元朗 - 祥興記上海生煎包

繼荃灣分店加租要結業之後，估唔到元朗分店馬上也要結業，門口告示話會搬去尖沙咀，今時今日在尖沙咀開食肆會重易過在元朗開，咪話自由行同米芝蓮效應影響力唔大。

食物方面除了招牌生煎包外其它的東西就無乜興趣，好在堂食剩食生煎包都無乜問題店員唔會口黑面黑，暫時搵位亦無大難度。講返生煎包，賣唔算好，與一般見開的唔多同樣，比一般的再細少少，上面(反轉後的上面)皮很薄，加上點點芝麻咬落很香口，而底部收口後的皮非常厚，卻好在煎得很香脆，相當好食，只是略略有點太乾。  
即時煎好的包咬開後肉汁仍很熱要小心，湯汁頗多，肉及汁十分鮮味，難免令人有少少懷疑有否加味素，比起台灣那間有名的小籠包的肉要鮮味很多。十分好食，是現時食過最好食的其中一款，要舉起兩隻大姆指讚吓。  
食生煎包最好是見到是即煎的才好去食，有時食肆做得太快賣唔設放久了就唔好食。

佐敦 - 都會自助餐廳

說來不知曾經經過逸東酒店門口多少次，這次還是第一次幫襯。平日下午的自助餐不算貴，加上今個月有'開飯'優惠卷就更加超值，只是唔明白為何會有$10服務費，係個個人$10服務費之外再另收加一服務費，變相要收兩次服務費，而且這收費在酒店內的實體收費表或網上收費表中是沒有提及的，若問待應自助餐價格時佢地會自動包含這$10在價格內，這讓做似乎有點違反商品條例。 講返自助午餐本身確係有點驚喜，水準同一般5星酒店差唔多什或更好一些，而且價錢又平些。有橙汁任飲，三文魚刺生都幾新鮮好食，八瓜魚有少少烚過籠不過仍鮮甜好食，壽司就唔好掂因唔好食，冷麵更是超難食。  
估唔到午市都重有生蠔，係細隻點，有很輕微腥味但由於不是即開的所以絕對收貨，生蠔很多人拿很快會比人拿完，餐廳算補充得快唔會話很難拿到來食。  
沙律稍稍弱些選擇亦較少，樣子不太討好不過但估唔到部份原來幾好味的，例如碟中那三條牛肉絲整兜時是超樣衰及恐怖跟本無乜人會拿來食，不過原來個汁調得很好很好味的。煙三文魚真的差。  
主菜整得幾好食，不過和一般酒店的口味明顯不同，這裡的口味不似西廚煮中菜，而是有中廚煮西餐的感覺，這樣無話好同唔好，反正好食就得，係味精幾重手。  
甜品就一樣樣，有些幾似屋邨麵包店或呀邊個邊個唔識煮野但跟著食譜做出來之後監你食的東西，唔係話唔好食而係比較cheap。不過有部份如紐約芝士蛋糕又好好食喎，又係嗰句，點解係要搞到咁似"呀邊個邊個"整出來叫人見到唔多開胃的樣子。雪糕是M字頭那隻。  
外面玻璃大堂位樓底很高坐得很舒服，不過不知天晴時會否曬，二人餐枱為圓枱比一般酒店餐枱大頗多，放東西如手機相機等亦較方便，係唔明窗邊的枱為何每張都對正包了泡光板的柱放，結果好像對著鏡子食飯一樣會很不自然，放側點不成嗎?而在約一點半左右會叫你先埋單，這也無可口非，不過問題是侍應本身不多而所有侍應都去了處理埋單事項，半個鐘頭內無人招乎及收碟，堆到一枱都係食完的餐碟就確係煩。整餐以優惠後的價錢論是相當滿意，若原價論亦不錯。

阿信屋 - 雞翼尖

見到阿信屋的雞翼尖在賣$5.9一公斤，這個價當然不會再有任何折扣，都幾大隻的，最啱整蒜蓉雞翼尖或滷水雞翼尖。所謂賤物鬥窮人，我這些窮人當然整返包。  
真係希望佢下次賣埋雞腳。

北角 - 利強記北角雞蛋仔

其實這是幾個月之前幫襯的，當時幫襯完覺得無乜特別亦無刻意記下來，近日又見有食店話拿到米芝蓮後遭業主加租要結業(當然唔係講呢間)，便又諗起唔知米芝蓮是用什麼來做評審的，因為真係有幾多間食過之後覺得很普通什或是差的都可以拿到星星，係佢地唔識食還是食過的地方或次數太少嗎?就好似北角這間雞蛋仔，唔係話佢唔好食，但真的特別嗎?做得比人好嗎?  
這裡的雞蛋仔都算內軟外脆，但其實只是賣得夠快爐頭能保持到溫度夠熱要脆有何難度?你有食過剛做好稍放涼後的雞蛋仔會不脆的嗎?或許有，但很少吧，或者這店的優點就只是粉漿落得夠多入面唔會空心吧。  
做雞蛋仔來來去去都是差唔多的粉漿香精，材料得嗰幾樣，可變性極有限。溫度時間控制更是無難度，埋去拍段片，計計時間，試得幾次自己爐具的最識合爐溫便也能找出來。剩下的相信只是未做前的粉漿溫度，反正自己約略訂一個便成。試想想一間店可以開好粉漿後找幾個工人回來大量製造的食品有得幾難做。

林志源牛肉乾

來自星加坡的手信，對於星加坡肉乾唔係太認識，似乎是當地相當出名的一間肉乾店。牛肉乾很油，雖然有點擎油同好小心拿出來，但都係'high'到周圍都係油。好有香港美珍香最肥果種豬肉乾剛整出來油淋淋那種感覺(而且這種更肥)，味道真係幾正，有得咁油肉質當然淋滑，是正常香港人預期免治牛肉乾的口味。

佐敦 - Hello Kitty 中菜軒

話晒去主題餐廳食飯必定有朝聖的心態吧，未知是否在港的宣傳不多還是平日關係人不是很多，其中半數食客似乎是遊客。裡面可以隨便拍照只是 Hello Kitty 的公仔及擺設沒想像中咁多，什至可以用少來形容，食物價錢就參照高級食肆的，即係一百蚊都有機會食到兩碟點心咁啦，當然計埋茶錢加一等等就唔得。  
坐底放下的前菜是腰果，都幾好食，只是有一點點通風，香港天氣咁潮濕都算可以。點心及餸菜唔係樣樣野有 Hello Kitty 個樣，但來得朝聖當然要睇樣只點有樣的。叉燒酥唔講可能覺有佢個樣，至於味道啦喎，都無乜餡，酥皮一般唔係好酥果種味囉。而流沙包及蝦餃皇(得一隻有樣)樣子確係好可愛，唔係幾舍得咬落去，味道就正常。  
紅蘋果雞絲飯樣子都幾靚，食落去味道就麻麻，一般較淡的酦甜汁但又唔係話好惹味。  
金瑤扒豆腐隻貓好似無沖涼咁比較灰，樣睇擺放唔多可愛，豆腐重要幾實幾難食，幾個人你推我讓差點無人肯食晒佢。  
到生炒糯米飯出場，嘩搞乜隻貓變咗異形，粒粟米點睇都似鼻屎多過似個鼻，唔可愛不特止，簡直驚嚇。味道咪屋邨酒樓少少偏爛又無乜料果種糯米飯，差。  
話晒這類朝聖食肆一般要求唔可以咁高，唔可以當一般食肆咁去評，食物要用眼去評，唔應該放入口。這裡的服務亦很一般什至乎唔多好，唔係員工態度有問題而係明顯培訓唔夠，待應好多時都唔識要點乜。若很喜歡 Hello Kitty 去試試無防，否則...next。

馬鞍山 - 嚐味

睇到個名相信都估到係味皇集團的公司，話晒味皇的海南雞飯都唔差，又試試這裡的如何。首先賣相都幾果其，菜沙律菜唔算好新鮮，不過它與大豆芽的味道都算可以的。這裡的去骨海南雞亦是只提供泰式醬，沒有泰國食肆咁辣及咁多青檸味，都可以的，雞肉仍有微暖都算嫩滑，飯唔太油亦唔太香口。講了這麼久見到咁多"都"字都估到整體是合格但唔算出色，比起正常味皇水準是有點差距。

尖東 - 秀韓國餐廳

這次去的是位於幸福中心的一間韓國料埋，由於是別人"發板"所以唔係太清楚個別菜式的名稱。一坐下來有杯韓式的薑茶飲吓，即是超市見一樽樽要開水那類。而泡菜等碟頭雖然細，但基本上是任食的，食完可以無限任拿，味道和正常預期的差不多，都好食的。  
韓式炸雞都幾大塊，有少少乾及老，是近期韓式炸雞的正常味道，味道可以的。石鍋飯可能唔係自己杯茶，覺得唔多好食做得唔夠其它舖頭咁香口，或者是缺少了韓式辣醬所至。  
豆腐海鮮煲有少少辣，唔係好多海鮮，有韓式風味不過幾味精感，做得唔算好。蛋卷本身煎得幾好，之不過在無加味的雞蛋卷上加些茄汁，咁其實無乜好食。  
泡菜薄餅真係唔多識欣賞，隨了泡菜辣味基本上係無乜其它味，又唔香口又唔脆，中間的醬汁只食到鹹同很辣的味道。牛仔骨味道亦只屬一般。炸魚塊係鯰魚上些加了蛋的粉漿後半煎炸，基本上又係無乜調味。  
餸菜味道都很兩極化，一係就好濃味一係就好淡口，平衡些(或是多多平衡)不是更好嗎?否則也要由淡味慢慢食都去濃味，像現時食完濃辣後就馬上來碟淡口餸，一般人味覺根本調整不來，情況會更差，雖則現時是所有餸短時間內全送到枱面，但那有分別嗎?

洪師父牛肉乾

行過裕華國貨見做緊台灣糕餅節，其實咪又係將大部份樓下超市的台灣包裝食品拿上樓上賣集中做推廣。之不過見到有洪師父牛肉乾賣，部份重有幾日就到期的原味牛肉乾及辣味牛肉乾由89蚊包減到50蚊包，咪又買來試試。(永安也在做減價，大部份正價台灣食品有9折，這兩種牛肉乾賣89蚊9折，而新東陽的就特價一百蚊兩包無額外折扣。)  
打開來看牛肉乾分量都幾多，每片都很完整無話散收收，不會太乾，比較有咬口，與一般香港的牛肉乾比要多少少牙力。好唔好食就見仁見智，味道唔係一般預期的台式果汁味而係醬油香味，牛肉味幾濃但帶些少牛臊味。  
老實講，還是覺得超重味精的華園沙嗲牛肉乾/粒較好食，話晒香港人口味。 

<2015-12-10更新:試埋新東陽同金安記兩種牛肉乾，果然洪師父最好食，新東陽最差>

旺角 - 盛八日式火鍋放題店

這店舖由新開到現在都幫襯了好幾次，期間都睇住佢越做越多不同優惠卷，無事先印定些就幫襯真係幾唔底。如果是普通肥牛任食，去這裡其實都未必好底，皆因除肥牛外其它火鍋配菜同甜品質數只是麻麻地，部份如三文魚刺身等亦只有晚市才供應，質數亦很一般，雪糕無估錯應是維記。  
去這裡食放題還是主攻飛驒牛才是正道，無錯係好貴，但牛肉確係靚，食多幾碟乜本都回返晒。之不過牛肉唔係次次都咁好食的，試過其中一次牛肉臊到完全食唔落，之後再叫兩碟都係咁。不過只是嗰次出事，另外去過幾次牛肉都是正常的。

大埔速食

先去一樂食燒鵝。  
去余曉記食蔥油餅。  
再去探亞婆。  
走前去樹記買腐竹。  
買埋振興肉丸很滿足。噢，雖然無寫住但阿姐話當時特價ing，小籠包魚丸、傳統包心芝士丸同龍蝦丸買一送一，重平過街市凍肉舖，買完加倍滿足。

銅鑼灣 - 一蘭拉麵

在銅鑼灣有很多有名的日式拉麵店，而這間肯定是近期的人氣皇，而且似乎亦只有佢是年中無休的。試過幾次晚上經過佢門人口，條人龍都長到不得了，咁啱這次平日下午，人留很少，唔駛等位可以直入，店入面的客人不多，可以周圍影吓相。  
這裡只提供一款拉麵，當然亦一如其它有名的拉麵店再按喜好挑選湯的濃度、麵硬度等各項。選了濃湯厚油及半份辣醬，由於要影相所以要硬麵咁快快手影完就變成普通硬度。

 厚油其實都唔係好油，而湯底確係幾鮮味又夠晒多，一如日本湯麵一樣偏鹹，叉燒又是很少，麵條都幾好。  
這裡的拉麵碗碗底有字食住，咪又飲埋d湯睇睇。唔駛覺得唔好意思喎，曾問過日本人佢地話係有日本人會咁做的。  
無論味道與價錢必定可與附近的豚王或魂可以比美，係選擇少點，而一風堂雖一樣好食但就略細碗了點，Jo就太油膩了。