沒西貢店做得咁滑，可能仍未算完全掌握爐具，雞胸其中一面有很少一點點過熟老了。  
和很多其它海南雞店比，仍是較出色，唔錯唔錯。

粉嶺 - 百份百餐廳

經過佢門口見佢門外面的廣告講到好勁咁，入去試試下午茶，結果都真係好失望。本身價錢一般但碟頭好細所以計起上來都算貴，最大問題是唔好食。功夫叉燒蛋白蔥花炒飯成碟飯數埋的碎叉燒加起來連兩塊叉燒都無，叉燒不單唔特別亦唔比最大路的平價燒臘檔做得好，蔥花少得可憐，炒飯亦淡而無味唔好食，整體只能用極失敗來形容，唔食無損失，食了反而會覺得唔開心，好在份量很少連餸得一碗飯左右。  
白汁芝士焗龍利柳意粉叫做好一點亦大碟點，可能因為塊魚柳是賣回來而唔係自己做，白汁少得近乎無(白色的是芝士，側邊啡啡地色一pat pat的固體才是汁)，除此之外叫做食得落口食得晒，就係咁多。餐茶屬好一般品質，咁細杯好心斟滿點。